ذوق والوں کے نام ۔۔۔

حدیث تنقید : مجھے تہذیب حاضر نے عطا کی ہے وہ آزادی

2012-02-07T16:17:00.006+03:00

محمد علی مکی - اردو بلاگنگ ہی نہیں اردو کمپیوٹنگ کے میدان کی ایک ماہر اور نامور شخصیت کا اسم گرامی ہے۔ ان سے چند نظریاتی اختلاف کے تحت ان کی صلاحیتوں اور خوبیوں کا انکار کرنا ناانصافی کے دائرے میں شمار ہوگا۔
آجکل محترم اپنے بلاگ پر جن موضوعات کو تختہ مشق بنا رہے ہیں اس سبب ہمارے علاوہ کچھ مزید اذہان میں مکی صاحب کی اس "مہم" سے متعلق شکوک و شبہات کا پیدا ہونا کوئی غیر فطری امر نہیں۔ لیکن ان متنازعہ تحریروں کے سہارے کسی شخصیت پر کوئی فتویٰ لگانے کے بجائے اگر ہم کچھ لوگوں کی اس بات پر بھروسہ کر لیں کہ ۔۔۔۔

ہو سکتا ہے مکی صاحب اردو زبان میں بھی وہ تمام مواد ایک جگہ اکٹھا کر رہے ہوں جو دیگر زبانوں میں اسلام ، مسلمان ، نبی کریم (صلی اللہ علیہ وسلم) ، قرآن ، حدیث وغیرہ کے ردود میں لکھا گیا ہے یا لکھا جا رہا ہے ۔۔۔۔

تو شاید کسی حد تک ہم کردار کشی یا "ردّ شخصیت" کے عمل سے رک جائیں ، کیونکہ جہاں تک راقم کو علم ہے مکی صاحب نے اپنی ایسی کسی بھی تحریر میں صاف صاف اور کھل کر یہ کہیں نہیں لکھا کہ
"مستند ہے میرا فرمایا ہوا"
یا "اس تحریر کے تمام نکات سے میرا 100 فیصد اتفاق ہے"
یا "جو عقائد و نظریات کے حوالے یہاں بیان ہو رہے ہیں اور جن کا دفاع بھی کیا جا رہا ہے ان سے میں خود بھی متفق ہوں" ۔۔۔ وغیرہ

خیر تو ایک دوست کی فرمائش کا خیال کرتے ہوئے مکی صاحب کی اس تازہ تحقیق :
حدیث کی مصداقیت
پر جواب آں غزل پیش خدمت ہے۔

سب سے پہلی بات تو یہی کہ ۔۔۔ محمد علی مکی جیسے محقق کے ذریعے یہ تحریر کچھ عجیب سی لگی۔ انگریزی اور عربی میں‌تو اس موضوع پر کافی مواد ہے (جیسا کہ مکی صاحب کی اسی تحریر کا بیشتر مواد قاری کو quran-islam ڈاٹ آرگ نامی سائیٹ سے مل جائے گا) بلکہ ذرا سی گوگلنگ پر اس کے ردّ میں زیادہ اور بیش قیمت مواد بھی مل جاتا ہے (بالخصوص عربی میں)۔۔۔ مگر اردو میں بھی یقیناً کوئی کمی نہیں۔ سرسید یا طلوع اسلام سے لے کر آج کا غامدی گروہ تک وہی کچھ کہتا آیا ہے جس کا خلاصہ مکی صاحب نے اپنے بلاگ کی اس پوسٹ میں درج فرمایا ہے۔
مگر سولہ آنے کا سوال یہی ہے کہ :
کیا اس موضوع یا ان موضوعات کا کوئی جواب دیا نہیں گیا؟؟

ایک دو نہیں سینکڑوں اردو کتب لکھی گئیں اور لکھی جا رہی ہیں۔ لکھنے والوں کے لب و لہجے یا اسلوب یا پیشکشی کے انداز سے اختلاف کیا جا سکتا ہے مگر "ردّ فتنہ انکار حدیث" پر مشتمل ان کتب کے قوت استدلال اور شرحِ مفید و معقول سے انکار کسی سلیم الطبع اور وسیع النظر فرد سے ممکن نہیں۔

ہمارے مکی بھائی نے جو 4 سوالات اٹھائے ہیں ۔۔۔ اپنے مطالعے کی بنیاد پر یقین سے کہنا چاہوں گا کہ ان سوالات کے جوابات نہ صرف یہ کہ قدیم اردو کتب میں دئے گئے تھے بلکہ "انکار حدیث" کے موضوع پر لکھی جانے والی آج کی کتب میں بھی ان سوالوں کے جواب نہایت مدلل طور سے موجود ہیں۔
ایک زمانہ تھا کہ راقم الحروف نے مختلف اردو/انگریزی فورمز پر "حدیث کی مصداقیت" پر شک کرنے والوں سے بیشمار مباحث/مناظرے کئے۔ دور کیوں جائیں ، اردو محفل پر ہی فاروق سرور خان صاحب کا اٹھایا گیا یہ ایشو تفصیل سے پڑھ لیجیے :
سنّت کیا ہے ؟

ونیز میں نے ایک وعدہ یہاں کیا تھا کہ

"حجیت حدیث" کے موضوع پر بھی بہت سارے مختلف فورمز پر انگریزی اور اردو میں میرے مباحث موجود ہیں۔ فی الحال کوشش ہے کہ جلد سے جلد اس موضوع پر علیحدہ اردو بلاگ قائم کیا جائے۔

افسوس کہ کچھ دیگر پراجکٹس کی مصروفیات کے سبب یہ معاملہ ہنوز التوا کا شکار ہے۔

بہرحال بات ہو رہی تھی "حدیث کی مصداقیت" پر ۔۔۔۔
اور میں ایک بار پھر دہراؤں گا کہ اردو زبان میں ایک دو نہیں بلکہ سینکڑوں کی تعداد میں ایسی مفید کتب تحریر کی جا چکی ہیں کہ ۔۔۔ کھلے دل و دماغ سے جن کا مطالعہ "حدیث کی مصداقیت" پر بڑے سے بڑا شک کرنے والے کو بھی مائل بہ اقرارِ حجیت حدیث کر دے گا ان شاءاللہ۔
چند کتب کے نام اور پی۔ڈی۔ایف ڈاؤن لوڈ لنک پیش ہیں : (حجم میگا بائٹس میں ہے)

1 : آئینہ پرویزیت - عبدالرحمٰن کیلانی
(صفحات:915 // حجم:13)
تقریباً 1000 صفحات پر مشتمل یہ کتاب فتنہ انکار حدیث کے جواب میں ایک انسائیکلوپیڈیا قرار دی جا سکتی ہے۔

2 : حجیت حدیث - علامہ ناصر الدین البانی
(صفحات:166 // حجم:7)
ایک گروہ ایسا ہے جو حدیث کو قابل اعتماد تسلیم کرتا ہے لیکن تاویل و تشریح کے ایسے اصول وضع کر رکھے ہیں جن سے حدیث کی حیثیت مجروح ہوتی ہے اور لوگوں پر یہ تاثر قائم ہوتا ہے کہ سنت نبوی کو تشریعی اعتبار سے کوئی اہم مقام حاصل نہیں ہے ۔عالم اسلام کے عظیم محدث اور جلیل القدر عالم علامہ ناصر الدین البانی رحمہ اللہ کی زیر نظر کتاب میں اسی دوسرے گروہ کے افکار کی تردید کی گئی ہے۔

3 : سنت کی آئینی حیثیت - مولانا مودودی (اردو یونیکوڈ ورڈ فائل بھی موجود ہے)
(صفحات:368 // حجم:37)

4 : حجیت حدیث - جسٹس تقی عثمانی
(صفحات:163 // حجم:17)

5 : انکار حدیث حق یا باطل؟ - صفی الرحمٰن مبارکپوری
(صفحات:111 // حجم:2)

6 : احادیث صحیح بخاری و مسلم میں پرویزی تشکیک کا علمی محاسبہ - ارشاد الحق اثری
(صفحات:224 // حجم:5)

7 : صحیح بخاری پر اعتراضات کا علمی جائزہ - حافظ زبیر علی زئی
(صفحات:125 // حجم:3)

8 : صحیح بخاری پر منکرین حدیث کے حملے اور ان کا مدلل جواب - حافظ زبیر علی زئی
(صفحات:33 // حجم:1)

9 : صحیح بخاری کا مطالعہ اور فتنہ انکار حدیث - حافظ ابو یحیٰ نور پوری
(صفحات:530 // حجم:18)

10 : تفسیر مطالب الفرقان کا علمی و تحقیقی جائزہ (جلد:1)- پروفیسر حافظ محمد دین قاسمی
(صفحات:625 // حجم:-)

11 : تفسیر مطالب الفرقان کا علمی و تحقیقی جائزہ (جلد:2) - پروفیسر حافظ محمد دین قاسمی
(صفحات:737 // حجم:15)

12 : اصولِ اصلاحی اور اصولِ غامدی کا تحقیقی جائزہ - عبدالوکیل ناصر
(صفحات:140 // حجم:2)

13 : فتنہ غامدیت کا علمی محاسبہ - پروفیسر مولانا محمد رفیق
(صفحات:450 // حجم:9)

14 : ماہنامہ محدث کا فتتہ انکار حدیث نمبر
(صفحات:280 // حجم:12)

15 : الاعتصام ۔حجیت حدیث نمبر
(صفحات:306 // حجم:8)

-- تفہیم اسلام بجواب دو اسلام

اس موضوع (فتنہ انکار حدیث) پر کتاب و سنت لائیبریری میں موجود اردو پی۔ڈی۔ایف کتب کی ایک مکمل فہرست یہاں ملاحظہ فرمائیں۔

ویسے ایک سوال میرے ذہن میں اکثر و بیشتر گونجتا ہے کہ ۔۔۔۔
آپ کو کسی حدیث کے متعلق کچھ اشکالات پیدا ہوتے ہیں تو آپ انہیں دور کرنے یا ان کی تفصیلات یا توضیحات جاننے کے لیے فن حدیث کے ماہرین یا شارحینِ حدیث کی طرف کیونکر رجوع نہیں ہوتے؟
یہ بڑی ستم ظریفی ہے کہ کسی دنیاوی ایجاد یا فلسفے یا نظریے کی منطق ہمیں سمجھ میں نہ آئے تو سمجھانے کے لیے متعلقہ فن کے ماہرین سے رجوع کرایا جاتا ہے ، ان کی کتب سے روشن اقتباسات کشید کر کے بطور دلیل پیش کیے جاتے ہیں ۔۔۔۔ مگر جب بات کسی حدیث کی "مصداقیت" پر آئے تو وہاں صرف اتنا کہہ کر جان چھڑا لی جاتی ہے کہ یہ چیز ہماری سمجھ میں نہیں آتی یا اس پر یہ یہ عقلی اعتراضات وارد ہوتے ہیں !!
یہ رویہ موجودہ دور میں کس فکر کی غمازی کہلایا جائے؟ کیا یہ فن حدیث کی ناقدری نہیں؟ کیا ہم غیروں کے اس قدر مطیع و فرمانبردار ہو گئے ہیں کہ اپنے اسلاف کے علمی ذخیرے سے ہیرے جواہرات کو ڈھونڈ نکالنا ہمارے نزدیک اب محض کار زیاں قرار پا گیا ہے؟

کہیں اقبال نے اسی کا رونا تو نہیں رویا ۔۔۔۔۔؟؟

تجھے آبا سے اپنے کوئی نسبت ہو نہیں سکتی
گنوا دی ہم نے جو اسلاف سے میراث پائی تھی

آخر میں ۔۔۔ مکی بھائی سے ایک مطالبہ یہ کرنے کا سوچا تھا کہ ۔۔۔۔۔۔۔ مگر پھر خیال آ گیا کہ اگر مکی نے کھل کر وضاحت کر دی (جو کہ خیر سے ناممکن بات ہے) تو پھر ان کی ساری "مہم" ٹائیں ٹائیں فش ہو کر رہ جائے گی ۔۔۔۔ لہذا جانے دیجیے۔

ہجرت بھی اک زخم ہے ۔۔۔

2012-01-18T13:11:00.002+03:00

مولانا اعظم ہاشمی کی داستانِ ہجرت (ترکستان تا پاکستان) بعنوان "سمرقند و بخارا کی خونیں سرگذشت" کتابی شکل میں سن 1969ء میں شائع ہوئی تھی جس کا تعارف مولانا مرحوم کے پوتے کفایت ہاشمی نے اردو محفل فورم پر یہاں کروایا ہے۔
یہ دلچسپ کتاب جو کہ دراصل تاریخ کا ایک باب بھی ہے ، archive.org پر پی۔ڈی۔ایف شکل میں موجود ہے۔ ڈاؤن لوڈ لنک نیچے دیا جا رہا ہے۔

کتاب کے شروعاتی صفحات ہی سے طرز تحریر کا سحر طاری ہونے لگتا ہے۔ جبکہ اس کتاب کے سال اشاعت (1969ء) سے اندازہ ہوا تھا کہ قدیم اردو ہوگی مگر بہرحال اتنی قدیم تو نہیں ہے۔
آباد شاہ پوری نے اپنے "دیباچہ" میں جو یہ باتیں لکھی ہیں ۔۔۔ زائد از 40 سال بعد والی موجودہ صورتحال بھی کم و بیش اتنی ہی محسوس ہوتی ہے ۔۔۔ ملاحظہ فرمائیں کہ وہ لکھتے ہیں :

اس داستاں کے مخاطب یوں تو وہ نام نہاد "مولانا" اور "مفتی" بھی ہیں جو سوشلزم کے گماشتوں کے ہاتھوں میں دانستہ یا نادانستہ کھیل رہے ہیں۔ اگر ان کے دل میں رائی برابر بھی ایمان موجود ہے تو خدارا سوچیں کہ وہ کیسا خطرناک کھیل کھیل رہے ہیں اور کن لوگوں کا آلۂ کار بنے ہوئے ہیں؟
تاہم اس داستان کے اصل مخاطب پاکستان کے مسلمان عوام ہیں جنہوں نے اپنے دین ، اپنی تہذیب ، اپنی روایات کو ہندوؤں کے چنگل سے بچانے اور اسلام کے سایے میں زندگی بسر کرنے کے لیے جنگ لڑی اور آگ اور خون کے وسیع اور ہولناک سمندر سے گزر کر پاکستان کے ساحلِ مراد پر پہنچے۔
یہ خونیں سرگذشت انہی کے لیے لکھی گئی ہے تاکہ وہ اس سے عبرت حاصل کریں ، پاکستان کو سمرقند و بخارا بنانے کی تگ و دو میں جو لوگ مصروف ہیں ، ان کے نعروں اور شرعی وضع قطع سے دھوکا نہ کھائیں اور کفر و الحاد کے ان علمبرداروں کے خلاف اسی جوش و جذبے کے ساتھ بنیانِ مرصوص بن کر کھڑے ہو جائیں جس جذبے کے ساتھ وہ ہندوؤں کے عزائم کے خلاف کھڑے ہوئے تھے۔ اس وقت جو خطرہ مسلمانانِ ہند کو ہندوؤں سے تھا آج وہی خطرہ پاکستان کی اسلامی مملکت کو سوشلزم کے گماشتوں اور ان کے نام نہاد شرعی رکابداروں سے ہے۔

24/دسمبر 1969ء
آباد شاہ پوری

اس کتاب کا پہلا باب میں نے ابھی ابھی کمپوز کیا ہے۔ اسے بھی ذیل میں ملاحظہ فرمائیں ۔۔۔۔
***
وہ رات مجھے مرتے دم تک نہ بھولے گی۔
38 برس گزر چکے ہیں ، لیکن آج بھی اس رات کا ایک ایک لمحہ میرے ذہن کی تختی پر نقش ہے۔ شب و روز کی ہزاروں گردشوں کے باوجود اس رات کی یادوں کی چمک دمک میں کوئی کمی نہیں آئی۔ بعض اوقات تو یوں محسوس ہوتا ہے جیسے امی جان احاطے کی دیوار کے پاس کھڑیں مجھے رخصت کر رہی ہیں اور فرما رہی ہیں :
"بیٹے ، اللہ تمہارا حافظ و نگراں ہو ، میری نصیحتوں کو مت بھولنا ، ورنہ میں تم سے خوش نہ ہوں گی۔"

یہ 1931ء کا ذکر ہے۔ آخر فروری یا شروع مارچ کی کوئی تاریخ تھی ، میں اپنے گھر میں کھلاوت (ترکی پلنگ) پر پڑا سو رہا تھا کہ امی جان نے مجھے آہستہ سے جھنجھوڑ کر جگایا۔ میں آنکھیں ملتا ہوا اٹھ بیٹھا۔ فوراً ہی سارا معاملہ میری سمجھ میں آ گیا۔ وہ گھڑی آ پہنچی تھی جس کے لیے ہم ماں بیٹا کئی دنوں سے صلاح مشورہ کر رہے تھے۔
"بیٹا ، اٹھو وضو کرو۔" امی جان نے کہا۔
یہ کہہ کر وہ مڑیں اور کوزے میں پانی بھرنے لگیں۔ میں نے طہارت سے فارغ ہر کر وضو کیا، پھر خود امی جان نے بھی وضو کیا۔ اب ہم دونوں ماں بیٹا بارگاہ ایزدی میں جھک گئے ، دوگانہ ادا کیا ، امی جان نے اوراد و وضائف پڑھ کر مجھ پر پھونکا ، پھر باورچی خانے میں چلی گئیں۔ کوئی پندرہ بیس منٹ کے بعد دسترخوان اٹھائے تشریف لائیں۔ ایک ہاتھ میں بٹیر کے سیخ کباب تھے۔ ایک کباب اپنے ہاتھ سے کھلایا۔ کھانا کھا چکا ، تو کہنے لگیں :
"میرے جگر گوشے ، اٹھو اور اپنے معصوم بھائی بہنوں کا آخری زندہ دیدار کر لو۔"
میں بڑھ کر ان کی چارپائی کے قریب پہنچا۔ کم سن معصوم فرشتے دنیا جہاں سے بےخبر پڑے سو رہے تھے۔ معصومیت کی لو ان کے چہروں پر دمک رہی تھی۔ میں نے باری باری ان کی پیشانی پر ہاتھ رکھا اور ان کے حق میں اللہ تعالیٰ سے خیر و عافیت کی دعا مانگی۔ وہ وقت میرے لیے بےحد صبر آزما تھا۔ محبت اور شفقت کے سوتے میرے دل کی گہرائیوں سے ابلنے لگے۔
"اب میں اپنے بھائی بہنوں کو شاید کبھی نہ دیکھ سکوں گا۔" میں نے سوچا۔
معاً میری آنکھوں میں آنسو امڈ آئے جنہیں میں نے پلکوں ہی پلکوں میں خشک کرنے کی کوشش کی۔ امی جان تھیں تو 65 برس کی، لیکن جوانوں سے زیادہ باہمت تھیں۔ کچھ دیر تک دم سادھے میری طرف دیکھتی رہیں، پھر بولیں :
"آؤ بیٹا"۔۔۔
ان کی آواز میں ہلکا سا ارتعاش تھا ، ایسا معلوم ہوتا تھا وہ اپنے جذبات پر قابو پانے کی کوشش کر رہی ہیں۔ انہوں نے ایک چھوٹا سا تکیہ نما بستر اٹھایا اور چل پڑیں۔ میں ان کے پیچھے پیچھے ہو لیا۔ کمرے سے نکل کر ہم صحن میں پہنچے ، صحن سے باغیچے کا رخ کیا، باغیچے کا دروازہ کھولا اور اندر داخل ہوئے۔ اب ہم کھلے آسمان کے نیچے درختوں اور پودوں کے درمیان کھڑے تھے۔ امی جان نے میری پیشانی چومی اور فرمایا :
"بیٹے ، تم میرے بڑھاپے کا سہارا اور امیدوں کا مرکز ہو ، مگر جیسا کہ دیکھ رہے ہو ، تم وطن عزیز میں رہ کر ایک مسلمان کی حیثیت سے میری خدمت نہیں کر سکتے ، چنانچہ میں تمہیں دین و ایمان اور وطن عزیز کی خاطر کسی آزاد ملک میں چلے جانے کی اجازت دیتی ہوں ، البتہ ایک شرط ہے ، وہ یہ کہ جہاں تک ممکن ہو ، ترکستان کے مسلمانوں کی بےبسی اور دین کی بےحرمتی کی خبر تمام مسلمانوں اور آزاد قوموں تک پہنچا دو۔ بیٹے ، میں نے وضو کیے بغیر تمہیں کبھی دودھ نہیں پلایا۔ اگر تم نے اس مقصد کو فراموش کر دیا ، تو میں کبھی راضی نہ ہوں گی۔ انسان کا مجدد شرف یہ ہے کہ وہ اپنے قول و قرار کا پابند رہے۔"
پھر امی جان نے مجھے وہ چھوٹا سا تکیہ نما بستر دیا، کوئی دو سیر وزن ہوگا، کہنے لگیں :
"اس کی حفاظت کرنا۔ بالخصوص اس کے اندر جو قرآن کریم ہے ، اسے حرز جاں بنا کر رکھنا۔ منزل مقصود پر پہنچ جاؤ ، تو اس کی موجودہ جلد اتار کر نئی بنوا لینا۔ پرانے گتے کو اپنے ہاتھ سے توڑنا اور پھر اسے جلا ڈالنا اور راکھ کسی دریا یا کنویں میں ڈال دینا۔"
مزید تاکید کے طور پر فرمایا :
"دیکھو ، تمہیں کوئی چیز اپنے پیدائشی وطن سے غافل نہ کرے ، ہمدردوں کی ہمدردی فراموش نہ کرنا۔ جو تمہارے خدا کا دشمن اور ملک کا غاصب ہے وہ کبھی تمہارا دوست اور بہی خواہ نہیں ہو سکتا۔ بزدل انسان اپنی منزل مقصود سے محروم رہتا ہے۔ موت ایک بار آئے گی۔ ایمان سے بڑھ کر کوئی دولت نہیں۔ مرد اپنے قول سے نہیں پھرتے۔ جو شخص ان تین باتوں کو نظرانداز کر دیتا ہے ، اس کا وجود کوڑی کا نہیں رہتا۔"

امی جان دیر تک پند و نصیحت کرتی رہیں۔ کوئی تین سوا تین کا عمل ہوگا ، پچھلے پہر کے سناٹے میں کبھی کبھار کسی مرغ کی بانگ سنائی دیتی۔ چاندنی چٹکی ہوئی تھی ، درختوں کے سائے پھیلتے جا رہے تھے۔ باغیچے سے گزر کر ہم احاطے کی دیوار کے نیچے پہنچے۔ امی جان نے ہاتھ اٹھا کر دعا کی ، پھر میرے سر پر دست شفقت پھیرا اور کندھے کو تھپکتے ہوئے کہا :
"جاؤ بیٹا ، اللہ تمہارا ساتھی اور مددگار ہے"۔

میں نے ایک آخری نظر اپنے باغ اور گھر پر ڈالی۔ اس باغ میں کتنے ہی پودے میں نے اپنے ہاتھ سے لگائے تھے اور انہیں خون اور پسینے سے سینچا تھا۔ اس گھر میں میں پیدا ہوا ، پلا ، بڑھا اور پروان چڑھا ، وہ گھر جو ہماری صدیوں کی خاندانی روایات کا امین تھا ، جس کے ایک ایک پتھر سے ماضی کی داستانیں اور میرے اپنے بچپن کی یادیں وابستہ تھیں۔ میں نے ٹھنڈی سانس بھری۔ امی جان کو سلام عرض کیا ، دیوار پر چڑھا اور باہر کود گیا۔ ہمارے باغیچے اور بڑی سڑک کے درمیان قبرستان تھا۔ قبرستان میں ہو کا عالم تھا۔ شکستہ قبریں اور اونچے نیچے مٹی کے ڈھیر دیکھ کر ہول سا طاری ہو گیا ، تاہم دل کڑا کر کے قبرستان میں داخل ہوا۔ ہاتھ میں امی جان کا دیا ہوا عطیہ تھا۔ ابھی چند قدم ہی چلا تھا کہ باغیچے میں سے ایک لمبی "ہو" کی آواز آئی۔ فوراً پلٹا اور باغ میں آیا۔ امی جان دیوار کے نیچے بےہوش پڑی تھیں۔ منہ پر پانی چھڑکا ، تو آنکھیں کھول دیں۔ مجھے اپنے پاس دیکھ کر کہا :
"تم واپس کیوں آ گئے؟ اپنی منزل کھوٹی نہ کرو ، ہمارا نگہان وہ قادر و توانا ہے جس کے وجود پر یقین ہر ذی علم کا سرمایۂ زندگی ہے۔"
میں باغ سے نکلا اور نامعلوم منزل کی طرف چل پڑا۔

***

سمرقند و بخارا کی خونیں سرگذشت
از : اعظم ہاشمی
صفحات : 62
پ۔ڈ۔ف فائل سائز : 2.9 ایم۔بی
ڈاؤن لوڈ لنک : Samarkand O Bukhara Ki Khuni Sarguzasht

نیا ہجری سال 1433 مبارک ہو

2011-11-26T13:33:00.002+03:00

نئے ہجری سال 1433 کی آمد آپ سب کو مبارک ہو۔
آج بمطابق عیسوی تقویم ، 26/نومبر 2011 کو سعودی عرب میں یکم محرم الحرام قرار پائی ہے۔

ہر نیا ہجری سال ہمیں رسول اکرم صلی اللہ علیہ وسلم کی عظیم ہجرت کی یاد دلاتا ہے!
وہ ہجرت جس کے باعث اسلام کا غلبہ اور اقتدار ہوا اور جس کی وجہ سے مدینہ منورہ کی پہلی اسلامی ریاست کا قیام عمل میں آیا ، یہی وہ ہجرت تھی جس کے باعث بدر و حنین اور باقی فتوحات حاصل ہوئیں۔
سفرِ ہجرت ہمیں ان واقعات میں پوشیدہ اسباق پر روشنی ڈالنے اور تجدیدِ عہد کی بھی دعوت دیتا ہے۔ مکہ مکرمہ سے مدینہ منورہ تک کا سفرِ ہجرت گوکہ اسلامی تاریخ کا روشن باب ہے تاہم یہ وقت کے ساتھ قید ہے مگر مسلمان کے لیے قیامت تک کے لیے ہجرت کا دروازہ کھلا ہے۔

نیا ہجری سال دعوتِ غور و فکر دے رہا ہے۔ ہم نے اپنی عمر عزیز کا ایک قیمتی سال مکمل کر لیا بلکہ شاید یہ کہنا زیادہ صحیح ہوگا کہ ہماری عمر عزیز کا ایک سال کم ہوا۔
نیا سال دعوتِ محاسبۂ نفس بھی دے رہا ہے۔ حقیقت یہ ہے کہ زندگی کا ہر گزرنے والا لمحہ اگر ہمیں اللہ تعالیٰ کے قریب نہیں کر رہا تو دور کرنے کا سبب بن رہا ہے اسلیے کہ انسان وقت کے ہاتھوں محکوم و مجبور ہے۔ عقل کا تقاضا یہ ہے کہ ہم گذشہ سال کے شب و روز کا جائزہ لے کر دیکھیں کہ آیا ہم اللہ کے قریب ہوئے ہیں یا گذشتہ سال کے ایام نے ہمیں اللہ تعالیٰ سے مزید دور کر دیا ہے؟
ایک حوالے سے ہم خوش نصیب ہیں کہ ہمارے دین نے ہمارے لیے توبہ کا نظام متعارف کروایا ہے۔ سال گذشتہ میں ہوئیں اپنی کوتاہیوں ، نادانیوں اور غلطیوں پر نادم و شرمسار ہو کر آئیے کہ اللہ تعالیٰ کے حضور توبہ کریں اور آئیندہ عمل صالح کا عزم کریں ۔۔۔ امید ہے کہ اللہ رب العزت اپنے فضل و کرم سے سابقہ گناہوں کو معاف فرما دے گا بلکہ اپنے خاص لطف و کرم سے گناہوں کو نیکیوں میں بدل دے گا۔ ان شاءاللہ۔

اللہ تعالیٰ تمام مسلمانوں کو واقعۂ ہجرت سے صحیح سبق سیکھنے اور غلبۂ دین کی خاطر اللہ کی رضا کے لیے پہلے اپنے اخلاق و کردار کو سنوارنے پھر تبلیغ دین کی سعئ پیہم کی توفیق عطا فرمائے ، آمین یارب العالمین۔

ڈاکٹر محمد حمید اللہ اور صحیفہ ہمام بن منبہ

2011-10-16T11:24:00.001+03:00

ڈاکٹر محمد حمید اللہ (پیدائش: [حیدرآباد دکن] 9 فروری 1908ء ، انتقال : [امریکہ] 17 دسمبر 2002ء) معروف محدث، فقیہ، محقق، قانون دان اور اسلامی دانشور تھے اور بین الاقوامی قوانین کے ماہر سمجھے جاتے تھے۔ تاریخ حدیث پر اعلٰی تحقیق، فرانسیسی میں ترجمہ قرآن اور مغرب کے قلب میں ترویج اسلام کا اہم فریضہ نبھانے پر آپ کو عالمگیر شہرت ملی۔
حضرت ابو ہریرہ رضی اللہ عنہ کے شاگرد حضرت ہمام ابن منبہ کے صحیفے کی دریافت اور اس کی تدوین کا کام ڈاکٹر حمید اللہ کا بہت بڑا کارنامہ تسلیم کیا جاتا ہے جبکہ فرانسیسی زبان میں ان کے ترجمہ قرآن کی اہمیت بھی مسلم ہے۔

صحیفہ ہمام بن منبہ کے دو مخطوطے ڈاکٹر حمید اللہ کو دستیاب ہوئے تھے، جن میں بال برابر بھی فرق نہ تھا۔ ایک دمشق میں تھا اور دوسرا برلن میں۔ اس صحیفے میں کل 138 احادیث موجود ہیں۔
مولانا عبدالرحمٰن کیلانی (علیہ الرحمۃ) لکھتے ہیں :

صحیفہ ہمام بن منبہ ، جسے ڈاکٹر حمید اللہ صاحب نے حال ہی میں شائع کیا ہے ، یہ ہمام بن منبہ حضرت ابوہریرہ رضی اللہ عنہ کے شاگرد ہیں۔ جنہوں نے یہ صحیفہ (جس میں 138 حدیثیں درج ہیں) لکھ کر اپنے استاد حضرت ابوہریرہ رضی اللہ عنہ (وفات:58ھ) پر پیش کر کے اس کی تصحیح و تصویب کرائی تھی۔ گویا یہ صحیفہ سن 58 ھجری سے بہرحال پہلے ہی ضبط تحریر میں لایا گیا تھا۔ اس کی ایک قلمی نسخہ ڈاکٹر حمید اللہ صاحب نے سن 1933 عیسوی میں برلن کی کسی لائیبریری سے ڈھونڈ نکالا۔ اور دوسرا مخطوطہ دمشق کی کسی لائیبریری سے۔ پھر ان دونوں نسخوں کا تقابل کر کے 1955ء میں حیدرآباد دکن سے شائع کیا۔ اور جہاں کہیں الفاظ کا اختلاف ہے ، اسے بھی واضح کر دیا۔
ہمیں یہ دیکھ کر کمال حیرت ہوتی ہے کہ یہ صحیفہ پورے کا پورا مسند احمد بن حنبل میں مندرج ہے۔ اور بعینہ اسی طرح درج ہے جس طرح قلمی نسخوں میں ہے ماسوائے چند لفظی اختلافات کے ، جن کا ذکر ڈاکٹر حمید اللہ صاحب نے کر دیا ہے۔ لیکن جہاں تک زبانی روایات کی وجہ سے معنوی تحریف کے امکان کا تعلق ہے ، اس کا سوال ہی پیدا نہیں ہوتا۔
اب دیکھئے امام احمد بن حنبل (رحمۃ اللہ) کا سن 240 ھجری ہے۔ بعینہ صحیفہ مذکور اور مسند احمد بن حنبل میں تقریباً 200 سال کا عرصہ حائل ہے۔ اور دو سو سال کے عرصے میں صحیفہ ہمام بن منبہ کی روایات زیادہ تر زبانی روایات کے ذریعے ہی امام موصوف تک منتقل ہوتی رہیں۔ اب دونوں تحریروں میں کمال یکسانیت کا ہونا کیا اس بات کا واضح ثبوت نہیں کہ زبانی روایات کا سلسلہ مکمل طور پر قابل اعتماد تھا۔
صحیفہ کی اشاعت اور تقابل کے بعد دو باتوں میں ایک بات بہرحال تسلیم کرنا پڑتی ہے :
1 : زبانی روایات ، خواہ ان پر دو سو سال گزر چکے ہوں ، قابل اعتماد ہو سکتی ہیں۔
2 : یہ کہ کتابتِ حدیث کا سلسلہ کسی بھی وقت منقطع نہیں ہوا۔
(بحوالہ : آئینۂ پرویزیت ، ص:533-534)

جامعہ الازہر کے معروف عالم ڈاکٹر رفعت فوزی عبدالمطلب اس مطبوعہ صحیفے کی تحقیق ، تخریج اور شرح کا کام کر رہے تھے اور وہ آدھا کام مکمل کر چکے تھے ، حسن اتفاق ایسا ہوا کہ "دارالکتب المصریہ" سے ایک اور مخطوطہ ان کے ہاتھ لگ گیا جو سن 557 ھجری کا مکتوب تھا۔
اس مخطوطے میں ان دونوں کے مقابلے میں ایک حدیث زائد ہے اور یہ زائد حدیث مسند احمد میں شامل صحیفے کی احادیث میں بھی موجود ہے۔ اب ڈاکٹر رفعت فوزی نے اسی مصری مخطوطے کو بنیاد بنا کر کام مکمل کیا۔ اسے "المکتبہ الخانجی" نے پہلی مرتبہ ستمبر 1985ء (بمطابق محرم الحرام 1406ھ) میں قاہرہ سے شائع کیا۔

صحیفہ ہمام بن منبہ کی 139 احادیث کی تفصیل کچھ یوں ہے :
61 - عقائد و ایمانیات
46 - عبادات
9 - معاملات
17 - اخلاقیات
9 - متفرقات
12 - احادیث قدسیہ

***

صحیفہ ہمام بن منبہ (عربی) ، ویکی سورس پر : الصحيفة الصحيحة - همام بن منبه
///
عربی پی۔ڈی۔ایف (12 میگابائٹس) ، المحقق: رفعت فوزي عبد المطلب - ڈاؤن لوڈ
///
صحیفہ ہمام بن منبہ (اردو ترجمہ) ، کتاب و سنت لائیبریری پر : ۔۔۔۔۔۔۔
اردو ترجمہ و شرح : حافظ عبداللہ شمیم
صفحات : 490
پی۔ڈی۔ایف فائل سائز : قریب 11 میگابائٹس
ڈاؤن لوڈ لنک : صحیفہ ہمام بن منبہ

غرورِ زہد نے سکھلا دیا ہے واعظ کو ۔۔۔۔

2011-10-14T00:26:00.001+03:00

ابھی کچھ دن پہلے ایمیل سے کسی کا ایک سوال یوں موصول ہوا کہ :
کیا امر بالمعروف و نھی عن المنکر کا فریضہ ہر مسلمان پر لاگو ہوتا ہے؟ اور اگر ہاں تو اس کے شرعی آداب و شرائط کیا ہیں؟

اس موضوع پر ہر چند کہ ایک طویل عرصہ سے راقم الحروف نے مراسلات تحریر کئے ہیں۔ جن میں سے چند ایک یہ ہیں :

نیکی کی تلقین اور برائی سے روکنے کا فرض
بےشک یہ بات درست نہیں کہ خود سراسر بےعمل ہو کر دوسروں کو نصیحتیں کرتے جائیں۔ لیکن اس کا یہ مطلب بھی نہیں کہ "امر بالمعروف و نھی عن المنکر" کا فریضہ اسلیے چھوڑ دیا جائے کہ خود ہم "بےعمل" ہیں۔
امام ابوبکر الرازی الجصاص علیہ الرحمة فرماتے ہیں : ۔۔۔ جو شخص تمام نیکیاں بجا نہیں لا سکتا ، اور تمام برائیوں سے اجتناب نہیں کر سکتا ، اس پر سے بھی نیکی کا حکم دینے اور برائی سے روکنے کا واجب ساقط نہیں ہوتا۔

کیا عالم بےعمل کو تبلیغ کا حق حاصل نہیں ہے؟
حضرت حسن (رحمة اللہ علیہ) نے مطرف بن عبداللہ (رحمة اللہ علیہ) سے کہا: "اپنے ساتھیوں کو نصیحت کیجئے"۔
مطرف بن عبداللہ (رحمة اللہ علیہ) نے جواباً کہا : "میں ڈرتا ہوں کہ وہ بات کہہ نہ دوں جس کو میں خود نہیں کرتا"۔
یہ سن کر حضرت حسن (رحمة اللہ علیہ) کہنے لگے : "اللہ تعالیٰ آپ پر رحم فرمائے۔ ہم میں کون ایسا ہے جو وہ (سب کچھ) کرتا ہے ، جو وہ کہتا ہے؟ شیطان اسی بات کے ساتھ اپنا مقصد حاصل کرنا چاہتا ہے ، (تاکہ) پھر کوئی نیکی کا حکم نہ دے اور نہ ہی برائی سے روکے"۔

جب بھی قرآن و سنت کے حوالے سے کوئی اچھی بات کہی جاتی ہے تو لوگ اس کا رخ بدل کر پاکستان یا عالَمِ اسلام کے مسلمانوں کی دگرگوں حالاتِ زار کی طرف موڑ دیتے ہیں یا پھر کہنے والے کی دیگر برائیوں کا اظہار شروع کر دیتے ہیں تاکہ قاری یا سامع کا ذہن بٹ جائے۔۔
اب یہ تو اللہ ہی بہتر جانتا ہے کہ اس طرح کے طرزِ عمل کا حقیقی سبب کیا ہے؟
ویسے کسی نے یہ بات شاید بہت اچھی اور معقول کہی ہو کہ ۔۔۔۔

جو لوگ افراد ، ممالک یا گروہ و طبقہ جات کی انفرادی برائیوں پر کڑی نظر رکھتے ہیں اور ان برائیوں کا برسرعام اظہار کر کے ان کی ذات کو نشانہ بناتے ہیں اور سمجھتے ہیں کہ اس طرح وہ تبلیغ دین کے اہم فریضے کو پورا کر رہے ہیں ۔۔۔ تو دراصل وہ تبلیغ کے پردے میں اپنے انتقامی جذبے کو تسکین پہنچانا چاہتے ہیں۔

ورنہ تو اسوۂ حسنہ سے ایسی تعلیمات ہمیں کہیں نہیں ملتیں کہ "نھی عن المنکر" کے بہانے کرید کرید کر مخالفین کی کمزوریاں تلاش کی جائیں اور انہیں اس حوالے سے ذاتی طور پر رسوا کیا جائے۔
ہر ناقص بات جو ذہن میں آئے ، ہر منفی سوچ جس پر نفس اکسائے ، ہر برا رویہ جو مشتعل کرے ۔۔۔۔ ضروری نہیں ہے کہ اسے بیان بھی کیا جائے چاہے "نھی عن المنکر" کے نام پر یا چاہے مظلومیت کے ناتے سہی۔
اگر ہر خرابی بیان کرنے والی ہوتی تو خود نبی کریم (صلی اللہ علیہ وسلم) کو اللہ عز و جل کی طرف سے اُس وقت ٹوکا نہ جاتا (آل عمران : 128) جب آپ (صلی اللہ علیہ وسلم) کفار پر لعنت کر رہے تھے۔ جب کفار پر لعنت کرنے سے رب عظیم نے منع کیا تو ٹھنڈے دل سے سوچنا چاہئے کہ ہم کیسے مسلمان ہیں کہ اپنے ہی بھائی کا گوشت نوچنے سے باز نہیں آتے!

ان تمام کاموں سے بہتر کام تو نبی صلی اللہ علیہ وسلم کی وہ سنت ہے جو واشگاف الفاظ میں یوں بیان ہوئی ہے :
من ستر مسلما ستره الله في الدنيا والآخرة والله في عون العبد ما كان العبد في عون أخيه
جو شخص کسی مسلم پر پردہ ڈالے اللہ تعالیٰ اس پر دنیا اور آخرت میں پردہ ڈالے گا اور اللہ تعالیٰ بندے کی مدد میں (رہتا) ہے جب تک بندہ اپنے بھائی کی مدد میں (رہتا) ہے۔
صحیح مسلم ، کتاب الذکر والدعاء والتوبۃ

نیتوں کا اخلاص صرف یہ نہیں ہوتا کہ قرآن و سنت کی باتیں زبانی کلامی قلمی کہہ دی جائیں یا آگے فارورڈ کر دی جائیں یا ایمیل سرکلر بھیج دیا جائے یا بلک ایس۔ایم۔ایس سے استفادہ کر لیا جائے ۔۔۔ بلکہ کم از کم تحریر کی حد تک عمل بھی یوں ہو کہ کسی لفظ / فقرے سے کسی پڑھنے والے کا دل نہ دکھے اور وہ یہ نہ سمجھے کہ بھری محفل میں اشارے کنایے سے اس کو مذاق کا نشانہ بنایا جا رہا ہے۔

صحیح بخاری سے ایک سبق آموز واقعہ پڑھئے۔ ہرچند کہ رسول اللہ صلی اللہ علیہ وسلم نے عمومی طور پر شرابیوں پر لعنت بھیجی ہے۔ لیکن جب ۔۔۔۔۔۔
ایک شرابی کو کئی بار پکڑ کر رسول اکرم (صلی اللہ علیہ وسلم) کے سامنے لایا گیا تو ایک شخص بالآخر بول اٹھا کہ :
اس پر اللہ کی لعنت کہ بار بار پکڑ کر دربارِ رسالت میں پیش کیا جاتا ہے ۔
رسولِ کریم (صلی اللہ علیہ وسلم) نے یہ سنتے ہی فرمایا :
اسے لعنت نہ کرو۔ کیونکہ یہ اللہ اور اس کے رسول (صلی اللہ علیہ وسلم) سے محبت کرتا ہے۔

اللہ کے نبی (صلی اللہ علیہ وسلم) تو "ام الخبائث" کے شکار فرد کو اس کی برائی کے باوجود اسے ملعون کہنے سے منع فرماتے ہیں اور ایک ادھر ہم ہیں کہ معمولی معمولی سی ذاتی رنجشوں یا کچھ مسلکی نظریاتی اختلافات کے سہارے ایک دوسرے کی بےمحابا توہین و تضحیک سے باز نہیں آتے۔

ملت کا درد رکھنے والے علامہ اقبال نے شاید ایسے ہی واعظ و مبلغ کے لیے فرمایا تھا کہ :

کوئی یہ پوچھے کہ واعظ کا کیا بگڑتا ہے
جو بے عمل پہ بھی رحمت وہ بے نیاز کرے
غرور زہد نے سکھلا دیا ہے واعظ کو
کہ بندگان خدا پر زباں دراز کرے

اللہ رب العزت سے دعا ہے کہ وہ ہمیں اعلیٰ ظرفی ، کشادہ دلی اور وسیع الذہنی عطا فرمائے اور قرآن و سنت کی حقیقی تعلیمات کے علم و عمل سے نوازے ، آمین۔

۔۔۔ وہ دل اندھے ہوجاتے ہیں جو سینوں میں ہیں

2011-09-25T15:10:00.002+03:00

نیٹ پر کسی جگہ ایک دینی علمی مضمون پڑھ رہا تھا ، اچانک خیال آیا کہ کچھ الفاظ و فقروں کے الٹ پھیر سے ایک اور نقطہ نظر کو واضح کیا جا سکتا ہے۔ اعجاز الدین عمری صاحب کے شکریے کے ساتھ راقم کی طرف سے تبدیل شدہ عبارت ملاحظہ فرمائیں ۔۔۔

فکر و نظر اپنے بطن میں انمول جواہر رکھتے ہیں مگر مسئلہ یہی ہے کہ ہر کوئی اس سے غافل ہے! شاید کسی نے سچ کہا ہو کہ ہر نادان کو یہاں دانائی کا غرور ہے ، ہر بےخبر کو اپنی بیداری کا دعویٰ ہے۔
چند مخصوص قسم کی کتابیں اپنے محدود ذوق کے سہارے کیا پڑھ ڈالیں ، بندہ سمجھتا ہے کہ وہ علم میں ماہر ہو گیا ، علامہ بن گیا ، علماء و فضلاء سے کچھ اتنا آگے بڑھ گیا کہ ببانگ دہل کہنے لگ گیا کہ ۔۔۔۔
کہتا ہوں سچ کہ جھوٹ کی عادت نہیں مجھے !!
حالانکہ جھوٹ اور سچ کے مابین فرق کرنے والی لکیر ایک زمانے سے جو واضح چلی آتی ہے ، تنگ پگڈنڈیوں سے گزرنے والا یہ راہی اس سے واقف ہی نہیں ہوتا۔

بات یہ ہے کہ جو طالب علم کسی گھٹی گھٹی سی کوٹھری کے دقیانوسی ماحول کا عادی ہو اسے وسیع اور اجلی روشن علمی دنیا کے مناظر بھی دھندلے دھندلے سے نظر آتے ہیں۔ اپنے محدود ، غیر مصدقہ اور کچے علم کا ماتم کرنے کے بجائے وہ دوسروں کی قسمت کو روتا ہے ، دوسروں کے علم کو نشانہ بناتا ہے۔
یہ کم علم نہیں جانتا کہ اس بازارِ حیات میں اسرارِ علم سے صرف وہ واقف نہیں بلکہ وہ بھی واقف ہیں جن کے نطفے کے سہارے وہ اس دنیا میں وارد تو ہوا مگر دعویٰ یہ ٹھوک ڈالا کہ پانی کے ایک قطرے سے علم کے سمندر تک عروج پانے کے اسرار و رموز آپ نہیں جانتے بلکہ آپ کے بالمقابل میں زیادہ بہتر جانتا ہوں۔
اور کبھی اپنے اساتذہ سے الجھ پڑا کہ ۔۔۔۔ ہم آپ کے مقلد نہیں کہ آپ کی ہر بات کو قرآن و سنت پر پیش کئے بغیر اسے قبول کریں ۔۔۔ حالانکہ یہ نادان بھول گیا کہ کسی بات کو قرآن و سنت پر پیش کرنے کے لیے "قرآن و سنت" کا وہ علم بھی درکار ہے جس کے پیچھے اس کے قابل و فاضل اساتذہ نے ایک عمر گزار ڈالی۔
کبھی نعرہ لگایا کہ یہ علامہ یہ امام یہ مولوی اسلام کی تبلیغ نہیں کرتا بلکہ "اسلام دشمن" ہے۔ یعنی اپنی ہی سوچ کو اس نے اسلام کی توضیح و تشریح کا پیمانہ قرار دے دیا کہ جو "اسلام" اس کی سمجھ میں آئے ، اس کی کسوٹی پر اگر فلاں فلاں پورا اترتا ہے تو بالکل ٹھیک ! یہ اسلام دوست ہے ! ورنہ اسے دائرۂ اسلام سے نکال باہر کرو ، یہ کافر تو نہیں البتہ "اسلام دشمن" ضرور ہے! اب چاہے دنیائے علم و فن کے ماہرین لاکھ سر پٹخ لیں کہ فلاں فلاں مولوی علامہ یا امام کی علمیت و فضلیت پر دنیائے علم کے محققین و ماہرین نے تصدیق کی مہرِ زرین ثبت کر رکھی ہے۔
مگر بھئی ! اسلام تو وہ ہے جو میری سمجھ میں آئے اور اس کی بنیاد پر ہی فیصلہ کیا جا سکے گا کہ کون "اسلام دوست" ہے اور کون "اسلام دشمن"؟
باقی جائیں بھاڑ میں ، ہم کوئی ان کے مقلد ہیں؟

راہِ حیات کے ہر موڑ پر، بشر کے سفر کے ہر نقشِ قدم میں "فریبِ مطالعہ" کے ڈسے ہوئے لوگ کہیں نہ کہیں ایسے مل ہی جاتے ہیں جن کی نگاہِ دل پر تالا ہے اور سر کی آنکھوں پر وہم و گماں کا مایا جال ہے ۔۔۔۔

قرآن نے فرمایا ہے ۔۔۔۔۔
أَفَلَمْ يَسِيرُوا فِي الأَرْضِ فَتَكُونَ لَهُمْ قُلُوبٌ يَعْقِلُونَ بِهَا أَوْ آذَانٌ يَسْمَعُونَ بِهَا فَإِنَّهَا لاَ تَعْمَى الأَبْصَارُ وَلَكِن تَعْمَى الْقُلُوبُ الَّتِي فِي الصُّدُور
کیا یہ لوگ زمین میں چلے پھرے نہیں ہیں کہ اِن کے دل سمجھنے والے اور اِن کے کان سُننے والے ہوتے؟ حقیقت یہ ہے کہ آنکھیں اندھی نہیں ہوتیں مگر وہ دل اندھے ہوجاتے ہیں جو سینوں میں ہیں۔ (ترجمہ : سید مودودی)

ہاں ! کتنا سچ کہا میرے رب کے کلام نے !!
فکر و نظر کی بلوغت کو نہ پانے والے ، کثرت مطالعہ کو اپنا شغل نہ بنانے والے ، علم و فن کے ماہرین کی متفقہ آراء کو جھٹلانے والے ۔۔۔ کتنے بودے ہوتے ہیں۔
یہ ہی تو ہیں جنہیں قرآن نے "دل کے اندھے" کا لقب عطا کیا ہے۔

رمضان کریم - 1432ھ / 2011ء

2011-07-31T15:27:00.001+03:00

سعودی عرب میں ان شاءاللہ رمضان 1432ھ ، یکم اگست 2011ء سے شروع ہوگا۔
اللہ تعالیٰ ہم تمام کو اس مبارک مہینے کی رحمتوں اور برکتوں سے فیضیاب ہونے کے زیادہ سے زیادہ مواقع نصیب فرمائے ، آمین۔
آپ تمام کو رمضان کریم کی نیک ساعتیں مبارک ہوں۔

طواف کیا ہے ؟

2011-07-26T10:21:00.002+03:00

اس موضوع پر پروفیسر اختر الواسع (صدر شعبہ علوم اسلامی ، جامعہ ملیہ اسلامیہ ، نئی دہلی) کے ایک طویل مضمون کا مفید اقتباس ذیل میں ملاحظہ فرمائیں۔

طواف کے لغوی معنی گھومنے اور چکر لگانے کے ہیں۔ اسلامی اصطلاح میں اس سے مراد وہ رسم ہے جس میں خانہ کعبہ کے چاروں طرف گھوم کر دعائیں مانگی جاتی ہیں۔ نبی کریم صلی اللہ علیہ وسلم نے طواف کو نماز قرار دیا ہے اس فرق کے ساتھ کہ جناب رسالت مآب (صلی اللہ علیہ وسلم) کے الفاظ میں :
الطواف حول البيت مثل الصلاة إلا أنكم تتكلمون فيه ، فمن تكلم فيه ، فلا يتكلمن إلا بخير
جامع الترمذي , كتاب الحج , باب ما جاء في الكلام في الطواف (علامہ البانی نے صحیح قرار دیا)

{الاسلام سوال و جواب کے اس فتویٰ کا مطالعہ بھی مفید ثابت ہوگا -- کیا طواف اورسعی کے لیے طہارت شرط ہے؟}

خانہ کعبہ کے طواف کا حکم خود اللہ رب العزت نے سورہ حج میں اس طرح دیا ہے کہ :
وَلْيَطَّوَّفُوا بِالْبَيْتِ الْعَتِيق
اس بیت عتیق یعنی پرانے گھر کا طواف کرو
( الحج:22 - آيت:29 )

طواف وہ خاص اور نرالی عبادت ہے جو صرف اور صرف خانہ کعبہ کے اطراف ہی ادا کی جا سکتی ہے۔ دن اور رات کا کوئی لمحہ ایسا نہیں جس میں طواف جاری نہ رہتا ہو۔ کسی موسم کی سختی اور شدت مشتاقانِ دید کے جذبۂ طواف کو ماند نہیں کر پاتیں۔ جب توحید الٰہی کے پرستار انتہائی وارفتگی اور شوق کے ساتھ سیاہ غلاف میں ملفوف اس گھر کا دیوانہ وار چکر کاٹتے ہیں تو ایسا کرتے وقت رنگ ، نسل ، زبان ، علاقے ، معاشی ثروت و عسرت ، سماجی برتری و کمتری انتہا یہ کہ جنس کی تفریق و تمیز سب اٹھ جاتی ہے۔

طواف انتہائی اہم عبادت ہے۔
طواف ایک علامت بھی ہے اور ایک پیغام بھی۔
طواف اس بات کی علامت ہے کہ بندہ جس طرح پروانہ وار ایک مکعب کا طواف کر رہا ہے ، اس کے گرد چکر لگا رہا ہے اس کی ہر گردش کا مرکز و محور وہ ایک گھر ہے۔
اسی طرح اس کی پوری زندگی ، اس کی نیت ، اس کے ارادے ، اس کی خواہشات ، اس کی توقعات ، اس کے سہارے اور اس کی ہر فکر ہمہ وقت اس احکم الحاکمین کی مرضی اور رضا کے گرد چکر لگائے ، جس کے حکم پر وہ ظاہری طور پر اس گھر کے چکر لگا رہا ہے۔ یہ علامتی چکر اس کی زندگی کی حقیقت کو تبدیل کر کے اللہ واحد کی مرضی کا تابع فرمان ہو جائے۔

طواف جس طرح ظاہری و باطنی ہر اعتبار سے کامل خود سپردگی اور اطاعت شعاری کی علامت ہے اسی طرح اس میں اقوام عالم کے لیے ایک پیغام بھی چھپا ہے۔ یہ مرکز عالم دنیا کا واحد نکتہ ہے جہاں توحیدِ ربانی کا ایک عملی مشاہدہ کیا جا سکتا ہے ، جہاں دنیا و جہاں سے گورے ، کالے ، مرد و عورت جمع ہوتے ہیں اور اپنے تمام فرق کو مٹا کر ایک ہی گھر کے گرد دیوانہ وار گھومتے ہیں۔ ایسا محسوس ہوتا ہے جیسے انسانوں کا سمندر ہے جو ایک خاص دائرے میں بھنور بنائے ہوئے ہے۔ یہ اقوام عالم کے لیے ایک پیغام ہے کہ :
آؤ ! توحیدِ خالص کے اس عملی مظاہرے کو دیکھو کہ کس طرح لاکھوں انسان ایک ہی مرکز کے گرد گھوم رہے ہیں۔

طواف دراصل کامل اطاعت الٰہی اور اس کے سامنے باطنی خود سپردگی کا ایک عملی اظہار ہے۔ بندہ کے قدم مطاف کے راستے پر ایک ہی دائرے میں گامزن رہتے ہیں۔ اس کا دل جذبۂ اطاعت و انقیاد سے سرشار رہتا ہے اور زبانِ حال و زبانِ قال دونوں سے وہ کہہ رہا ہوتا ہے کہ :

اے پروردگارِ پاک ! تمام تعریفیں تجھ کو ہی سزاوار ہیں ، تو ہی عبادت کے لائق ہے ، تو سب سے بڑا ہے ، تیرے سوا کسی کو کوئی طاقت و قدرت حاصل نہیں ، میں تجھ پر ایمان رکھتا ہوں ، تیری کتاب کی تصدیق کرتا ہوں ، تیرے رسول (صلی اللہ علیہ وسلم) کی سنت کا اتباع کرتا ہوں۔
اے اللہ تعالیٰ ! بےشک یہ تیرا گھر ہے یہ تیرا حرم ہے اور یہاں تیری طرف سے امن و سلامتی قائم ہے ، یہاں تیرے بندے تیرے دربار میں حاضر ہیں۔ اے اللہ تعالیٰ ! میں بھی تیرا بندہ ہوں ، یہ مقام جہنم کی آگ سے پناہ مانگنے والوں کا مقام ہے۔ اے اللہ تعالیٰ ! تو ہمارے جسم کو جہنم کے لیے حرام کر دے اور ہمارے دلوں کو ایمان کی محبت سے مالا مال کر دے ، ہمارے دلوں کو ایمان سے مزین فرما اورکفر ، فسق اور نافرمانی کو ہمارے لیے قابل نفرت بنا دے اور ہم کو نیک لوگوں میں سے بنا دے !!

الوداع انٹرنیٹ اکسپلورر:6

2011-07-20T14:42:00.002+03:00

اگر آپ ورڈپریس ویب ڈیولوپر ہیں تو آپ کے لئے ایک اطلاع ہے۔
اچھی یا بری جو بھی سمجھ لیں۔
ورڈپریس نے گذشتہ چند ہفتہ قبل انٹرنیٹ اکسپلورر ورژن 6 کے لیے اپنی مطابقت (compatibility) کو ختم کر دیا ہے۔ اب ورڈپریس (ورژن 3.2) سے انٹرنیٹ اکسپلورر براؤزر کے لیے کوئی سپورٹ (support) نہیں دی جائے گی۔
ورڈپریس تازہ ترین ورژن 3.2 کے ڈیش بورڈ کی جھلک ملاحظہ فرمائیں ۔۔۔

اور حیرت انگیز مگر مزیدار بات یہ ہے کہ مائیکروسافٹ نے ورڈپریس کے اس عمل پر اپنا ردّعمل پیش کرتے ہوئے ورڈپریس کا فوری طور پر شکریہ ادا کیا ہے :
Thank you, WordPress! Who’s Next?

بات یہ ہے کہ خود مائیکروسافٹ کے بقول انہوں نے دس سالہ پرانے اپنے اس براؤزر (انٹرنیٹ اکسپلورر ورژن 6) کے خلاف مہم چلا رکھی ہے کہ اسے اب انٹرنیٹ کی دنیا سے ہٹا دیا جائے۔ حتیٰ کہ اس مہم کے سلسلے میں ایک خصوصی سائیٹ بھی ترتیب دی گئی ہے ، ملاحظہ فرمائیں :
The Internet Explorer 6 Countdown

انٹرنیٹ اکسپلورر 6 مخالف سائیٹ کے مطابق ڈنمارک اور سویڈن دو ایسے ممالک ہیں جہاں اس براؤزر کا استعمال ایک فیصد سے بھی کم ہے۔ سب سے زیادہ استعمال چین (33 فیصد) ، جنوبی کوریا (21 فیصد) اور انڈیا (10 فیصد) میں کیا جا رہا ہے
(بمطابق جون 2011ء ڈیٹا بحوالہ نیٹ اپلی کیشنز)

شکر ہے کہ انٹرنیٹ اکسپلورر 6 براؤزر آہستہ آہستہ اپنی زندگی کے خاتمے کی سمت رواں دواں ہے۔ ورنہ تو ویب ڈیولوپرز کی جان عذاب میں تھی کہ اپنے قیمتی وقت کا اچھا خاصا حصہ اس براؤزر کی مطابقت کے پیچھے برباد کرنے کی مجبوری میں گرفتار تھے۔

دیوقامت جناح [بمقابلہ] بونے سیاستداں

2011-06-06T16:07:00.001+03:00

جاوید اقبال کے ایک پرانے کالم سے ۔۔۔۔۔

مجھے مکہ مکرمہ کے ایک دوست نے فون کر کے قصہ سنایا۔ کہانی یوں ہے کہ رمضان المبارک (2008ء) کے آغاز پر مکہ مکرمہ میں کام کرنے والی بجلی کی ایک کمپنی کو حکم ملا کہ پاکستان کے ایک عالیجناب وزیر 21 تا 23 رمضان عمرہ کے خواہشمند ہیں اس لئے ان کیلئے کسی ہوٹل میں کمرے مخصوص کرائے جائیں۔ ان دنوں خاصا اژدھام تھا اسلئے ایک فور اسٹار ہوٹل میں ہی کمرے ملے۔ پاکستان میں وزارتی حکام یہ سنتے ہی سیخ پا ہو گئے۔ چنانچہ دوبارہ بھاگ دوڑ کر کے ہوٹل تبدیل کیا گیا اور فائیو اسٹار صفا ٹاور میں چار ہزار ریال فی کمرہ روزانہ کے نرخ پر کمرے حاصل کئے گئے۔ اب بہتر تھا کیونکہ "پاکستان ہاؤز" یقیناً عالیجناب اور ان کے اسٹاف کے قابل نہ تھا اگرچہ ماضی میں وزراء وہاں ٹھہرتے رہے تھے۔
لیکن ۔۔۔ ایک مسئلہ ہو گیا۔ ملک میں بجلی کے بحران نے عالی جناب کو انتہائی مشغول کر دیا چنانچہ وہ خود تشریف نہ لا سکے البتہ ان کی بیگم صاحبہ اپنے 16 عدد اعزاء و اقارب کے ہمراہ پہنچ گئیں۔ ہوٹل کی ریزرویشن ضائع نہ گئی۔ معزز مہمانوں نے تین دن اور تین راتیں نہایت خضوع و خشوع سے نوافل ادا کئے۔ ملک کی سلامتی کیلئے گریہ و زاری کی۔ مداحوں سے تحائف وغیرہ وصول کئے اور طوعاً و کرہاً شاپنگ بھی کی۔ 24/ رمضان کی صبح باون (52) ہزار ریال کا کمروں کا کرایہ اور تقریباً پچپن (55) ہزار ریال متفرق اخراجات حکومت پاکستان کے کھاتے میں ڈال کر روزہ داروں کا یہ قافلہ عازم وطن ہوا اور ابھی اس میں وہ رقم شامل نہیں ہے جو اس کاروانِ حجاز کے ٹکٹوں کی مد میں قومی ہوائی کمپنی کو وزارت پاکستان ادا کرے گی۔

اب آئیے ، تصویری البم کے کچھ اوراق پیچھے پلٹائیں ۔۔۔۔۔

گورنر جنرل کا عہدہ سنبھالنے کے بعد جب محمد علی جناح مشرقی پاکستان کے دورے پر تشریف لے جانے لگے تو ان کے پاس وہی پرانا دقیانوسی ڈکوٹا جہاز تھا جو تقسیم ہند کے وقت گورنر جنرل پاکستان کے حصے میں آیا تھا۔ ڈھاکہ کے سفر کے لئے اسے راستہ میں تیل لینے کے لئے دہلی میں پالم پور کے ہوائی اڈے پر لازماً اترنا تھا مگر قائد اعظم نے سرزمین ہند پر قدم رکھنا گوارا نہ کیا اور فرمایا کہ ایسا انتظام ہو کہ جہاز بغیر اترے سیدھا چلا جائے۔
اب سیدھی پرواز کے۔ایل۔ایم کی جاتی تھی۔ اور معلوم ہوا کہ مخصوص پرواز پر تقریباً سات لاکھ روپے خرچ ہوں گے۔ سرکاری خزانہ اس وقت خالی تھا۔ کسی سے اس ضرورت کیلئے روپیہ مانگنا ویسے ہی قائد اعظم کی غیرت خودداری نے گوارا نہ کیا۔ نہ ہی انہوں نے آرام و آسائش پر ٹیکس دہندگان کے گاڑھے پسینے کے کمائی کا ایک پیسہ خرچ کرنا مناسب سمجھا۔
آخر سوچ بچار کے بعد قائد اعظم نے تجویز کیا کہ ڈکوٹا جہاز میں پٹرول کی ایک مزید ٹنکی لگا دی جائے تاکہ اسے راستے میں تیل لینے کی ضرورت نہ پڑے اور وہ ایک ہی پرواز میں منزل مقصود پر پہنچ جائے۔ ماہرین چیختے اور سر پیٹتے ہی رہے۔ لیاقت علی خان کی بھی ایک نہ چلی۔ قائد اعظم پروگرام کے مطابق کراچی سے لاہور تشریف لے گئے۔ وہ اسی فرسودہ ڈکوٹا پر انتہائی خطرہ مول لے کر مشرقی پاکستان کے پہلے اور آخری دورے پر گئے اور بخیریت واپس لوٹے۔

کند ہو کر رہ گئے مومن کے اخلاق و معاشرت

2011-05-30T12:21:00.002+03:00

عقائد
عبادات
معاشرت
معاملات
اخلاقیات

شریعت اسلامی کے وہ پانچ شعبے ہیں جو عمل کے لحاظ سے مطلوب و مقصود ہیں۔
ایک مسلمان ان پانچوں شعبوں میں اسلامی تعلیمات پر عمل کا پابند ہے۔

اسلامی شریعت کو اختیار کرنے کا آخر مطلب کیا ہے؟
صاف اور سیدھا مطلب تو قرآن کریم نے ہمیں یوں بتایا ہے :
اسلام میں پورے کے پورے داخل ہو جاؤ۔
( البقرہ : 208 )

"پورے کے پورے" داخل ہونے کا واضح مطلب یہ ہے کہ آدمی کل شریعت کو اختیار کرے اور زندگی کے تمام شعبوں میں دین کو لاگو کرے۔
ایسا نہیں ہو سکتا کہ کوئی صرف "عقائد" و "عبادات" کو یہ سوچ کر اپنا لے کہ یہ دین کی بنیاد ہیں اور دیگر شعبوں کو نظرانداز کر دے اور خود کو "اہل حق" باور کر لے ۔۔۔ خود کو جنت اور دیگران کو جہنم کا حقدار سمجھ لے۔
دین کے کسی بھی شعبے کو کمتر سمجھنا یا زیادہ اہمیت کے قابل نہ سمجھنا ۔۔۔ ایمان و عمل کی کمزوری تو ہے ہی ، حدیث و سنت سے بھی دوری ہے۔

ہم میں سے اکثریت کا مسئلہ یہ ہے کہ ہم نے کچھ عقائد کو بنیاد کے طور پر سمجھ لینے اور کچھ عبادات کو عادات کے طور پر ادا کر لینے کو اپنا دین و ایمان باور کر لیا ہے۔
کسی دوست نے ایک جگہ نہایت اچھی بات لکھی تھی کہ :

ایک مسلمان بظاہر نمازوں کا بڑا اہتمام کرتا نظر آتا ہے ، ذکر و تلاوت کا بھی اہتمام ہے ، عقائد و ایمان کی پختگی ہے ، امر بالمعروف و نہی عن المنکر کے فریضہ پر بھرپور عمل ہے ، اسلامی وضع قطع کو بھی ملحوظ رکھتا ہے ، لیکن اس کی معاشرت و معاملات درست نہیں ہوتے ، اپنے اہل و عیال ، دوست احباب ، رشتہ دار پڑوسی اس سے نالاں رہتے ہیں ، وہ جب معاملہ کرتا ہے تو وعدہ خلافی اور دھوکہ دہی سے کام لیتا ہے۔
ظاہر ہے کہ ایسے شخص نے دین کے صرف ایک حصہ کو "کل دین" سمجھ رکھا ہے۔ دین اس کے نزدیک صرف عقیدہ و عبادت کا نام ہے۔ حالانکہ دیکھا جائے تو وہ "عبادات" میں سب سے بڑا ناقص ہے ، اس لیے کہ عبادات میں بھی اللہ تعالیٰ نے ایسی تاثیر رکھی ہے کہ اگر کوئی انہیں صحیح ڈھنگ اور روح کے ساتھ ادا کرنے لگے تو اس سے اس کی معاشرت اور اخلاق درست ہو جاتے ہیں۔

آج اگر ہم اپنی اپنی آن لائن اور آف لائن زندگیوں کا مشاہدہ کر لیں تو جابجا ایسی ہی صورتحال نظر آتی ہے۔
کتنے ہی ایسے لوگ اور ایسے گروہ ہیں جنہیں اپنے پختہ عقائد یا کامل دینداری پر اصرار ہوتا ہے ، وہ خود کو جنت کے اولین مستحق سمجھتے ہیں ۔۔۔
مگر جب ان کی زندگیوں اور روزمرہ کے معمولات کا جائزہ لیا جائے تو انکشاف ہوتا ہے کہ فلاں کی معاشرت غیر اسلامی ہے ، یا اگر معاشرت درست ہے تو معاملات و اخلاقیات کے شعبہ میں وہ کمزور ہے ۔۔۔۔

حالانکہ نبی (صلی اللہ علیہ وسلم) نے تو فرمایا ہے :
الْمُسْلِمُ مَنْ سَلِمَ الْمُسْلِمُونَ مِنْ لِسَانِهِ وَيَدِهِ (صحيح بخاري)
کامل مسلمان وہ ہے جس کی زبان اور جس کے ہاتھ سے دوسرے مسلمان اور انسان محفوظ رہے۔
اور فرمایا :
الَّذِي لَا يَأْمَنُ جَارُهُ بَوَايِقَهُ (صحيح بخاري)
بخدا وہ شخص مومن نہیں ہو سکتا (سہ مرتبہ عرض فرمایا) جس کی تکلیفوں سے اس کا کوئی پڑوسی محفوظ نہ ہو۔

اور ۔۔۔۔
قرآن تو اہل ایمان کو مخاطب کر کے تاکید کرتا ہے کہ وہ اسلام میں پورے کے پورے داخل ہو جائیں۔
ياأيها الذين آمنوا ادخلوا في السلم كآفة ولا تتبعوا خطوات الشيطان إنه لكم عدو مبين
اے ایمان والو ! اسلام میں پورے پورے داخل ہو جاؤ اور شیطان کے نقش قدم پر نہ چلو ، بلاشبہ وہ تمہارا کھلا دشمن ہے۔

صاحبِ "معارف القرآن" مولانا مفتی محمد شفیع صاحب علیہ الرحمۃ اس آیب کی تفسیر میں لکھتے ہیں :

اس آیت میں ان لوگوں کے لیے بڑی تنبیہ ہے جنہوں نے اسلام کو صرف مسجد اور عبادات کے ساتھ مخصوص کر رکھا ہے ، معاملات اور معاشرت کے احکام کو گویا دین کا جز ہی نہیں سمجھتے۔ اصطلاحی دین داروں میں یہ غفلت عام ہے ، حقوق و معاملات اور خصوصاً معاشرت سے بیگانہ ہیں۔ ایسا معلوم ہوتا ہے کہ ان احکام کو وہ اسلام کے احکام ہی یقین نہیں کرتے ، نہ ان کو معلوم کرنے اور سیکھنے کا اہتمام کرتے ہیں اور نہ ہی ان پر عمل کرتے ہیں۔

اللہ تعالیٰ سے دعا ہے کہ ہمیں دین کی صحیح سمجھ اور پھر اس پر صدق دلی سے عمل کی توفیق عطا فرمائے ، آمین یا رب العالمین۔

نعرۂ جاہلیت بھی ، نصرتِ اللہ کی امید بھی ؟

2011-05-26T15:49:00.001+03:00

کیا یہ حقیقت نہیں ہے کہ ۔۔۔
ایک انسان تلوار ہاتھ میں رکھتا ہے، لیکن ذہنى طور پر اتنا بزدل ہے کہ اس کے بازو دشمن کے مقابلہ میں تلوار اُٹھا نہیں پاتے تو ایسى تلوار کس کام کى؟
اسی طرح مسلمانوں کے پاس جدید سے جدید ٹیکنالوجى موجود ہو لیکن دشمن کى ایک بڑھک ان کے اوسان خطا کردے تو پھر ایسى ٹیکنالوجى کا کیا حاصل؟
بقولِ شاعر :
أسد عکى وفى الحروب نعامة
هیفاء تصفر من صفیر الصافر
(بیوى اپنے شوہر سے مخاطب ہے: ) میرے اوپر تو شیر بنا پھرتا ہے لیکن جنگ میں شتر مرغ ، کہ ذرا سى آہٹ سے کلیجہ منہ کو آجاتا ہے۔

ٹیکنالوجى علم سے وابستہ ہے۔ عالم اسلام میں جدید علوم کے حصول کے لئے زیادہ سے زیادہ جامعات قائم ہونى چاہئیں لیکن ان جامعات میں سیرت اور اعجازِ علمى سلیبس (syllabus) کا لازمى جزو ہونا چاہئے تاکہ مادّى علوم کے ساتھ ایمان کو بھى جلا ملتى رہے۔

اعجازِ علمى سے ہمارى مراد ہے کہ قرآن و حدیث میں ایسے بہت سے اشارات ملتے ہیں جو سائنسى حقائق کا پتہ دے رہے ہیں۔ رابطہ عالم اسلامى کے صدر دفتر مکہ مکرمہ میں اعجازِ علمى کا مستقل شعبہ قائم ہے جس میں اس موضوع پر سیرحاصل کام ہوچکا ہے۔ ان کے اس کام سے رہنمائى حاصل کى جائے۔ مزید برآں ایسے اساتذہ کا انتخاب ہونا چاہئے جو سائنس کى تعلیم کے ساتھ طلبہ کے سینوں میں ایمان کى مشعلیں بھى فروزاں رکھیں۔
آج ہمارے کتنے عالى دماغ جوہر مغرب میں سائنس کى تعلیم حاصل کررہے ہیں اور کتنے ہى علم کے اعلىٰ مدارج حاصل کرچکے ہیں لیکن دیارِ مغرب کے ملحد ذہنوں سے تربیت پانے کى بنا پر حب ِعاجلہ کا شکار ہیں اور بجائے اوطانِ اسلام کو مضبوط کرنے کے اغیار کى خدمت کررہے ہیں۔ ہمارے کتنے جرنیل مغرب کى عسکرى تربیت گاہوں میں ٹریننگ حاصل کرنے کے بعد معرکہ کفر و ایمان میں اپنى بے اعتقادى، ضعف ایمانى اور کم ہمتى کى بنا پر دشمنوں کے سامنے سپر ڈال چکے ہیں۔ سقوطِ بیت المقدس، سقوطِ ڈھاکہ اور اب سقوطِ بغداد انہى جرنیلوں کى سیہ کاریوں کے نتیجہ میں ظہور پذیر ہوئے۔

اس وقت اُمت ِمسلمہ ستاون (57) ممالک میں سیاسى برترى اور دنیا کے بیشتر ممالک میں اپنا ایک مستقل وجود رکھتى ہے، ہر مسلم ملک ایک اکائى کى حیثیت رکھتا ہے جو دوسرى اکائیوں کے ساتھ مل کر ایک عظیم اتحاد کى شکل اختیارکر سکتا ہے، لیکن سب سے پہلے ہر اکائى کو مضبوط کرنے کى ضرورت ہے۔
ان تمام عوامل کى بیخ کنى لازمى ہے جو ایک وحدت کو پارہ پارہ کرنے کى کوشش میں لگے ہوں، ان میں سرفہرست برادرى ازم، قبائلى عصبیت، علاقائیت، قومیت اور فرقہ واریت ہیں۔ کسى بھى اسلامى ملک کو دیکھ لیجئے، علاقائیت کا عفریت بھائى بھائى کے درمیان نفرت اور عداوت کے بیج بوتا نظر آئے گا۔
صومالیہ میں شمال و جنوب کى کشمکش، پاکستان میں شیعہ و سنى اور صوبائیت پر مبنى تعصبات کى آویزش، بنگلہ دیش میں سلہٹ اور غیر سلہٹى افراد کے درمیان تفاخر کى کیفیت، عراق میں تمام تر مصائب کے باوجود اہل سنت اور اہل تشیع کے درمیان اور پھر عربوں اور کردوں کے درمیان محاذ آرائى، افغانستان میں پختون، ازبک اور تاجک قوموں کے مابین تنافس جو امریکہ کے حملہ کے وقت کھل کر ظاہر ہوچکا، اس امر کى چند نمایاں مثالیں ہیں۔

نبى کریم صلی اللہ علیہ وسلم نے مدینہ میں جو معاشرہ قائم کیا تھا، اس کى بنیاد مہاجرین و انصار کے درمیان اُخوت، محبت اور یگانگت پر رکھى گئى تھى۔مہاجر اور انصار کے دونوں معزز لقب اپنے اپنے اوصافِ حمیدہ کى بنا پر وحى الٰہى میں جگہ پاگئے :
والسابقون الأولون من المهاجرين والأنصار والذين اتبعوهم بإحسان رضي الله عنهم ورضوا عنه وأعد لهم جنات تجري تحتها الأنهار خالدين فيها أبدا ذلك الفوز العظيم
( التوبة:9 - آيت:100 )
اور جو مہاجرین اور انصار سابق اور متقدم ہیں اور جتنے لوگ اخلاص کے ساتھ ان کے پیرو ہیں، اللہ ان سب سے راضى ہوا اور وہ سب اس سے راضى ہوئے اور اللہ نے ان کے لئے ایسے باغ مہیا کررکھے ہیں جن کے نیچے نہریں جارى ہوں گى اور وہ ان میں ہمیشہ رہیں گے۔ یہ بہت بڑى کامیابى ہے۔

لیکن جب انہى دونوں جماعتوں کے دو افراد ایک کنویں سے پانى نکالنے پرجھگڑ پڑے اور مہاجر نے مہاجرین کى دہائى دى اور انصارى نے انصار کى تو رسول اللہ (صلی اللہ علیہ وسلم) سب کام چھوڑ چھاڑ کر موقع نزاع پرپہنچے اور ببانگ ِدُہل ارشاد فرمایا:
أَبِدَعْوَى الْجَاهِلِيَّةِ وَأَنَا بَيْنَ أَظْهُرِكُمْ
جاہلیت کا نعرہ لگاتے ہو، حالانکہ میں ابھى تمہارے درمیان ہوں۔
(حوالہ : جامع البيان عن تأويل آي القرآن ، أسد الغابة)
یعنى وہ معزز لقب جو "ہجرت" اور "نصرت" کے اعتبار سے انتہائى معزز اور قابل صد افتخار تھا، جب دو جماعتوں کو لڑانے کے لئے استعمال کیا گیا تو "جاہلیت کا نعرہ" کہلایا گیا، وہ جاہلیت جسے قبل از اسلام کفریہ دور سے تعبیر کیا جاتا تھا۔

کیا پاکستانى مسلمانوں کے لئے لمحہ فکریہ نہیں کہ یہاں بھى صوبائیت اور مہاجرت کے نام پر بھائى بھائى کى گردن کاٹى گئى ہے اور یہ سلسلہ ہنوز جارى ہے اور پھر بھى الله کى نصرت کى اُمید کى جاتى ہے!!
عرب ممالک میں قومیت کا نعرہ بڑى شان سے بلند کیا گیا، لیکن یہ نعرہ یہودیوں کى چھوٹى سى ریاست کا مقابلہ کرنے یا اہل فلسطین کو ان کى سرزمین واپس لوٹانے میں عربوں کى کوئى مدد نہیں کرسکا، عرب لیگ آج ایک بے جان لاشہ ہے جو تجہیز و تکفین کا منتظر ہے۔ صدام اور حافظ الاسد کى بعث پارٹى کے نام سے ایک بے خدا تحریک آپس میں جنگ وجدال، قتل و غارت اور سفاکى و درندگى کا ننگا ناچ ناچنے کے بعد خود بھى ڈوبى اور اپنى قوم کو بھى لے ڈوبى۔ کیا اب بھى اس کى باقیاتِ سیئہ سے خیر کى توقع کى جا سکتى ہے؟

(اقتباس بشکریہ مقالہ "دورِ حاضر ميں اُمت ِمسلمہ كے مسائل اور ان کا حل" از : ڈاکٹر صہیب حسن)

عالِم بےعمل کو تبلیغ کا حق ۔۔۔؟

2011-05-16T09:41:00.004+03:00

یہ سوال اٹھایا گیا ہے کہ : عالم بے عمل، کیا تبلیغ کا حق رکھتے ہیں؟

قرآن میں امت مسلمہ کو "خیر الامۃ" کا لقب دیا گیا ہے اور اس کے ذمہ "امر بالمعروف و نھی عن المنکر" کا عظیم الشان فرض عائد کیا گیا ہے ، قطع نظر اس کے کہ کون مسلمان عمل والا ہے اور کون بےعمل؟ "امر بالمعروف و نھی عن المنکر" کی ذمہ داری دونوں طبقوں پر برابر عائد ہے۔
بےشک یہ بات درست نہیں کہ خود سراسر بےعمل ہو کر دوسروں کو نصیحتیں کرتے جائیں۔ لیکن اس کا یہ مطلب بھی نہیں کہ "امر بالمعروف و نھی عن المنکر" کا فریضہ اسلیے چھوڑ دیا جائے کہ خود ہم "بےعمل" ہیں۔

ویسے تو میں نے اس موضوع پر کچھ عرصہ قبل ایک تحریر یوں پیش کی تھی :
نیکی کی تلقین اور برائی سے روکنا ۔۔۔؟

اس کے مطالعے کا اعادہ بہتر ہوگا۔
علم و عمل میں نمایاں فرق اور اس جیسی منافقت پر یہ ایک بہترین اقتباس ہے :

حضرت حسن بصری، تاریخ اسلام کی ایک بڑی شخصیت اکثر اپنے نفس پہ خفا ہوتے اور اپنے آپکو جھڑک کر کہتے حسن بصری، تو پرہیز گاروں اور اطاعت گذاروں جیسی باتیں کرتا ہے مگر تیرے کام تو جھوٹوں ، منافقوں اور دکھاوا کرنے والوں کے سے ہیں۔ سن لے اور خوب اچھی طرح سن لے کہ یہ اللہ سے محبت رکھنے والوں کی صفت نہیں کہ وہ سراپا اخلاص اور تمام تر ایثار نہ ہوں۔

لیکن ۔۔۔۔۔
اس اقتباس سے یہ ہرگز بھی ظاہر نہیں ہوتا کہ اگر کوئی بےعمل ہے تو اس پر سے "امر بالمعروف و نھی عن المنکر" کا فریضہ ساقط ہو جائے گا۔ اگر کوئی شرابی یا جواری ہو تو کیا ہم اس کو کہہ سکتے ہیں کہ وہ قرآن کی اس آیت کو نہ تو خود ہرگز بھی پڑھے اور نہ دوسروں کو پڑھ کر ہی سنائے :

يَا أَيُّهَا الَّذِينَ آمَنُواْ إِنَّمَا الْخَمْرُ وَالْمَيْسِرُ وَالأَنصَابُ وَالأَزْلاَمُ رِجْسٌ مِّنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُون

اے ایمان والو! بےشک شراب اور جوا اور بُت اور (قسمت کا حال معلوم کرنے) فال کے تیر (سب) ناپاک شیطانی کام ہیں۔ سو تم ان سے پرہیز کرو تاکہ تم فلاح پا جاؤ

( المائدة:5 - آيت:90 )

بات اگر حسن بصری رحمۃ اللہ کی نکلی ہے ہے تو یہی حسن بصری کہتے ہیں کہ :
ہم میں کون ایسا ہے جو وہ (سب کچھ) کرتا ہے ، جو وہ کہتا ہے؟ شیطان اسی بات کے ساتھ اپنا مقصد حاصل کرنا چاہتا ہے ، (تاکہ) پھر کوئی نیکی کا حکم نہ دے اور نہ ہی برائی سے روکے۔

حسن بصری نے یہ کیوں کہا ؟ تفسیر قرطبی (بہ تفسیر آیت : البقرہ-44) میں یہاں یہ واقعہ یوں درج ہے کہ ۔۔۔۔

حضرت حسن (رحمة اللہ علیہ) نے مطرف بن عبداللہ (رحمة اللہ علیہ) سے کہا: "اپنے ساتھیوں کو نصیحت کیجئے"۔
مطرف بن عبداللہ (رحمة اللہ علیہ) نے جواباً کہا : "میں ڈرتا ہوں کہ وہ بات کہہ نہ دوں جس کو میں خود نہیں کرتا"۔
یہ سن کر حضرت حسن (رحمة اللہ علیہ) کہنے لگے : "اللہ تعالیٰ آپ پر رحم فرمائے۔ ہم میں کون ایسا ہے جو وہ (سب کچھ) کرتا ہے ، جو وہ کہتا ہے؟ شیطان اسی بات کے ساتھ اپنا مقصد حاصل کرنا چاہتا ہے ، (تاکہ) پھر کوئی نیکی کا حکم نہ دے اور نہ ہی برائی سے روکے"۔

ہمارے ساتھی بلاگر ڈاکٹر جواد نے اپنے ایک تبصرے میں یہ بات بالکل درست لکھی ہے کہ :

جو چیز آپکو بری لگ رہی ہے وہ رد عمل ہے جو قرآن و سنت کے خلاف کی جانے والی بات پر ہوتا ہے اور خاص طور پر اس وقت جب یہ بات اصلاح کے روپ میں کی جائے۔

مجھے نہیں معلوم کہ جب بھی قرآن و سنت کے حوالے سے کوئی اچھی بات کہی جاتی ہے تو لوگ اس کا رخ بدل کر پاکستان یا عالَمِ اسلام کے مسلمانوں کی دگرگوں حالاتِ زار کی طرف کیوں موڑ دیتے ہیں؟ کیا لوگوں کے حالات خراب ہوں تو اچھی بات کہنا روک دینا چاہئے اور بری باتوں سے منع کرنا ختم کر دینا چاہئے؟

اس موضوع پر امام ابوبکر الرازی الجصاص علیہ الرحمة نے بالکل بجا فرمایا ہے کہ :

(نیکی کا حکم دینے کے متعلق) لازم ہے کہ نیک اور فاسق پر اس کے واجب ہونے کے بارے میں کچھ فرق نہ ہو ، (بلکہ اس کا ادا کرنا دونوں پر واجب ہے) کیونکہ انسان کے بعض واجبات کے چھوڑنے سے دوسرے واجبات کا چھوڑنا لازم نہیں آتا !
کیا تم نے نہیں دیکھا کہ نماز کا ترک کرنا ، انسان کے روزوں اور دوسری عبادات کے ترک کرنے کے لیے باعثِ جواز نہیں بن سکتا۔ اسی طرح جو شخص تمام نیکیاں بجا نہیں لا سکتا ، اور تمام برائیوں سے اجتناب نہیں کر سکتا ، اس پر سے بھی نیکی کا حکم دینے اور برائی سے روکنے کا واجب ساقط نہیں ہوتا۔
بحوالہ : احکام القرآن ، امام ابی بکر الجصاص // آن لائن ربط

دل تو ہے دل

2011-05-11T01:05:00.004+03:00

کچھ ہفتہ قبل ہمارے ایک دوست کے دو صاحبزادے فیض کے کلام کی شرح پوچھنے آئے تھے۔ اس دفعہ دوبارہ تشریف لائے تو شرماتے مسکراتے۔ بلکہ آپس میں ایک دوسرے کو کہنی مارتے ہنستے کھلکھلاتے۔
بدقت تمام ایک بھتیجہ گویا ہوا : "انکل، دل والے محاورے چاہئے ، معنوں کے ساتھ"۔
دوسرے نے ہنسنا شروع کر دیا۔ استفہامیہ نظر اس پر ڈالی تو اسی طرح ہنستے ہوئے اپنے بھائی کی طرف اشارہ کرتے بولا :
"انکل ، اردو ٹیچر نے آج جب پوچھا تو جواب میں انہوں نے گننا شروع کر دیا یوں ۔۔۔۔
دل سے ، دل ہیکہ مانتا نہیں ، دل چاہتا ہے ، دل بولے ہڑپا ، دل تو پاگل ہے ، دل تو بچہ ہے جی ۔۔۔۔"
قصور بچارے بچوں کا نہیں۔ ماحول ہی کچھ ایسا بن گیا ہے کہ ڈش انٹینا کلچر یا مادر پدر آزادانٹرنیٹ سے ایسی ہی کچھ معلومات آجکل حاصل ہوتی ہیں۔ مطالعہ کم ہو گیا ہے۔ لغت دیکھنے کی کسی کو فرصت نہیں۔ انٹرنیٹ پر معلومات اردو زبان کی تہذیب و قواعد سے متعلق موجود نہیں بلکہ فلم ، تفریح اور دیگر لغویات پر مشتمل ہیں۔ ایسے میں چند ہی لوگ ہیں جو خدمتِ اردو کی خاطر فی سبیل للہ کام کئے جاتے ہیں۔ زیادہ تر کو بیکار کے مباحث ، مسلکی مذہبی نظریاتی جھگڑوں ، سیاسی و ملکی حالات پر غیرضروری اور لٹھ بردار تبصروں سے فرصت نہیں۔ کاش کہ ہم سب اردو کی نئی نسل کی ہی خاطر کچھ نہ کچھ تعمیری کاموں کی طرف راغب ہوں۔
بہرحال گوگلنگ کرنے پر "دل" سے متعلق محاورے اردو یونیکوڈ تحریر میں کہیں نظر نہیں آئے۔ لہذا فیروز اللغات کی مدد سے یہ کچھ معروف و مقبول محاورے معانی کے ساتھ پیش خدمت ہیں۔

محاورہ | معنی

دل آب آب ہونا | دل کا نرم ہونا
دل آزردہ ہونا | افسردہ ہونا
دل اُچاٹ ہونا | جی نہ لگنا ، جی اکتانا
دل اُچٹ جانا | گھبرا جانا
دل الٹ پلٹ ہونا | دل کا گبھرانا ، بےچین ہونا
دل امڈ آنا | دل کا بھر آنا ، رونے کے قریب ہونا
دل باغ باغ ہونا | بہت خوش ہونا
دل بحال ہونا | دل کو چین آنا
دل بدست آور کہ حج اکبر است | دلجوئی کرنا حج اکبر کے برابر ہے
دل بَلیوں اچھلنا | بہت بےتاب ہونا
دل بیٹھ جانا | ہمت نہ رہنا ، افسردہ ہونا
دل پارہ پارہ ہونا | روحانی صدمہ ہونا
دل پتھر ہو جانا | مصیبتیں جھیل جھیل کر دل کا سخت ہو جانا
دل پر پتھر رکھ لینا | صبر کر لینا ، دل سخت کر لینا
دل پر چھریاں چلنا | اندرونی صدمہ پہنچنا
دل پر سانپ لوٹنا | افسوس ہونا ، پچھتاوا ہونا ، رشک ہونا ، حسد ہونا
دل پر گھونسا پڑنا | اچانک کوئی صدمہ پہنچنا
دل پر ہاتھ رکھ کے دیکھو | اپنی حالت کا اندازہ کر کے دوسرے کی نسبت کچھ کہو
دل پکڑ کر بیٹھ جانا | صدمہ کی وجہ سے بول نہ سکنا یا گھبرا جانا
دل ٹکڑے ٹکڑے ہونا | سخت صدمہ ہونا
دل جگر دیکھنا | حوصلہ یا ہمت دیکھنا
دل جل کر کباب ہونا | سخت رنج یا صدمہ ہونا ، رشک سے جلنا
دل چیر کر دیکھنا | دل کا حال معلوم کرنا
دل چیر کر دکھانا | راز ظاہر کرنا
دل خون کرنا | بےحد محنت و مشقت کرنا
دل دریا ہونا | بہت سخی یا فیاض ہونا
دل دھک دھک کرنا | بیماری ، ڈر یا اضطراب سے دل کی حرکت تیز ہو جانا
دل ڈانواں ڈول ہونا | دل بےاختیار ہونا ، دل قابو میں نہ ہونا
دل ڈوبنا | غشی طاری ہونا
دل سے اُتر جانا | بےوقعت ہو جانا ، بھول جانا
دل سے کانٹا نکلنا | دل کی خلش جاتی رہنا
دل کا ارمان نکلنا | آرزو پوری ہونا
دل کا بخار | غصہ ، رنج ، کدورت ، ملال
دل کا دو دو ہاتھ اچھلنا | بہت بےقرار ہونا ، مضطرب ہونا
دل کا کنول کھلنا | خوش ہونا ، شگفتہ خاطر ہونا
دل کباب ہونا | جلنا ، رنجیدہ ہونا ، غمگین ہونا
دل کو دل سے راہ ہوتی ہے | محبت دونوں طرف سے ہوتی ہے
دل کھول کے | بےدھڑک ، خاطر خواہ
دل کی کلی کھلنا | آرزو پوری ہونا
دل کی گانٹھ کھولنا | عداوت دور کرنا ، چھپے ہوئے کینہ کو دفع کرنا
دل کی گرہ کھولنا | رنجش دور ہونا ، عقدہ کشائی ہونا ، راز ظاہر ہونا
دل کے پھپھولے پھوڑنا | برا بھلا کہہ کر دل کا غصہ نکالنا، رنج و غم کے باعث جلی کٹی باتیں کرنا ، بدلہ لینا ، زہر اگلنا ، دردِ دل ظاہر کرنا
دل گواہی دیتا ہے | دل تائید کرتا ہے
دل لٹو ہونا | فریفتہ ہونا
دل لگ جانا | جی بہلنا ، کسی کام میں مشغول ہو جانا ، محبت ہونا
دل لوٹ پوٹ ہونا | فریفتہ ہونا ، شیدا ہونا ، عاشق ہونا
دل مارنا | خواہشوں کو روکنا، ضبط کرنا
دل مٹھی میں لینا | کسی کو قابو کرنا ، گرویدہ کر لینا
دل مر جانا | دل میں کوئی خواہش نہ رہنا
دل میں چٹکیاں لینا | طعنے دینا ، دل دکھانا ، درپردہ آزار پہنچانا
دل میں چور بیٹھنا | بدگمانی ہونا ، بدظنی ہونا
دل میں زہر بھرا ہونا | دل میں کسی کے متعلق دشمنی یا بدی ہونا
دل میں غبار آنا | کدورت رکھنا
دل میں کانٹا سا کھٹکنا | ناگوار گزرنا ، بار خاطر ہونا
دل میں گرہ پڑنا | رنج و ملال ہونا
دل میں گڑ جانا | پسند آنا ، اثر ہونا
دل میں گھر کر جانا | دوستی پیدا کرنا ، محبت کرنا
دل میں گھونسا لگنا | اچانک کوئی صدمہ پہنچنا
دل میں لڈو پھوٹنا | بہت خوش ہونا
دل میں ہُوک اٹھنا | رنج و غم کی بات یاد آنا
دل ہارنا | ہمت ہار دینا ، گھبرا جانا
دل ہلکا ہونا | رونے دھونے سے غم کا ہلکا ہونا
دل ہوا ہو جانا | ڈر سے گھبرا جانا
دل ہی دل میں | اندر ہی اندر ، چپکے چپکے

چوری کا فتویٰ اور ڈالروں کی برسات

2011-04-18T08:48:00.002+03:00

جاوید اقبال

معروف و مقبول کالم نگار ہیں۔ روزنامہ اردو نیوز (سعودی عرب) کے جمعہ ایڈیشن میں بلاناغہ ان کا ایک مختصر پراثر کالم چوتھے صفحہ پر شائع ہوتا ہے۔ میں کافی عرصہ سے اس کالم کا قاری ہوں۔ کچھ مرتبہ ان کے کالم شئر بھی کئے ہیں۔
اس بار بھی ان کا تازہ ترین کالم بعنوان "تیسری ای میل" (شائع شدہ : 15 اپریل 2011ء) پیش خدمت ہے۔
میں اس کالم کو مزید مختصر کر کے اپنی ترتیب کے ساتھ پیش کر رہا ہوں ، اصل کالم آپ نیچے دئے گئے لنک میں ملاحظہ کر سکتے ہیں۔
***

ایک محترم دوست کی جانب سے مجھے دو ایمیل ملی ہیں۔

پہلی ای میل ۔۔۔۔۔۔ کراچی کی جامعہ بنوریہ کے بارے میں۔
اخباری رپورٹ کا عنوان ہے "لوگوں کی جان بچانے کیلئے چوری کا فتویٰ جاری کرنے پر غور"۔
جامعہ بنوریہ کے مفتی صاحب کے پاس 2 ہزار کے لگ بھگ سائلین حاضر ہوئے۔ یہ کراچی کے معروف صنعتی فیکٹریوں میں کام کرنے والے مزدور تھے۔ ان کی شکایات تھیں کہ ۔۔۔۔
وہ اشیائے خورد و نوش اور روزمرہ استعمال کی دیگر بنیادی اشیاء کی قیمتوں میں آئے روز کے اضافے سے تنگ آ چکے ہیں۔ ان کا ماہانہ مشاہرہ 6 سے 9 ہزار روپے کے درمیان ہے اور گھرانہ 5 ، 6 یا 10 افراد پر مشتمل ہے۔ اس قلیل اجرت پر اور مہنگائی کے اس طوفان میں ان کا گزارہ مشکل ہے۔ گھروں میں فاقے ہو رہے ہیں اور علاج معالجہ کے وسائل نہ ہونے پر ان کے اہل خانہ ان کی آنکھوں کے سامنے سسک سسک کر دم توڑ رہے ہیں۔
سائلین نے کہا ۔۔۔۔۔
جب کسی مسلمان کی بھوک کے مارے موت واقع ہونے والی ہو تو اسلام اسے سور کا گوشت کھانے کی اجازت دیتا ہے اور خودکشی کو حرام قرار دیتا ہے۔ اب کیا اسی دلیل کو سامنے رکھتے ہوئے چوری ، ڈکیتی یا ناجائز ذرائع سے حاصل کردہ ناجائز مال سے وہ اپنے اہل خانہ کے پیٹ کی آگ بجھا سکتے ہیں ؟؟

ملک کے مشہور فلاحی ادارے ایدھی کے ایک ترجمان کا کہنا ہے کہ وہ شہر میں پانچ مقامات پر مفلس لوگوں کو کھانا کھلا رہے ہیں لیکن اس کے باوجود عوام کی ایک بڑی تعداد دو وقت کی روٹی کو ترس رہی ہے۔ یہ صورتحال اس وقت تک تبدیل نہیں ہو سکتی جب تک مراعات یافتہ طبقہ اپنی شاہ خرچیوں میں کمی نہیں لاتا۔

دوسری ای میل ۔۔۔۔۔۔ فیصل آباد میں شادی کی ایک تقریب میں ڈالروں کی برسات۔
یہ تقریباً پانچ منٹ کی یوٹیوب ویڈیو ہے۔ منظر شادی کی تقریب ، محفلِ راگ و رنگ ، اسٹیج پر ایک مغنی اپنے سازندوں کے ہمراہ، سامنے ہال میں دیڑھ دو سو کے قریب حاضرین۔
حاضرین میں سے ایک نوجوان اپنا بریف کیس کھولتا ہے اور ڈالروں کی گڈیاں نکال کر گانے والے پر نچھاور کرتا ہے۔ جب ہاتھ میں پکڑے ڈالر ختم ہو جاتے ہیں تو بریف کیس سے دوبارہ نئی گڈیاں لا کر اچھالتا ہے۔ وہ ایسا کئی بار کرتا ہے اور اس کے کام میں اس کا ایک اور ساتھی بھی ہاتھ بٹاتا ہے۔ لٹانے والے دیوانے ہو چکے ہیں۔ سارا فرش امریکی کرنسی کے ڈھیر میں چھپ گیا ہے۔ گانے والے پر ڈالروں کی برسات ہو رہی ہے۔ مستی مسرت ہے۔
مگر ۔۔۔۔ صرف چند سو گز کے دائرے میں برقی توانائی نہ ہونے سے ہزاروں کھڈیاں ویران پڑی ہیں اور ہزاروں مزدور گھرانے شکم کی آگ میں اپنے بدنوں کے ایندھن جلا رہے ہیں !

***
تیسری ای میل کی خواہش نہیں ہے !
جب اہل ثروت پر اتنی بےحسی چھا جائے کہ ان کے نزدیک نام و نمود انسانی جان سے زیادہ اہم ہو جائے تو پھر تاریخ کا دھارا اپنا رخ یوں پلٹتا ہے کہ ہر قدم پر لہو کا خراج لیتا ہے۔ لاکھوں کے لباس زیب تن کرنے والے ، نجی محفلوں پر کروڑوں لٹانے والے اور مظلوم خلق خدا کے درد و آشوب سے بےحسی کا مظاہرہ کرنے والے ہمارے حکمران اور ثروت مند فوراً تاریخ سے سبق سیکھیں ورنہ ۔۔۔۔
تیسری ای میل کہیں ان کے عبرتناک انجام کے بارے میں نہ ہو !!

-----
کالم : تیسری ای میل (جاوید اقبال) - روزنامہ اردو نیوز ، 15-اپریل-2011

www.jihad.com ۔۔۔ حقیقت کیا ہے؟

2011-04-12T10:57:00.003+03:00

تشدد ، دہشت گردی اور مذہبی جنونیت ۔۔۔۔
کیا اس کے خلاف مسلم دنیا میں کچھ کہا گیا ہے؟ اور کیا مسلم دنیا کے ایسے خیالات کو انگریزی میڈیا میں پیش کیا گیا ہے؟ کیا ہمارے نامور اور معتبر علماء نے واقعتاً اسلام پر لگائے جانے والے دہشت گردی کے الزام کا مدلل رد کیا ہے؟
اس موضوع پر نیٹ گردی کے دوران امریکن مسلم ویب سائیٹ کا یہ تحقیقی مقالہ مطالعے سے گزرا ۔۔۔۔
Muslim Voices Against Extremism and Terrorism - Fatwas & Formal Statements by Muslim Scholars & Organizations

یہ تحقیق بلاشبہ ایک انتہائی قابل قدر کوشش ہے جس کو زیادہ سے زیادہ کشادہ ذہن علمی و دینی حلقوں تک پہنچایا جانا چاہئے۔

اسی ضمن میں جب منفی نقطہ نظر کی تلاش ہوئی تو ایک معروف مغربی کالم نگار کا تجزیہ مطالعے سے گزرا۔
تھامس فرائیڈمن ، نیویارک ٹائمز (امریکہ) کے مشہور کالم نویس ہیں۔
آپ جناب نے کوئی سال دیڑھ سال قبل ایک آرٹیکل لکھا تھا بعنوان :
www.jihad.com
خلاصہ کچھ یوں ہے کہ ۔۔۔۔۔۔۔

مسلم ممالک میں ایک پرتشدد اور جہاد پرست اقلیت ایسی ہے جو اپنے وجود کو جائز ثابت کرنے پر تلی ہوئی ہے۔ مسلم ممالک کے سیاسی اور مذہبی قائدین میں سے چند ہی عوام کے آگے جہاد اور تشدد کے خلاف آواز اٹھاتے ہیں۔ سوال یہ ہے کہ مسلم ممالک کی اہم مذہبی شخصیات میں سے کتنوں نے اسامہ بن لادن اور القاعدہ کے خلاف فتوے جاری کئے ہیں ؟؟

فرائیڈمن مسلم دنیا کے معاملات کے تعلق سے اس قدر باخبر صحافی ہیں کہ وہ مشرق وسطیٰ اور اس کے وسائل کے بارے میں ایک کتاب (From Beirut to Jerusalem) بھی شائع کر چکے ہیں جسے غیر معمولی مقبولیت حاصل ہوئی ہے۔
لیکن جب یہی فرائیڈمن اپنے آرٹیکل (www.jihad.com) میں ایک ناقابل فہم بات لکھتے ہیں تو ایسا لگتا ہے کہ وہ دانستہ طور پر ناواقفیت کا مظاہرہ کر رہے ہیں۔

تھامس فرائیڈمن کی اس متنازعہ تحریر (www.jihad.com) کے ہفتہ بھر بعد ہی جارج ٹاؤن یونیورسٹی کے شعبہ مذہب و بین الاقوامی امور کے پروفیسر جان ایل اسپازیٹو نے فرائیڈمن کے نظریات کا رد کرتے ہوئے وضاحت کی کہ تھامس فرائیڈمن نے غیرحقیقی اور غیرمنطقی گفتگو کی ہے۔ پروفیسر جان اسپازیٹو کا مکمل مقالہ یہاں ملاحظہ فرمائیں :
Tom Friedman on Muslims and Terrorism: Getting it Wrong Again

پروفیسر اسپازیٹو کے غیرجانبدارانہ اور منصفانہ تجزیے کے مطابق ۔۔۔۔۔

گیلپ عالمی پول (Gallup World Poll) کے مطابق تو 35 مسلم ممالک ، جو شمالی افریقہ سے جنوب مشرقی ایشیا تک پھیلے ہوئے ہیں ، میں کئی مسلم افراد اور امریکیوں نے شہریوں کو دہشت گردانہ حملوں کا نشانہ بنانے جانے کی کھل کر مذمت کی ہے اور انہیں اخلاقی طور پر ناجائز قرار دیا ہے۔
11 ستمبر کے حملوں کے بعد سعودی عرب سے لے کر ملیشیا اور امریکہ میں تک کئی اہم بااثر اور مختلف الخیال مذہبی قائدین نے عمومی طور پر دہشت گردی اور خصوصاً اسامہ بن لادن کی سرگرمیوں کی مذمت کی ہے۔ ان قائدین میں شیخ طنطاوی (جامعہ الازہر کے مرحوم چانسلر) اور ایران کے آیت اللہ کاشانی تک شامل ہیں۔
بطور ثبوت یہ مقالہ دیکھیں ۔۔۔۔
Muslim Voices Against Extremism and Terrorism

تھامس فرائیڈمن اگر یہ کہتے ہیں کہ :
مسلمانوں میں ایک عجیب و غریب ذہنیت گھر کر چکی ہے جس کے تحت عربوں اور مسلمانوں کو محض ایک ایسا محرک سمجھا جانے لگا ہے جو دنیا میں ہونے والے کسی بھی واقعہ کے لیے ذمہ دار نہیں۔ جبکہ ہم دنیا کے کسی بھی واقعے سے متاثر ہونے والے افراد ہیں جو دنیا میں کہیں بھی ہونے والے کسی بھی واقعہ کیلئے ذمہ دار ہیں۔

تو ان کے لیے میرا ناقص مشورہ یہ ہے کہ :
اگر عربوں اور مسلمانوں کی ذمہ داری کو ابھارنے کے لیے فرائیڈمن اس قدر تعلق خاطر رکھتے ہیں اور ان سے یہ توقع رکھتے ہیں کہ وہ دہشت گردوں کے خلاف زیادہ سے زیادہ مزاحمت کریں تو پھر انہیں اور نیویارک ٹائمز جیسے معتبر اخبار کو ایک مثبت قدم اٹھانا ضروری ہے۔ اور وہ یہی کہ وہ مسلم قائدین اور مسلمانوں کی بھاری اکثریت کی نمائیندگی کرنے والے افراد کے بیانات کو نظر انداز نہ کریں بلکہ ان کو زیادہ سے زیادہ قارئین تک پہنچائیں !
اگر وہ ایسا نہیں کرتے تو یہ گویا ایک طرح کی غیرذمہ دارانہ صحافت ہوگی اور اس کا مقصد یہ قرار پائے گا کہ وہ ساری دنیا کے مسلمانوں کو یکا و تنہا کر کے ان کے جائز مقاصد کی تکمیل کے متعلق پہلو تہی کرنا چاہتے ہیں !!

مسجد الحرام اور مسجد نبوی کی کچھ تازہ تصاویر

2011-03-27T10:42:00.001+03:00

السلام علیکم ورحمۃ اللہ وبرکاتہ

اس ہفتہ اتفاق سے مسجد الحرام اور مسجد نبوی (صلی اللہ علیہ وسلم) کی زیارت کا موقع نصیب ہوا تھا۔ ہمارے ایک عزیز دوست عتیق الرحمٰن بھائی لندن سے بغرض عمرہ سعودی عرب تشریف لائے تھے۔ ان سے ملاقات کا ارادہ تھا جو الحمدللہ پورا ہوا اور کافی طویل عرصہ کی نیٹ-دوستی میں دوبدو ملاقات کا شرف بھی پہلی بار حاصل ہوا۔

ان دنوں عمرہ کا سیزن چل رہا ہے۔ اس لیے حرمین شریفین میں بےپناہ ہجوم ہے۔ اطلاعات کے مطابق ترکی کے زائرین سب سے زیادہ تعداد میں تشریف لائے ہیں جبکہ دوسرے نمبر پر پاک و ہند کے زائرین ہیں۔

اللہ تعالیٰ سب کی عبادتوں اور دعاؤں کو قبول فرمائے ، امت مسلمہ کو حفظ و امان میں رکھے اور عالم اسلام کو سربلندی عطا فرمائے ، آمین یارب العالمین۔

اس موقع پر حرمین شریفین کی کچھ تازہ تصاویر ملاحظہ فرمائیں۔

مسجد الحرام (مکہ مکرمہ) کا اندرونی منظر
بروز جمعہ 25-مارچ-2011ء ، بوقت : صبح 7 بجے

مسجد نبوی (مدینہ منورہ) کا بیرونی منظر ، گنبد خضرا
بروز جمعرات 24-مارچ-2011ء ، بوقت : علی الصبح 4 بجے

مسجد نبوی (مدینہ منورہ) کا بیرونی منظر ، مرکزی دروازہ باب الفہد (قریبی منظر)
بروز جمعرات 24-مارچ-2011ء ، بوقت : صبح 10 بجے

مسجد نبوی (مدینہ منورہ) کا بیرونی منظر ، مرکزی دروازہ باب الفہد
بروز جمعرات 24-مارچ-2011ء ، بوقت : صبح 10 بجے

سعودی عرب میں یوم الغضب ؟؟

2011-03-11T16:40:00.002+03:00

حسب روایت بی بی سی نے اپنی پراگندہ ذہنی کے طور پر ایک خبر کی سرخی یوں لگائی ہے :
سعودی عرب میں یوم الغضب

کون سا یوم الغضب ؟
اور کس معاملے پر لوگوں میں غیض و غضب پیدا ہوا ہے یا ہو رہا ہے؟
مٹھی بھر شرپسند افراد کا وہ "احتجاج" جو فیس بک جیسی متنازعہ سوشل نیٹ ورکنگ سائیٹ کے ذریعے ہوّا بنا کر پیش کیا جا رہا ہے اور یوں کہ جیسے انسانی حقوق کی لرزہ خیز حق تلفی کی جا رہی ہو؟
واہ !! بڑا اچھا مذاق ہے !

مغربی و صیہونی ایجنسیوں کی پشت پناہی کے ذریعے چلانے جانے والی اس سوشل نیٹ ورکنگ سائیٹ کے متعلق ذرا گوگل پر صاحبان عقل و دانش تحقیق تو کر دیکھیں۔ پتا چلے گا کہ کس قدر دوغلی فکر و نظر کی اشاعتِ عام ہو رہی ہے۔
جب مسلمانوں کے عظیم ترین مذہبی رہنما نبی کریم صلی اللہ علیہ وسلم کے خلاف واہیات کارٹون شائع ہوتے ہیں اور ساری دنیا میں مسلمان احتجاج کرتے ہیں تب ۔۔۔۔۔ ؟
تب یہ ایمنسٹی انٹرنیشنل اور انسانی حقوق کا نام جپنے والی تنظیمیں مسلمانوں کی حمایت میں آگے آ کر بیان کیوں نہیں دیتیں؟
دنیا بھر کے مسلمانوں کا احتجاج ان کے نزدیک کوئی وقعت نہیں رکھتا اور چند متعصب سرپھروں کی آزادئ رائے کا اظہار ان کے نزدیک اہم ہے ؟؟
سبحان اللہ۔ قربان جائیے اس آزادئ رائے پر۔

سعودی عرب ، دنیا کا شائد وہ واحد ملک ہے جہاں جرائم کی شرح نہایت ہی کم ہے۔ کیا یہ ہی وجہ ہے کہ یہ ملک غیروں کی نگاہوں میں کھٹک رہا ہے؟

دوسری طرف امریکہ کے 35 ویں امیر ترین فرد اور فیس بک کے مالک نے دنیا کے غریب اور ضرورت مندوں کی کیا خدمات انجام دی ہیں؟
بلکہ ان محترم کے بارے میں تو کہا گیا ہے کہ :

He's created a global network of friendships, but ruthlessly betrayed his own friends.

جو لوگ مغربی میڈیا سے مرعوب و متاثر ہیں ، کم از کم انہیں کچھ تحقیق بھی کر لینا چاہئے کہ جتنا کچھ انہیں بتایا یا جتایا جا رہا ہے ، ان کے پس پردہ اصل حقائق کیا ہیں؟

آخر قرآن کیوں جلے؟

2011-03-09T17:21:00.002+03:00

کچھ دن پہلے ایک اردو کتاب اس عنوان سے منظر عام پر آئی ہے :

میں نے بائبل سے پوچھا قرآن کیوں جلے؟

اس کے مولف ہیں : مولانا امیر حمزہ۔
اس کتاب کو پی۔ڈی۔ایف فائل کی شکل میں ڈاؤن لوڈ کیا جا سکتا ہے۔ ڈاؤن لوڈ لنک اس تحریر کے آخر میں ملاحظہ فرمائیں۔
یہ کتاب دراصل اس اشتعال انگیز پروپگنڈے کا علمی و تحقیقی جواب ہے جو کچھ پراگندہ ذہن لوگ قرآن کریم کے خلاف برپا کرنے پر تلے ہیں۔ اللہ ایسے لوگوں کو ان کے برے انجام سے جلد از جلد دوچار کرے۔

اس میں شک نہیں کہ شیخ امیر حمزہ کی یہ ایک اور منفرد اور مفید کتاب ہے۔ خاص طور پر انہوں نے جس قدر عرق ریزی سے تحقیق کی ہے اور جتنی اہم کتب (عہدنامہ قدیم ، باتصویر بائبل ، یہود سے متعلق انسائیکلوپیڈیا) کو کنگھالا ہے اس کی داد نہ دینا ناانصافی ہوگی۔
ضرورت اس بات کی ہے کہ اس کتاب کا انگریزی ترجمہ بھی جلد سے جلد پیش کیا جائے۔
مگر ۔۔۔۔۔۔
انگریزی میں یہ کتاب پیش کرنے کیلئے کتاب کے اسلوب اور لب و لہجہ کی موثر تبدیلی نہایت ناگزیر امر ہے۔
ذاتی طور پر مجھے خود اس اردو کتاب کے لب و لہجہ پر اعتراض ہے۔ شیخ محترم کی علمیت و ادبی حیثیت سے کسی کو انکار نہیں ہو سکتا لیکن یہ بھی ایک حقیقت ہے کہ ہر مختلف موضوع ایک مختلف اسلوب و انداز کا متقاضی ہوتا ہے۔
ایک عام مسلمان کو دین کے حوالے سے فخر و غرور یا جذباتیت میں ضرور مبتلا کیا جا سکتا ہے لیکن مذہب سے کچھ دور اور مادیت پرستی میں مشغول روشن خیال یا وسیع الذہن انسان (مسلم یا غیر مسلم) کو جذباتیت یا اشتعال انگیز اندازِ تقابل ادیان سے متاثر نہیں کیا جا سکتا۔ جبکہ یہ کتاب ایسے ہی "روشن خیال" طبقے کیلئے تحریر کی گئی ہے۔ خطیبانہ ، جذباتی اور روایتی مذہبی برہم آمیز انداز میں ایسے طبقے کو متاثر کرنے کی کوشش کرنا کارعبث ہے۔
بڑی عجیب بات ہے کہ اس کتاب کا تعارف کرواتے ہوئے پروفیسر حافظ محمد سعید نے لکھا کہ : اس کتاب سے خاص طور پر وہ مسلمان زیادہ فائدہ اٹھا سکیں گے جو مغرب سے بہت متاثر ہیں۔
حالانکہ حافظ صاحب کو یہ بھی پتا ہوگا کہ جو مسلمان مغرب سے مرعوب و متاثر ہے وہ کبھی ایسے جذباتی اور مقابل کو کمتر و حقیر و غاصب و ظالم جتانے والے لب و لہجے کو ہرگز پسند نہیں کرتا ، اور اس کا نتیجہ یہی نکلتا ہے کہ جب وہ ایسے جذباتی جملے یا فقرے یا القاب پڑھتا ہے ۔۔۔۔۔

ارے نادانو ۔۔۔ ارے ظالمو ۔۔۔ اپنی ننگی ذہنیت کو تہذیب کا لباس پہناؤ ۔۔۔ کیا تجھے ابھی تک پتا نہیں چلا کہ گولی مار کر وہ اپنے مذہب پر عمل کر رہا تھا ۔۔۔ ظالمو تم جانوروں سے بدتر ہو ۔۔۔۔۔

تو بیزاری سے کتاب کو بازو رکھ دیتا ہے !

بہرحال ۔۔۔۔۔
اس قدر نہایت اچھی ، قابل قدر اور علمی و تحقیقی کتاب کی اشاعت سے قبل دیگر معاصر علمائے کرام (مثلاً : حافظ صلاح الدین یوسف حفظہ اللہ ، جنہوں نے بہترین علمی و غیرجذباتی انداز میں مولانا مودودی علیہ الرحمۃ کی "خلافت و ملوکیت" کا جواب دیا تھا) سے رائے و مشورہ کر لیا جاتا اور کتاب کے لب و لہجے میں روایتی خطابت کے بجائے مکمل علمی سنجیدگی کو بروئے کار لایا جاتا تو اس کی افادیت میں مزید دو چند بلکہ چہار چند اضافہ ہوجانا ناممکن نہیں تھا۔

کتاب کے لب و لہجے سے قطع نظر ، جو لوگ تقابل ادیان میں دلچسپی رکھتے ہیں ، یا جو لوگ اپنے غیرمسلم ساتھیوں کو قرآن کریم کی حقانیت اور اس میں موجود انبیاء و رسل کی عزت و توقیر کے واقعات و حکایات سے واقف کروانا چاہتے ہوں ، ان کے لیے یہ ایک قابل مطالعہ اور نہایت ہی معلوماتی کتاب ہے۔

***
کتاب کا عنوان : میں نے بائبل سے پوچھا قرآن کیوں جلے؟
مولف : مولانا امیر حمزہ
ناشر : دار الاندلس
صفحات : 162
پی۔ڈی۔ایف فائل سائز : 3.1 میگابائٹس
ڈاؤن لوڈ لنک : me-ne-bible-se-pocha-quraan-qiyo-jale

شیشوں کا مسیحا کوئی نہیں

2011-02-28T18:41:00.001+03:00

ابھی کل کی بات ہے ، ہمارے ایک اچھے سے دوست کے دو صاحبزادے فیض کا کلام لے آئے۔ اپنے اسکول کے مقابلے "نظم خوانی" میں یہ کلام انہیں سنانا تھا۔ کہنے لگے :
انکل ، یہ ذرا سمجھا دیں ہمیں۔ اگر سمجھ میں آ جائے تو یاد بھی جلد ہو جائے گا۔

صاحب۔ ہم نے بہت کوشش کی۔ عرصہ ہوا ادبِ لطیف (اور وہ بھی ترقی پسندانہ) سے دوری اختیار کئے۔ مگر پھر بھی جیسے تیسے کر کے سمجھا دیا۔
اس تشریح پر فیض کی روح تڑپ اٹھی ہو کہ پھڑک اٹھی ہو ، یہ تو نہیں پتا ۔۔۔ لیکن مداحینِ فیض سے معذرت خواہ ہیں اگر کچھ اونچ نیچ محسوس ہو۔
لیجئے ۔۔۔ شرحِ فیض ملاحظہ فرمائیں ۔۔۔۔

موتی ہو کہ شیشہ ، جام کہ دُر

جو ٹوٹ گیا، سو ٹوٹ گیا

کب اشکوں سے جڑ سکتا ہے

جو ٹوٹ گیا ، سو چھوٹ گیا

پیارے بچو ! شاعر کہتا ہے کہ جو تم نے ابھی ابھی اپنے ابو کو پانی پلانے کے لیے گلاس اٹھایا تھا تو دراصل ذرا بےدھیانی میں ہاتھ بڑھایا تھا لہذا شیشہ کا گلاس اگر نیچے گر کر ٹوٹ گیا ہے تو سمجھو کہ وہ گیا بس گیا۔ کراکری کی رفاقت چھوڑ گیا۔ تم چاہو تو انا للہ پڑھ سکتے ہو۔ مگر تمہارا رونا بےفائدہ ہے کیونکہ دانا کہتے ہیں کہ آنسو بہانے سے ٹوٹے گلاس ہی نہیں جڑتے بلکہ ٹوٹے دل بھی نہیں جڑتے۔

تم ناحق ٹکڑے چن چن کر

دامن میں چھپائے بیٹھے ہو

شیشوں کا مسیحا کوئی نہیں

کیا آس لگائے بیٹھے ہو

دیکھو بچو ! ویسے تو ٹوٹے ہوئے گلاس کے ٹکڑے چننا نوکر کا کام ہوتا۔ پیارے پچوں اور معصوم بالغوں کا یہ کام نہیں۔ ہاں کبھی کبھی بچوں کو کھیل کے لیے کانچ کے رنگین ٹکڑے چاہئے ہوتے ہیں تو ذرا دیکھ سنبھال کر چننا چاہئے مبادا کہیں مزید کوئی اور گلاس نہ توڑ بیٹھیں۔ تیسرے مصرعے میں جو "مسیحا" کا ذکر ہے یہ حضرت عیسیٰ علیہ السلام نہیں۔ اصل میں یہ شاعر لوگوں کے ایک مرغوب اور پسندیدہ آدمی کا نام ہے۔ جہاں ردیف قافیہ فٹ بیٹھتا ہے تو اسے بلا لیتے ہیں۔

ناداری، دفتر، بھوک اور غم

ان سپنوں سے ٹکراتے رہے

بے رحم تھا چومکھ پتھراؤ

یہ کانچ کے ڈھانچے کیا کرتے

میرے بہادر بچو ! دیکھو کبھی کبھی تم نے غور کیا ہوگا کہ جب کسی مہینے کی آٹھ تاریخ کو بھی ابو دفتر سے تھکے ماندے شانے ڈھلکائے آتے ہیں اور تمہاری ممی ان کی صورت دیکھتے ہی پوچھتی ہیں:
"آج بھی نہیں ملی؟"
تو یہ اصل میں بڑے لوگوں کی بڑی باتیں ہوتی ہیں۔ جب تم بڑے ہو جاؤ گے اور فیروزاللغات دیکھنا کھوجنا جان جاؤ گے تو ناداری ، بھوک ، غم ، پتھراؤ ، ڈھانچے جیسے الفاظ کے معانی تمہیں بھی اچھی طرح سمجھ میں آ جائیں گے۔ اس وقت تمہارا کام تو صرف یہ ہے کہ مہینے کے پہلے اور آخری ہفتہ میں کوئی گلاس نہ توڑنا۔

اس مال کی دھن میں پھرتے تھے

تاجر بھی بہت ، رہزن بھی کئی

ہے چور نگر، یا مفلس کی

گر جان بچی تو آن گئی

بچو ! یہ دراصل سیاسی شعر ہے۔ سیاست ابھی تمہاری سمجھ میں نہیں آئے گی۔ اس کے لیے بہت پاپڑ بیلنے پڑتے ہیں۔ یہ ایسا مال ہے کہ تاجر ، رہزن ، چور اچکے سب اسی کی چاہ میں دیوانے ہوئے جاتے ہیں۔ عوام بچارے چونکہ مفلس ہوتے ہیں لہذا بڑی مشکل سے زندگی گزارتے ہیں کبھی جان پر بن جائے تو آن قربان کر دیتے ہیں۔ ویسے بھی آن کی قربانی ہماری مجبوری ہے۔ ہم جس اسلامی ملک میں رہتے ہیں وہاں جان بچانے کے لیے وقتاً فوقتاً ایسی قربانیاں دینی پڑتی ہیں۔ اسے قومی مجبوری بھی کہا جا سکتا ہے۔

یہ ساغر، شیشے، لعل و گہر

سالم ہوں تو قیمت پاتے ہیں

یوں ٹکڑے ٹکڑے ہوں، تو فقط

چبھتے ہیں، لہو رلواتے ہیں

عزیر بچو ! اس شعر میں شاعر اتحاد امت کا درس دے رہا ہے۔ اس نے تشبیہات اور مثالوں کے ذریعے اپنی بات سمجھائی ہے۔ جیسا کہ دیکھو کچن میں کراکری کتنی خوبصورت نظر آتی ہے اگر ہر چیز اپنی جگہ موزونیت اور مناسبت سے سجائی جائے۔ ورنہ کوئی گلاس بستر پر ، کوئی پیالی صوفے پر ، کوئی پلیٹ کمپیوٹر ٹیبل پر ہو تو ذرا سی لاپروائی پر نیچے گر کر ٹوٹتی ، ہاتھ پاؤں میں چبھتی اور خون بہاتی ہیں۔ اسی طرح اگر کوئی یہ کہے کہ میں فلاں مسلک کا ہوں تو فلاں طبقہ کا ہے ، تیرا فرقہ یہ ہے میرا فرقہ یہ ہے ، تو یہ ہے میں وہ ہوں ۔۔۔۔ یہ میری جگہ ہے ، تو وہاں جا یہاں مت رہ ۔۔۔۔ تو آپس میں دنگا فساد ہوتا ہے خون کی ندیاں بہتی ہیں اور اتحاد امت پارہ پارہ ہو جاتا ہے۔

محبت مجھے ان جوانوں سے ہے ۔۔۔

2011-02-14T16:16:00.001+03:00

ہاں ! محبت مجھے ان جوانوں سے ہے !

کیا پتا کہ ۔۔۔۔۔ آج کے دن ان جوانوں کے ہاتھوں یہ جو سرخ گلاب نظر آتے ہیں ، کل یہی ہاتھ قلم اور کتاب تھام لیں
کیا پتا کہ ۔۔۔۔۔ آج کی-بورڈ پر ان کی انگلیاں صنف مخالف کو مخاطب کرتی ہیں ، کل یہی انگلیاں علم و تحقیق کے سمندروں کو کھنگالیں
کیا پتا کہ ۔۔۔۔۔ آج جن کے ہاتھوں میں زبردستی کے کلاشنکوف تھمائے گئے ہیں ، کل مسیحا بن کے زخمیوں اور بیماروں کی نبض ٹٹولیں
کیا پتا کہ ۔۔۔۔۔ آج جنہیں فرقہ ، مسلک ، جماعت ، گروہ کے ٹکڑوں میں بانٹا گیا ہے ، کل وحدتِ امت کا نشان بن کے جگمگائیں
کیا پتا کہ ۔۔۔۔۔ آج جو سوالی بن کے در بہ در بھٹک رہے ، کل اپنے در سے سوغات لٹائیں ۔۔۔

ہر سال ایک یہ دن آتا ہے۔ ایک نئی امید ایک نئی صبح روشن ہوتی ہے تو مفکر اسلام یاد آتے ہیں۔ روح کی تڑپ تھی کہ بول اٹھے تھے ۔۔۔۔

یارب دِل مسلم کو وہ زندہ تمنا دے
جو قلب کو گرما دے، جو روح کو تڑپا دے

پھر وادئ فاراں کے ہر ذرّے کو چمکا دے
پھر شوقِ تماشا دے، پھر ذوقِ تقاضا دے

اس دور کی ظلمت میں ہر قلبِ پریشاں کو
وہ داغ محبت دے، جو چاند کو شرما دے

بے لوث محبت ہو، بیباک صداقت ہو
سینوں میں اجالا کر، دل صورتِ مینا دے

اے نوجوان ! کہ تری شان کے بارے میں علامہ نے تو فرمایا تھا :

ہر لحظہ ہے مومن کی نئی شان نئی آن
گفتار میں کردار میں اللہ کی برہان

قہاری و غفاری و قدوسی و جبروت
یہ چار عناصر ہوں تو بنتا ہے مسلمان

یہ راز کسی کو نہیں معلوم کہ مومن
قاری نظر آتا ہے‘ حقیقت میں ہے قرآن!

اک روشن صبح کی امید میں دعا کی تھی علامہ نے ۔۔۔۔۔ آج پھر وہی دعا دہرانے کو جی چاہتا ہے :

اپنے پروانوں کو پھر ذوقِ خود افروزی دے
برقِ دیرینہ کو فرمانِ جگر سوزی دے

آنکھ کو بيدار کر دے وعدۂ ديدار سے
زندہ کر دے دل کو سوز جوہر گفتار سے

عزائم کو سینوں میں بیدار کر دے
نگاہ مسلماں کو تلوار کر دے

دلوں کو مرکز مہر و وفا کر
حریم کبریا سے آشنا کر
جسے نان جویں بخشی ہے تو نے
اسے بازوئے حیدر بھی عطا کر

ضمیر لالہ میں روشن چراغ آرزو کر دے
چمن کے ذرے ذرے کو شہید جستجو کر دے

کیا آج اجماعی و اتفاقی مسائل کے تعمیرِ نو کی ضرورت ہے؟

2011-01-29T21:10:00.003+03:00

ہمارے ایک دوست نے یہاں پر اپنا خیال کچھ یوں پیش کیا ہے۔ موضوعِ بحث ، وہی آج کا ہاٹ ٹاپک یعنی "قانونِ ناموسِ رسالت" رہا ہے۔
اقتباس ملاحظہ فرمائیں :

ایک بہت بڑا مسئلہ یہ ہے کہ ہم دین پر پھر سے غور کرنے سے ڈرتے ہیں۔ شش شش کہہ کر، ان کے رتبے اور فضیلت، اور رسول اللہ صلی اللہ علیہ وسلم کے زمانے سے قریب ہونے کا ڈراوا دے کر چپ کروا دیا جاتا ہے۔ دین کے ذرائع ان کے پاس بھی وہی تھے جو آج ہمارے پاس ہیں۔ عقل و علم ان کے پاس بھی تھا جو آج ہمارے پاس بھی ہے۔ زمانہ ان کا وہ نہیں تھا جو آج ہمارا ہے۔ اس دور کے تقاضے اور تھے، آج کے تقاضے نئے اجماع اور اجتہاد کی ڈیمانڈ کرتے ہیں۔ جو کہ ہو نہیں سکتا، چونکہ جو بندہ پچھلوں کے استدلال سے مختلف بات کرے گا وہ روشن خیال (روشن خیال کو گالی سمجھا جائے)، ناقص القعل، ناقص الایمان اور دشمن اسلام ہے۔

"نئے اجماع" کی مثال بھی خوب ہے۔ دوست محترم نے یہ نہیں بتایا کہ : یہ "نیا اجماع" پرانے اجماع کو توڑ کر بنایا جائے گا یا اس میں append ہوگا؟ اور مزید یہ کہ جب "اجماع" قابل تبدیل چیز ہے تو پھر ہر دَور کا اجماع علیحدہ علیحدہ ہونا چاہئے۔ اور وہ کون لوگ ہیں جو اس قسم کے زمانہ وار اجماع کو مرتب کریں گے؟

دراصل یہ افکار موجودہ دور کے ایک اسکول آف تھاٹ سے جاری ہو رہے ہیں۔ کچھ عرصہ قبل اسی موضوع پر ایک جگہ بحث ہوئی تو اس کے جواب میں ، میں نے اپنا جو کچھ مطالعہ نقل کیا تھا ، وہ اب یہاں ملاحظہ فرمائیں۔
***
احادیثِ صحیحہ اور متقدم مفسرین و محدثین و ائمہ دین کے حوالے سے جب کوئی اجماعی و اتفاقی بات پیش کی جائے تو آج کے فہم کو قبول نہ ہونے کے سبب اس کا انکار کر دیا جاتا ہے۔ تو پھر ہم بھی کیونکر اس "فکر" پر اعتراض نہ کریں جو اہل علم کی متفقہ رائے کے خلاف نظر آتی ہو؟

فقہاء و علماء و محدثین کی کورانہ تقلید کی دعوت قطعاً نہیں دی جا رہی بلکہ ہمارے نزدیک تو تجدید و اجتہاد ، اور تحقیق و اکتشاف ، وقت کی اہم ترین ضرورت ہیں۔
لیکن استدعا صرف یہ ہے کہ بحث و نظر کا دائرہ کار ، اجماعی و اتفاقی مسائل کے بجائے وہ امور ہونے چاہئے جو واقعتاً حل طلب ہیں۔
امت کے مابین ہمیشہ سے طے شدہ امور میں "اجتہاد" کا نتیجہ سوائے انتشار و افتراق کے کچھ نہیں جو امت کے لئے انتہائی نقصان دہ ہے۔

فکرِ غامدی یا انڈراسٹینڈنگ اسلام کی تحریروں کا مطالعہ کیا جائے تو جا بجا یہ جملے ملتے ہیں:

اس مسئلہ میں تمام فقہاء کی بالاتفاق یہی رائے ہے لیکن ہمارا خیال ہے کہ ۔۔۔۔
ہمارے علماء کا نقطہ نظر یہی ہے مگر ہمارا موقف یہ ہے کہ ۔۔۔۔
عام طور پر سمجھا جاتا ہے کہ ۔۔۔۔ مگر ہمارے نزدیک یہ بالکل غلط ہے ۔۔۔

جبکہ درست رویہ یہ ہونا چاہئے کہ ۔۔۔۔۔۔
اہل علم کی متفقہ رائے کے بالمقابل کوئی نیا نقطہ نظر پیش کرنے کے بجائے ان کے دلائل پر غور و فکر کیا جائے اور گہرائی میں اتر کر اس کی معنویت تک پہنچنے کی کوشش کی جائے ، اس سے یقیناً صحیح نتیجے تک رسائی ہو جاتی ہے اور انسان شذوذ و تفرد سے محفوظ رہتا ہے !!

صاحبانِ انڈراسٹینڈنگ اسلام / اہل "المورد" کے تفردات اور شذوذات کی کچھ وجوہات تو ضرور ہوں گی مگر بنیادی سبب یہ ہے کہ انہوں نے "اجماع" کی اہمیت اور "اجماع" کی مسلمہ حیثیت کو نظر انداز کر دیا ہے۔ جس کی بنا پر وہ امت مسلمہ کے اجتماعی دھارے سے الگ تھلگ نظر آتے ہیں۔
یہ ایک غیرمناسب رحجان ہے اور مطالعۂ شریعت کے اس طریقہ کے منافی ہے جو صحابہ کرام رضی اللہ عنہم اجمعین اور سلف الصالحین رحمہم اللہ عنہم نے امت کے سامنے پیش کیا ہے۔
کسی استفسار کے بارے میں ایک عالم دین یا فقیہہ کو کیا رویہ اپنانا چاہئے ؟ اس کے متعلق عظیم المرتبت صحابئ رسول عبداللہ بن مسعود (رضی اللہ عنہ) کا قول ذیل میں ملاحظہ فرمائیں :

" إذا سئل أحدكم فلينظر في كتاب الله فإن لم يجده ففي سنة رسول الله فإن لم يجده فيها فلينظر فيما اجتمع عليه المسلمون وإلا فليجتهد "

جب تم میں سے کسی سے کوئی سوال کیا جائے تو اسے چاہئے کہ قرآن مجید سے اس کا حل تلاش کرے ، اگر وہاں نہ پائے تو سنتِ رسول (صلی اللہ علیہ وسلم) میں دیکھے ، اگر وہاں بھی نہ ملے تو پھر ان مسائل کو دیکھے جن پر مسلمانوں کا اتفاق ہے ، اور اگر یہاں بھی اس کا حل میسر نہ ہو تو پھر اجتہاد کرے ۔۔۔
بحوالہ : المقاصد الحسنة ، امام سخاوی

احکامِ شریعت : کیا قانون عوام کے ہاتھ ہے؟

2011-01-06T02:52:00.003+03:00

آج کی ایک فکر انگیز خبر پر انٹرنیٹ کی اردو دنیا میں کافی شور و غل ہے۔
اس حوالے سے بلاگر تانیہ رحمان نے ایک سوال کچھ یوں کیا ہے :
سلمان تاثیر کو قتل کرنا جائز تھا؟
اگرچیکہ اس سوال کے یک لفظی جواب پر راقم الحروف کے کچھ دوست احباب کی بھویں چڑھ جائیں گی مگر حقیقت یہی ہے کہ اس سوال کا کڑوا جواب "نہیں" کی صورت میں ہے !!

براہ مہربانی یاد رکھئے کہ اس "نہیں" کے پیچھے ان احادیثِ صحیحہ کا انکار نہیں ہے جن میں توہینِ رسالت کی سزا "موت" بیان کی گئی ہے۔ احادیثِ صحیحہ سے یقیناً یہ ثابت ہے کہ شاتمِ رسول (صلی اللہ علیہ وسلم) کی سزا موت ہے اور ان احادیث کی شرح میں موقر و معتبر علمائے و ائمہ دین کے اقوال موجود ہیں جن کا انکار نہیں کیا جا سکتا۔

مگر ۔۔۔۔

سوال یہ ہے کہ کسی فرد کو توہینِ رسالت کا موجب یا "شاتمِ رسول" کون قرار دے گا؟

اور شریعت میں قائم "شاتمِ رسول" کی سزا پر عمل درآمد کون کرے گا؟

کیا ایک عام آدمی کو یہ حق دیا گیا ہے؟ اگر ہاں تو یہ میری کم علمی ہے کہ اس ضمن میں کسی مضبوط شرعی دلیل سے میں ناواقف ہوں۔

علامہ البانی رحمة اللہ نے ایک مرتبہ فرمایا تھا : ۔۔۔ اور یقیناً یاد دہانی ایمان والوں کو فائدہ پہنچاتی ہے۔
ممکن ہے جب ہماری قوم جذباتیت کے بھنور سے نکلے تو ایسی یاددہانی اس کو فائدہ پہنچائے۔ ان شاءاللہ۔
اور وہ یاد دہانی بس اتنی ہے کہ ۔۔۔۔۔۔

قتل جیسے سفاکانہ فعل پر تاویلات کے ذریعہ قاتل کی طرفداری مت کیجئے کہ :

اسلام اور دنیا کا کوئی بھی مہذب معاشرہ قانون کو ہاتھ میں لینے کی اجازت نہیں دیتا !!
اگر کسی کو یہ بات ناپسند ہو کہ فلاں فلاں حکمراں فلاں فلاں شرعی قانون کے خلاف بولتا یا اس پر اعتراض کرتا ہے تب بھی شریعت نے قانون کو اپنے ہاتھ میں لینے کا حق عوام کو نہیں دیا ہے !!
علاوہ ازیں ، اگر قانون کے حکمران خود قانون کو ہاتھ میں لے کر اسے کھیل تماشا بنا دیں تب بھی یہ اس بات کا جواز نہیں کہ عوام کو بھی اسی طرح کا "حق" حاصل ہو جائے گا۔

حکمراں سے ہمیں چاہے لاکھ اختلاف ہو ، اس کی (مشروط) اطاعت کا حکم ہمیں نبی کریم (صلی اللہ علیہ) نے یوں دیا ہے :
السَّمْعُ وَالطَّاعَةُ عَلَى الْمَرْءِ الْمُسْلِمِ فِيمَا أَحَبَّ وَكَرِهَ مَا لَمْ يُؤْمَرْ بِمَعْصِيَةٍ ، فَإِذَا أُمِرَ بِمَعْصِيَةٍ فَلَا سَمْعَ وَلَا طَاعَةَ
مسلمان کے لیے امیر کی بات سننا اور اس کی اطاعت کرنا ضروری ہے ۔ ان چیزوں میں بھی جنہیں وہ پسند کرے اور ان میں بھی جنہیں وہ ناپسند کرے ، جب تک اسے معصیت کا حکم نہ دیا جائے۔ پھر جب اسے گناہ کا حکم دیا جائے تو نہ سننا باقی رہتا ہے اور نہ اطاعت کرنا۔
صحيح البخاري , كِتَاب الْأَحْكَامِ , بَاب السَّمْعِ وَالطَّاعَةِ لِلْإِمَامِ مَا لَمْ تَكُنْ

اور مقتول کو برا مت کہئے کہ :

رسول اللہ صلی اللہ علیہ وسلم نے فرمایا :
لَا تَسُبُّوا الْأَمْوَاتَ فَتُؤْذُوا الْأَحْيَاءَ
مُردوں کو گالی مت دو کیونکہ ایسا کرنے سے تم زندوں کو ایذاء دو گے ۔
جامع الترمذي , كِتَاب الْبِرِّ وَالصِّلَةِ , بَاب مَا جَاءَ فِي الشَّتْمِ

یہ ایک عبرت انگیز واقعہ ہے۔ پس اس سے سبق حاصل کرنا چاہئے۔ نہ کہ فریقین کو برا یا بھلا کہنے میں وقت اور قوت ضائع کی جائے۔

updated : ضمیمہ

بشکریہ : فرخ علی قاضی
عبداللہ ناصر رحمانی حفظہ اللہ سے کچھ سوال جواب یوں ہوئے ہیں :
سوال :
کیا اہانتِ رسول (صلی اللہ علیہ وسلم) کے مرتکب کو کوئی بھی عام مسلمان قتل کر سکتا ہے؟
جواب :
یہ بات صحیح ہے کہ اہانت رسول کرنے والے کی سزا موت ہے
لیکن اس کا حق صرف حکمران کو یا اس کے نائب کو ہے ہر کسی کو نہیں
سوال :
بعض لوگ دلیل دیتے ہیں کہ ایک صحابی نے بغیر حکومت کے بھی خود سے اپنی لونڈی کو قتل کر دیا کہ جب اس نے اہانت رسول کی
جواب :
یہ تو ایک واقعہ ہے کہ جب کوئی جذبات میں مغلوب ہوکر ایسا اقدام کرلے تو قدراللہ وماشاء فعل دلائل سے ثابت ہونے کے بعد اس کا مواخذہ پھر نہیں ہونا چاہیے مگر عمومی قاعدہ یہ نہیں کہ ہر کوئی خود سے قتل کر دے
سوال:
مرنے والے پر اظہار افسوس ؟؟
جواب :
نہیں افسوس تو نہیں ہوسکتا۔
سوال:
خوشیاں منانا اور مٹھائیاں تقسیم کرنا کیسا ہے؟؟
جواب:
یہ صحیح نہیں اس کی کوئی دلیل نہیں شریعت میں۔

کیا انسانی عقل کو لامحدود برتری حاصل ہے؟

2010-12-25T16:37:00.002+03:00

کیا قرآن نے انسانی عقل کو لامحدود برتری عطا کی ہے؟
یا پھر یہی سوال کچھ یوں دہرایا جا سکتا ہے کہ :
کیا اللہ تعالیٰ نے انسانی عقل کو زندگی کے ہر معاملے میں فیصلہ کن برتری عطا کی ہے؟

اگر کسی نے قرآن کا "سنجیدگی" سے مطالعہ کیا اور آیاتِ ربانی پر غور و خوص کیا ہے تو اس سوال کا جواب وہ یقیناً نفی میں دے گا۔

ہمارے معاشرے میں کچھ لوگ ہیں جو دین کے معاملات میں عقل کو استعمال کرنے پر بہت زیادہ زور دیتے ہیں اورعلمائے دین کوعقل نہ استعمال کرنے کا طعنہ دیتے ہیں۔ بلکہ کچھ تو آگے بڑھ کر یہاں تک کہہ دیتے ہیں کہ : یہ علماء چونکہ عقل استعمال نہیں کرتے اس لئے اہل علم میں شمار کرنے کے لائق بھی نہیں ہیں۔
ثبوت کے طورپر غلام احمد پرویز صاحب کا یہ فتویٰ ملاحظہ فرمایئے۔ وہ لکھتے ہیں کہ :

بحوالہ : قرآنی فیصلے ص:506
کسی چیز کے حفظ کرنے میں عقل و فکر کو کچھ واسطہ نہیں ہوتا اس لئے حفظ کرنے کوعلم نہیں کہا جا سکتا، ہمارے علماء کرام کی بعینہ یہی حالت ہے کہ انھوں نے قدیم زمانے کی کتابوں کواس طرح حفظ کیا ہوتا ہے کہ انہیں معلوم ہوتا ہے کہ فلاں مسئلہ کے متعلق فلاں کتاب میں کیا لکھا ہے، فلاں امام نے کیا کہا ہے ، فلاں مفسر کا کیا قول ہے ، فلاں محدث کا کیا ارشاد ہے اور جو کچھ انہیں ان کتابوں میں لکھا ملتا ہے وہ اسے حرفاً حرفاً نقل کر دیتے ہیں اس میں اپنی عقل و فکر کو قطعاً دخل نہیں دینے دیتے اس لئے ہم انہیں علمائے دین کہنے کے بجائے Catalogur یعنی حوالہ جات کی فہرست کہتے ہیں اورعلامہ اقبال کے بقول :
' فقیہ شہر قارون ہے لغت ہائے حجازی کا '
قرآن نے اس کو 'حمل اسفار' یعنی کتابیں اٹھائے پھرنے سے تعبیر کیا ہے یہ اپنے محدود دائرے میں معلومات کے حافظ ہوتے ہیں عالم نہیں ہوتے !

عقل پر زور دینے والے "صاحبانِ عقل" دینی معاملات میں عقل کے استعمال کے لئے دلیل کے طور پر قرآن کی متعدد آیات کو پیش کرتے ہیں جس کے باعث ہر وہ شخص جو اپنے آپ کو عقلمند کہلوائے جانے کا خواہش مند ہوتا ہے اس خوبصورت جال میں با آسانی پھنس جاتا ہے۔

قرآن نے عقل کا استعمال کس ضمن میں کرنے کا حکم دیا ہے؟
اور کہاں ہرمسلمان عقل کے بجائے اﷲ اور اس کے رسول کے حکم کا پابند ہے؟

محترم عطاءاللہ ڈیروی صاحب نے اپنے ایک مفید مضمون میں جن آیات کا حوالہ دیا ہے ، شکریے کے ساتھ یہاں پیش خدمت ہے۔

عقل کا استعمال کرنے کی دعوت قرآن میں سب سے زیادہ ان مقامات پر ہے جہاں اﷲ تبارک و تعالیٰ کائنات میں پھیلی ہوئی بے شمار نشانیوں کے ذریعہ انسان کی توجہ توحید باری تعالیٰ کی جانب مبذول کرانا چاہتا ہے مثلاً سورۃ شعراء میں ارشاد ربانی ہے کہ :

قَالَ رَبُّ الْمَشْرِقِ وَالْمَغْرِبِ وَمَا بَيْنَهُمَا إِن كُنتُمْ تَعْقِلُونَ

اﷲ مشرق و مغرب اور جو کچھ ان کے درمیان ہے ان سب کا رب ہے ، کیا تم عقل نہیں رکھتے۔

( سورة الشعرآء : 26 ، آیت : 28 )

یہاں اﷲ تعالیٰ نے اپنی ربوبیت کو اپنی وحدانیت پر دلیل بنایا کہ جب ساری کائنات کا پالنے والا اﷲ ہے تو پھر جو لوگ عبادت میں اﷲ کے ساتھ کسی دوسرے کو شریک کرتے ہیں وہ سراسر عقل کے خلاف کام کرتے ہیں

اور سورۃ بقرۃ میں اﷲ تعالیٰ نے ارشاد فرمایا کہ :

إِنَّ فِي خَلْقِ السَّمَاوَاتِ وَالأَرْضِ وَاخْتِلاَفِ اللَّيْلِ وَالنَّهَارِ وَالْفُلْكِ الَّتِي تَجْرِي فِي الْبَحْرِ بِمَا يَنفَعُ النَّاسَ وَمَا أَنزَلَ اللّهُ مِنَ السَّمَاءِ مِن مَّاءٍ فَأَحْيَا بِهِ الْأَرْضَ بَعْدَ مَوْتِهَا وَبَثَّ فِيهَا مِن كُلِّ دَآبَّةٍ وَتَصْرِيفِ الرِّيَاحِ وَالسَّحَابِ الْمُسَخِّرِ بَيْنَ السَّمَاءِ وَالأَرْضِ لَآيَاتٍ لِّقَوْمٍ يَعْقِلُونَ

بے شک آسمانوں اورزمین کی تخلیق میں، رات اور دن کے فرق میں، کشتی جو سمندر میں لوگوں کے نفع کے واسطے چلتی ہے،اﷲ تعالیٰ کا آسمان سے پانی نازل کرنا جو مردہ زمین کو زندہ کر دیتا ہے ،ہر قسم کے جانوروں کا زمین میں پھیلا دینا، ہواؤں کا چلانا اور بادلوں کا آسمان و زمین کے درمیان معلق کر دینا ، یہ سب نشانیان ہیں ان لوگوں کے لئے جو عقل رکھتے ہیں

( سورة البقرة : 2 ، آیت : 164 )

یہاں کائنات کے نظام کا محکم ہونا اﷲ تعالیٰ کی ربوبیت و وحدانیت پر بطور دلیل لایا گیا ہے تاکہ معمولی سوجھ بوجھ رکھنے والے افراد بھی ایک اور اکیلا رب اور معبود صرف اﷲ تعالیٰ کو تسلیم کر سکیں، اسی طرح اوربھی بہت سی آیات ہیں۔

اس کے علاوہ عقل استعمال کرنے کا حکم گذشتہ اقوام کے حالات و واقعات سے سبق حاصل کرنے کے لئے بھی دیا گیا ہے مثلاً
سورۃ یوسف میں ارشاد ربانی ہے کہ :

وَمَا أَرْسَلْنَا مِن قَبْلِكَ إِلاَّ رِجَالاً نُّوحِي إِلَيْهِم مِّنْ أَهْلِ الْقُرَى أَفَلَمْ يَسِيرُواْ فِي الْأَرْضِ فَيَنظُرُواْ كَيْفَ كَانَ عَاقِبَةُ الَّذِينَ مِن قَبْلِهِمْ وَلَدَارُ الْآخِرَةِ خَيْرٌ لِّلَّذِينَ اتَّقَواْ أَفَلاَ تَعْقِلُونَ

(اے نبی صلی اللہ علیہ وسلم )ہم نے آپ سے پہلے بھی جونبی بھیجے وہ سب مرد تھے جن پرہم نے ان کی بستی والوں کے درمیان میں ہی وحی کی تھی،کیایہ لوگ زمین میں چلتے پھرتے نہیں کہ ان پچھلوں کاانجام اپنی آنکھوںسے دیکھیں اور آخرت کاگھربہترہے ان لوگوں کےلئے جو تقویٰ اختیارکرتے ہیں،کیا تم لوگ عقل نہیں رکھتے

( سورة يوسف : 12 ، آیت : 109 )

یہاں ان لوگوں کوعقل کااستعمال کرنے کاحکم دیاگیاجو گذشتہ انبیاء کرام کی امتوں کاحشر دیکھ کربھی انجان بنے ہوئے تھے

اسی طرح عقل کااستعمال کرنے کا مشورہ قرآن نے ان لوگوں کو بھی دیا ہے ہے جواﷲ تعالیٰ کے احکامات اور بنیادی اخلاقیات کی پامالی پرکمربستہ ہیں اور سمجھتے ہیں کہ برائی کا انجام برا نہیں ہوتا
مثلاً سورۃ الانعام میں اﷲ تعالیٰ نے ارشادفرمایا کہ :

قُلْ تَعَالَوْاْ أَتْلُ مَا حَرَّمَ رَبُّكُمْ عَلَيْكُمْ أَلاَّ تُشْرِكُواْ بِهِ شَيْئًا وَبِالْوَالِدَيْنِ إِحْسَانًا وَلاَ تَقْتُلُواْ أَوْلاَدَكُم مِّنْ إمْلاَقٍ نَّحْنُ نَرْزُقُكُمْ وَإِيَّاهُمْ وَلاَ تَقْرَبُواْ الْفَوَاحِشَ مَا ظَهَرَ مِنْهَا وَمَا بَطَنَ وَلاَ تَقْتُلُواْ النَّفْسَ الَّتِي حَرَّمَ اللّهُ إِلاَّ بِالْحَقِّ ذَلِكُمْ وَصَّاكُمْ بِهِ لَعَلَّكُمْ تَعْقِلُونَ

(اے نبی صلی اللہ علیہ وسلم ) کہہ دیجئے آؤمیںبتاؤں کہ تمہارے رب نے تم پر کیاحرام کیاہے ،یہ کہ اﷲ کے ساتھ کسی کوبھی شریک کرنا،والدین کے ساتھ احسان کرتے رہو،اولاد کومفلسی کے خوف سے قتل نہ کرو ہم انہیں بھی رزق دیتے ہیں اورتمہیں بھی،فحش کے قریب بھی مت جاؤ خواہ وہ کھلاہو یا چھپاہواورکسی ایسی جان کو ناحق قتل نہ کرو جسے اﷲنے حرام کیاہویہ اﷲ تعالیٰ کی جانب سے تمہیں وصیت ہے شاید کہ تم عقل سے کام لو

( سورة الانعام : 6 ، آیت : 151 )

یہاں تمام ایسی بنیادی اخلاقیات کاحکم دیا جا رہا ہے جو اس قبل دیگر تمام شریعتوں او ر مذاہب میں بھی موجود رہی تھیں اوران احکامات سے اعراض اورخلاف ورزی ہمیشہ سے فساد فی الارض کاباعث رہی تھی اس لئے ان احکامات کی اہمیت و افادیت کوسمجھنے کی غرض سے یہاں عقل و فہم انسانی کودعوت دی جارہی ہےتاکہ مسلمان ان احکامات کی پابندی کواپنے اوپرکوئی بوجھ نہ سمجھیں

اسی طرح بنیادی اخلاقیات کے خلاف ایک چیزقول و فعل کا تضاد بھی ہے ، اس کے متعلق قرآن کریم میں اﷲ تعالیٰ نے فرمایا کہ :

أَتَأْمُرُونَ النَّاسَ بِالْبِرِّ وَتَنْسَوْنَ أَنفُسَكُمْ وَأَنْـتُمْ تَتْلُونَ الْكِتَابَ أَفَلاَ تَعْقِلُونَ

کیاتم دوسروں کانیکی کاحکم دیتے ہواورخو د اپنے آپ کوبھول جاتے ہوحالانکہ تم تو کتاب بھی پڑھتے ہو پس کیا تم عقل نہیں رکھتے

( سورة البقرة : 2 ، آیت : 44 )

یعنی کسی غلط عمل کی کوئی تاویل یا توجیح کرکے انسان اپنے آپ کودھوکا نہ دے بلکہ عقل کے تقاضے کوسامنے رکھتے ہوئے جس نیکی کاحکم دوسروں کو دے رہا ہے خود بھی اس پر عمل کرنے کی کوشش کرے

اسی طرح ہر وہ بات جو خلاف واقعہ اور زمان ومکان کے اعتبار سے محال ہو اس پر اصرار کرنے والوں کو بھی قرآن نے عقل کے استعمال کا مشورہ دیا ہے
مثلاًسورۃ آل عمرآن میں ارشاد ہوا کہ:

يَا أَهْلَ الْكِتَابِ لِمَ تُحَآجُّونَ فِي إِبْرَاهِيمَ وَمَا أُنزِلَتِ التَّورَاةُ وَالْإِنجِيلُ إِلاَّ مِن بَعْدِهِ أَفَلاَ تَعْقِلُونَ

اے اہل کتاب ابراھیم علیہ السلام کے(مذہب کے) بارے میں تم کیوں جھگڑتے ہوحالانکہ توریت اورانجیل توان کے بعد نازل ہوئیں ہیں کیاتم عقل نہیں رکھتے

( سورة آل عمران : 3 ، آیت : 65 )

یہاں اﷲ تعالیٰ یہود و نصاریٰ کے اس تنازع کے تذکرہ کر رہا ہے جس میں دونوں فریق یہ دعویٰ کرتے تھے کہ ابراھیم علیہ السلام ان کے مذہب پر تھے حالانکہ یہودیت اورعیسائیت جن آسمانی کتابوں کے بعد قائم ہوئی وہ ابراھیم علیہ السلام کے بعد ہیں اسلئے ایسی بات محض بے عقلی کے سوا کچھ نہیں
اس لئے قرآن اسکی مذمت کر رہا ہے

یعنی بالا تمام آیاتِ ربانی سے ظاہر ہوا کہ ۔۔۔۔
عقل کو استعمال کرنے کی دعوت ۔۔۔۔

قرآن کی تشریح
یا احکامات
یا حدود اﷲ سے متعلق آیات

کے ضمن میں پورے قرآن میں کہیں بھی نہیں ہے !!
بلکہ اسکی تشریح اﷲ تعالیٰ نے نبی کریم صلی اللہ علیہ وسلم کے اقوال ، افعال و اعمال کے ذریعہ خود فرمائی ہے
جس کی دلیل قرآن کی یہ آیت ہے۔ فرمایا:

فَإِذَا قَرَأْنَاهُ فَاتَّبِعْ قُرْآنَهُ
ثُمَّ إِنَّ عَلَيْنَا بَيَانَهُ

جب ہم پڑھائیں تو ہمارے پڑھانےکے بعد پڑھو ، پھراسکی تشریح بھی ہمارے ذمہ ہے

( سورة القيامة : 75 ، آیت : 18-19 )

اس لئے وہ لوگ جو قرآن کی تشریح عقل ، فلسفہ اور منطق کے ذریعہ کرنا چاہتے ہیں وہ بلامبالغہ ایک بڑی غلط راہ پر ہیں۔

البتہ سورۃ بقرۃ کی ایک آیت ایسی ہے جہاں کسی کو اس قسم کا اشکال ہو سکتا ہے اس آیت کے الفاظ یہ ہیں:

يَسْأَلُونَكَ عَنِ الْخَمْرِ وَالْمَيْسِرِ قُلْ فِيهِمَا إِثْمٌ كَبِيرٌ وَمَنَافِعُ لِلنَّاسِ وَإِثْمُهُمَآ أَكْبَرُ مِن نَّفْعِهِمَا وَيَسْأَلُونَكَ مَاذَا يُنفِقُونَ قُلِ الْعَفْوَ كَذَلِكَ يُبيِّنُ اللّهُ لَكُمُ الْآيَاتِ لَعَلَّكُمْ تَتَفَكَّرُونَ

یہ لو گ جوئے اورشراب کے بارے میں سوال کرتے ہیں ، کہہ دیجئے یہ بڑے گناہ ہیں اوراس میں لوگوں کوکچھ منفعت بھی ہے لیکن ان کاگناہ انکے نفع سے کہیں بڑھ کر ہے اوروہ لوگ پوچھتے ہیں کہ وہ (اﷲ کی راہ میں ) کیاخرچ کریں، کہہ دیجئے کہ وہ سب جوتمہاری ضرورت سے زائد ہے ،اس طرح ہم اپنی آیات کوکھول کربیان کردیتے ہیں تاکہ یہ لوگ غور وفکر کریں

( سورة البقرة : 2 ، آیت : 219 )

یہاں اس آیت میں اﷲ تبارک وتعالیٰ نے شراب اور جوئے کے ممانعت کی حکمت بیان کی ہے اوراس کے بالمقابل صدقہ کاحکم دیا ہے تاکہ لوگ ان معاملات میں تھوڑے اورظاہر ی فائدے کونہ دیکھیں بلکہ اس کے گناہ اور نقصان کومدنظر رکھیں جو نفع کے مقابلے میں بہت زیادہ ہے اوراس کے بعد غور فکر کی دعوت اس لئے دی گئی ہے تاکہ لوگ دین کے باقی احکامات پر بھی یہ یقین رکھتے ہوئے عمل کریں کہ ان سب احکامات کی کوئی نہ کوئی وجہ اورحکمت ضرور ہے اگرچہ ہم جانتے نہ ہوں
اور اس جانب اشارہ بھی ہے کہ جولوگ ان احکامات پرغور فکرکریں گے ان کواس میں سے بعض احکامات کی حکمت معلوم بھی ہوجائے گی لیکن اصل بات یہ ہے کہ ان احکامات پرعمل کرناسب کے لئے فرض ہے مگر انکی حکمت کو جاننا ہر ایک پر فرض نہیں کیونکہ یہاں لفظ "لعلکم" استعمال ہوا ہے جس کے معنی ہیں شاید کہ تم ، امید ہے کہ تم یا توقع ہے کہ تم غورو فکرکرو گے ۔

لیکن غلام احمد پرویز صاحب نے صرف "عقل" کوعلم قرار دیتے ہوئے ان تمام علماء کرام کو جاہل اورکتابیں ڈھونے والا گدھا قرار دیا ہے جو تمام کتابوں کو بالائے طاق رکھ کر صرف عقل کی مدد سے قرآن کی تشریح نہیں کرتے۔
اور اسی طرزِ فکر کا مظاہرہ اردو کی انٹرنیٹ کمیونیٹی میں جا بجا دیکھا جا سکتا ہے کہ کس طرح اپنے ہی دینِ حنیف کے علماء کرام کو مولوی / ملا کہہ کر اپنی عقل کو برتر اور علماء کو پستی کا شکار بتایا جا رہا ہے !!

جبکہ لفظ "علم" کے معنی ہی "جاننا" ہیں
اورعلامہ کا مطلب ہے : بہت زیادہ جاننے والا
یعنی عالم دین اسی شخص کو کہا جائے گا جو قرآن کی کسی آیت یا کسی حدیث کے بارے میں گذشتہ اہل علم کے اقوال کو جانتا ہو کیونکہ صراط مستقیم مشروط ہے ان لوگوں کے اقوال ، افعال و اعمال کے استفادہ سے جن پراﷲ تعالیٰ کا انعام ہوا اور جو قرآن کریم کے حوالے سے انبیاء ، صدیقین ، شہداء اور صالحین ہیں۔

اگر بقول پرویز صاحب ہدایت اورعلمیت مشروط ہے عقل سے تو پھر قرآن میں فلسفی ، مفکر ، مدبراورعلم منطق کے ماہر افراد کے راستے کو ہی "صراط مستقیم" ہونا چاہیے تھا جبکہ قرآن کے مطابق ایسا ہے نہیں !!

خاکی ہے مگر "خاک" سے آزاد ہے مومن

2010-12-22T16:47:00.001+03:00

پہلے ۔۔۔۔ ایک کتاب سے ایک دلچسپ اقتباس ملاحظہ فرمائیے ۔۔۔۔

یہ 1918ء کا ذکر ہے
میں قبلہ والد صاحب کے ہمراہ امرتسر گیا ۔ میں ایک چھوٹے سے گاؤں کا رہنے والا ، جہاں نہ بلند عمارات ، نہ مصفا سڑکیں ، نہ کاریں ، نہ بجلی کے قمقمے اور نہ اس وضع کی دکانیں ۔ دیکھ کر دنگ رہ گیا۔ لاکھوں کے سامان سے سجی ہوئی دکانیں۔ اور بورڈ پر کہیں رام بھیجا سنت رام لکھا ہے ، کہیں دُنی چند اگروال، کہیں سنت سنگھ سبل اور کہیں شادی لال فقیر چند۔ ہال بازار کے اس سرے سے اس سرے تک کسی مسلمان کی کوئی دکان نظر نہ آئی۔ ہاں مسلمان ضرور نظر آئے۔ کوئی بوجھ اٹھا رہا تھا کوئی گدھے لاد رہا تھا۔کوئی مالگدام سے بیل گاڑی پہ ہندو کا سامان لاد رہا تھا ۔ کوئی کسی ٹال پر لکڑیاں چیر رہا تھا اور کوئی بھیک مانگ رہا تھا۔ غیر مسلم کاروں اور فٹنوں پر جا رہے تھے اور مسلمان اڑھائی من بوجھ کے نیچے دبا ہوا مشکل سے قدم اٹھا رہا تھا۔ ہندوؤں کے چہروں پر رونق بشاشت اور چمک تھی اور مسلمان کا چہرہ فاقہ، مشقت ، فکر اور جھریوں کی وجہ سے افسردہ و مسخ شدہ۔
میں نے والد صاحب سے پوچھا :
"کیا مسلمان ہر جگہ اسی طرح سے زندگی بسر کر رہے ہیں"
والد صاحب : ہاں
میں: اللہ نے مسلمان کو بھی ہندوکی طرح دو ہاتھ دو پاؤں اور ایک سر عطا کیا ہے تو پھر کیا وجہ ہے کہ ہندو تو زندگی کے مزے لوٹ رہا ہے اور مسلمان ہر جگہ حیوان سے بدتر زندگی بسر کر رہا ہے؟
والد صاحب : یہ دنیا مردار سے زیادہ نجس ہے اور اس کے متلاشی کتوں سے زیادہ ناپاک۔ اللہ نے یہ مردار ہندوؤں کے حوالے کر دیا ہے اور جنت ہمیں دے دی ہے۔ کہو کون فائدے میں رہا ؟ ہم یا وہ ۔
میں: اگر دنیا واقعی مردار ہے تو آپ تجارت کیوں کرتے ہیں اور مال تجارت خریدنے کے لیے امرت سر تک کیوں آئے ہیں ؟ ایک طرف دنیوی سازوسامان خرید کر نفع کمانا اور دوسری طرف اسے مردار قرار دینا ، عجیب قسم کی منطق ہے ۔
والد صاحب: بیٹا ! بزرگوں سے بحث کرنا سعادت مندی نہیں۔ جو کچھ میں نے تمھیں بتایا ہے وہ ایک حدیث کا ترجمہ ہے ۔ رسول اللہ نے فرمایا تھا :
"الدنیا جیفۃ و طلابھا کلاب" (یہ دنیا ایک مردار ہے اور اس کے متلاشی کتے)۔

حدیث کا نام سن کر میں ڈر گیا اور بحث بند کر دی۔ سفر سے واپس آ کر میں نے گاؤں کے مُلا سے اپنے شبہات کا اظہار کیا۔ اس نے بھی وہی جواب دیا۔ میرے دل میں اس معمے کو حل کرنے کی تڑپ پیدا ہوئی۔ لیکن میرے قلب و نظر پر تقلید کے پہرے بیٹھے ہوئے تھے۔ علم کم تھا اور فہم محدود ، اسلیے معاملہ زیادہ الجھتا گیا۔

یہ اقتباس ہے جناب غلام جیلانی برق کی کتاب "دو اسلام" کا۔ (اقتباس کی کمپوزنگ کیلیے اردو محفل کے رکن طالوت کا شکریہ)۔

کتاب "دو اسلام" کے متعلق میں نے اپنی پچھلی تحریر میں لکھا تھا کہ : یہ جناب برق مرحوم کے اُس دور کی کتاب تھی جس دور میں وہ "حدیث" سے برگشتہ تھے۔ بعد میں وہ تائب ہوئے ، اِس کتاب سے براءت کا اظہار کیا اور ناشرین سے گذارش کی کہ دوبارہ اس کتاب کو نہ شائع کریں۔ پھر انہوں نے "تاریخِ حدیث" نامی انتہائی اہم کتاب بھی تحریر فرمائی۔ اللہ انہیں جزائے خیر سے نوازے۔

"دو اسلام" کا بہترین جواب مولانا مسعود احمد بی۔ایس۔سی نے اپنی ایک کتاب بعنوان "تفہیم اسلام بجواب دو اسلام" کے ذریعے دیا تھا۔ الحمداللہ یہ کتاب بھی اب پی۔ڈی۔ایف فائل کی شکل میں شائقین کے مطالعے کے لیے دستیاب ہے۔ اس تحریر کے اختتام پر کتاب کا ڈاؤن لوڈ لنک فراہم کیا جا رہا ہے۔

"دو اسلام" کے بالا اقتباس کا مفصل جواب "تفہیم اسلام" کے صفحہ:20 تا 35 پھیلا ہوا ہے۔ اسی جواب کو یہاں مختصراً لکھنے کی کوشش کر رہا ہوں۔

اول تو یہ کہ جس قول کو حدیث کے نام سے ذکر کیا گیا ہے ، یعنی :
الدنيا جيفة وطلابها كلاب (یہ دنیا مردار ہے اور اسکے طلبگار کتے ہیں)
یہ نبی کریم صلی اللہ علیہ وسلم سے ثابت قول نہیں ہے۔ امام صغانی (متوفی : 1252ء) کی مشہور کتاب "الموضوعات" کے صفحہ:6 پر اس روایت کو تابعی "شهر بن حوشب" سے منسوب قول کے طور پر ذکر کیا گیا ہے۔

دنیاوی عیش و عشرت اگر کسی کے پاس زیادہ ہو اور کسی کے پاس کم تو اس سے یہ لازم نہیں آتا کہ اللہ تعالیٰ مالدار سے خوش اور فقراء سے ناراض ہے۔ قرآن کریم میں حضرت موسیٰ (علیہ السلام) و قارون ، حضرت نوح (علیہ السلام) اور ان کے صحابہ اور خود نبی کریم (علیہ الصلوٰۃ والسلام) اور آپ کے اصحابِ جلیل کے جو واقعات بیان ہوئے ہیں ، اس کے مطابق تو ہر رسول کے زمانے میں کافر خوش حال تھے۔

دنیا میں دولت و آسائشوں کی فراوانی سے دھوکہ اسلیے نہیں کھانا چاہئے کہ یہ ایک بےحقیقت شے ہے جبکہ "حق" ایک علیحدہ چیز ہے جس کا معیار دنیا کی زیب و زینت نہیں ہے۔ جیسا کہ سورہ طٰہ (20)، آیت:131 میں ارشاد ہوا ہے ۔۔۔۔
کافروں کو جو مال ہم نے دے رکھا ہے اس کو نظر اٹھا کر بھی نہ دیکھو ، یہ محض دنیاوی جاہ و حشمت ہے ، تاکہ ہم اس میں ان کی آزمائش کریں اور تمہارے رب کا رزق بہتر ہے اور زیادہ باقی رہنے والا ہے۔

اگر دنیا اچھی چیز ہوتی تو اللہ تعالیٰ اس کی طمع سے ہرگز نہ روکتا۔ حتیٰ کہ ازواج مطہرات (رضی اللہ عنھن) سے فرماتا ہے کہ دنیا کی چاہ و طلب ناپسندیدہ شئے ہے۔ (ملاحظہ ہو سورہ الاحزاب:29)

بےشک اللہ تعالیٰ نے قرآن مجید میں دنیاوی نعمتوں کا احسان جتایا ہے اور مال و دولت کو اپنا فضل قرار دیا ہے۔ لیکن قرآن و حدیث میں جہاں کہیں "دنیا" کا لفظ آیا ہے اس سے وہ دنیا مراد ہے جس میں پھنس کر انسان اللہ کی یاد سے غافل ہو جائے۔ ایک مسلمان کے مقابل کافر کو نہ حساب کتاب کا خوف ہوتا ہے ، نہ حلال حرام کی تمیز اور نہ آخرت کی فکر۔ جیسا کہ سورہ الانعام (6) کی آیت:32 اور سورہ الحدید (57) کی آیت:20 میں بیان ہوا ہے۔ حتیٰ کہ ایسی دنیا کی طرف مائل ہونے والے کو سورہ الاعراف (7) ، آیت:176 میں "كمثل الكلب" (کتے کی مانند) قرار دیا گیا ہے۔

جبکہ مومن کی دنیا یہ ہے کہ ۔۔۔۔
یہ ایسے لوگ ہیں کہ تجارت اور خرید و فروخت ، ان کو اللہ کے ذکر اور نماز ادا کرنے اور زکوٰۃ دینے سے غافل نہیں کرتی ، وہ اس دن سے ڈرتے رہتے ہیں جس دن دل اور آنکھیں الٹ جائیں گی۔
(سورہ النور:44 ، آیت:37)

یعنی عیش و آسائشوں کی فراوانی اور ان کے حصول میں انہماک ایک مومن کو نہ اللہ کی یاد سے غافل کرتا ہے اور نہ ہی وہ اس کی حرص میں مبتلا ہوتا ہے۔ بلکہ ایک مومن دنیاوی ساز و سامان ، مال و اولاد ، کو آزمائش کی چیزیں سمجھتا ہے اور ان کو اس ہی طریقہ سے استعمال کرتا ہے جس طریقہ سے استعمال کا اللہ نے حکم دیا ہے۔

اسی طرح صحیح بخاری کی ایک طویل حدیث میں دونوں دنیاؤں کا فرق بتاتے ہوئے نبی کریم صلی اللہ علیہ وسلم نے ارشاد فرمایا تھا ۔۔۔۔۔
۔۔۔۔ پس اس مسلم کا مال کتنا اچھا ہے جو اپنے مال سے مسکین ، یتیم اور مسافر کو دیتا رہتا ہے اور بےشک جو شخص اس مال کو ناجائز طریقہ سے لے گا وہ اس شخص کی طرح ہے کہ کھائے اور سیر نہ ہو اور وہ مال اس پر قیامت کے دن گواہ ہوگا۔
صحیح بخاری ، کتاب الزکوٰۃ

حدیثِ بالا سے ثابت ہوا کہ "دنیا" سے مراد مسلم مومن کی دنیا نہیں کہ جس کو وہ حلال طریقہ سے حاصل کرتا ہے ، اس کا حریص نہیں ہوتا اور پھر اس کے خرچ کرنے میں بخل نہیں کرتا ۔۔۔۔ بلکہ "دنیا" سے مراد وہ دنیا ہے جس کو حرص و طمع کے ساتھ ، جائز و ناجائز ہر طریقہ سے حاصل کیا جائے اور اللہ کے راستے میں خرچ نہ کیا جائے۔ اور یہی وہ دنیا ہے جو مردار ہے اور اس کے طالب کتے ہیں۔

***
تفہیم اسلام - از : مسعود احمد بی ایس سی
صفحات : 579
پ۔ڈ۔ف فائل سائز : 58 ایم۔بی
ڈاؤن لوڈ لنک : Download-Tafheem-e-Islam

نیکی کی تلقین اور برائی سے روکنا ۔۔۔؟

2010-12-20T01:42:00.001+03:00

ہمارے معاشرے میں بسا اوقات ایسا دیکھا گیا ہے کہ انجانے لوگ برسرعام ہمیں ٹوک دیتے ہیں۔ کبھی کہہ دیا کہ : مردِ مسلمان کے لیے ضروری ہے کہ پائینچے ٹخنوں سے اوپر ہوں۔ غیروں کے فیشن کا کیا ہے ہر پل تبدیل ہوتا رہتا۔ کبھی کسی خاتون کو اٹھا کر کہہ دیا کہ سر پر دوپٹہ ڈال لینے سے آپ کا کیا بگڑ جائے گا؟ کبھی کسی بچے کو ٹوک دیا کہ خراب زبان استعمال مت کیا کرو بیٹے ، کیا ماں باپ نے ایسا ہی سکھایا ہے تمہیں؟

جی ہاں ! یہ ہمارے مسلم معاشرہ کی خصوصیات ہیں !!
کبھی عقلی طور سے سوچا جائے تو گلوبل ولیج میں یہ کچھ عامیانہ سی حرکت نظر آتی ہے۔ اور اس بات پر حیرانی ہوتی ہے کہ یہ ناصحانہ انداز صرف مسلمانوں میں ہی کیوں؟ جبکہ ہونا تو یہ چاہئے کہ پہلے خود اپنے اعمال درست کئے جائیں پھر دوسروں کو نصیحت کی جائے جیسا کہ آیتِ ربانی ہے :

أَتَأْمُرُونَ النَّاسَ بِالْبِرِّ وَتَنسَوْنَ أَنفُسَكُمْ وَأَنتُمْ تَتْلُونَ الْكِتَابَ أَفَلاَ تَعْقِلُون

کیا تم لوگوں کو بھلائی کا حکم دیتے ہو اور اپنے آپ کو بھول جاتے ہو؟ حالانکہ تم کتاب پڑھتے ہو ، کیا تم عقل نہیں رکھتے؟

( البقرة:2 - آيت:44 )

مگر ۔۔۔۔۔۔
کیا یہ "شرط" ضروری ہے کہ : پہلے خود کی اصلاح کر لی جائے اس کے بعد دوسروں کی اصلاح کی طرف توجہ کی جائے؟
اگر دوسروں کی اصلاح کے لیے ایسی شرط کا پورا کرنا پہلے لازم قرار دے دیا جائے تو ۔۔۔۔۔ تو پھر ہوگا یہ کہ ہم کسی کو بھی "فریضۂ احتساب" ادا کرنے والا نہ پائیں گے اور اس طرح اسلام کا ایک عظیم فریضہ "امر بالمعروف و نھی عن المنکر" معطل ہو کر رہ جائے گا !!

علمائے امت نے اس بات کو نہایت واضح طور پر بیان فرمایا ہے۔

وقال مالك عن ربيعة بن أبي عبد الرحمن سمعت سعيد بن جُبير يقول: لو كان المرء لا يأمر بالمعروف ولا ينهى عن المنكر حتى لا يكون فيه شيء، ما أمر أحد بمعروف ولا نَهَى عن منكر. قال مالك: وصدق، من ذا الذي ليس فيه شيء!.

حضرت سعید بن جبیر (رحمۃ اللہ علیہ) فرماتے ہیں:
اگر کوئی شخص اس وقت تک نیکی کا حکم نہ دے ، اور برائی سے نہ روکے ، جب تک خود اس میں کوئی (برائی) نہ رہے ، تو (پھر تو) کوئی شخص نیکی کا حکم نہ دے سکے گا اور برائی سے نہ روک سکے گا۔
امام مالک (رحمة اللہ علیہ) قولِ بالا پر تبصرہ کرتے ہوئے فرماتے ہیں:
"اور انہوں (سعید بن جبیر) نے سچ کہا ، وہ کون ہے جس میں کوئی چیز (خرابی) نہیں؟"
بحوالہ : تفسیر قرطبی ، آیت : البقرہ-44 // آن لائن ربط

وقال الحسن لمطرِّف بن عبد اللَّه: عِظ أصحابك؛ فقال إني أخاف أن أقول ما لا أفعل؛ قال: يرحمك الله! وأيّنا يفعل ما يقول! ويودّ الشيطان أنه قد ظَفِر بهذا، فلم يأمر أحد بمعروف ولم ينه عن منكر.

حضرت حسن (رحمة اللہ علیہ) نے مطرف بن عبداللہ (رحمة اللہ علیہ) سے کہا:
اپنے ساتھیوں کو نصیحت کیجئے۔
مطرف بن عبداللہ (رحمة اللہ علیہ) نے جواباً کہا :
میں ڈرتا ہوں کہ وہ بات کہہ نہ دوں جس کو میں خود نہیں کرتا۔
یہ سن کر حضرت حسن (رحمة اللہ علیہ) کہنے لگے :
اللہ تعالیٰ آپ پر رحم فرمائے۔ ہم میں کون ایسا ہے جو وہ (سب کچھ) کرتا ہے ، جو وہ کہتا ہے؟ شیطان اسی بات کے ساتھ اپنا مقصد حاصل کرنا چاہتا ہے ، (تاکہ) پھر کوئی نیکی کا حکم نہ دے اور نہ ہی برائی سے روکے۔
بحوالہ : تفسیر قرطبی ، آیت : البقرہ-44 // آن لائن ربط

امام طبری علیہ الرحمۃ اسی بات کو واضح کرتے ہوئے کہتے ہیں :

واما من قال لا يأمر بالمعروف الا من ليست فيه وصمة فان أراد أنه الأولى فجيد والا فيستلزم سد باب الأمر إذا لم يكن هناك غيره

اور جس نے یہ کہا کہ :
"نیکی کا حکم وہی دے ، جس میں کوئی غلطی نہ ہو"
اگر کہنے والے کا مقصود یہ ہے کہ 'یہ بہترین صورت ہے' تو یہ عمدہ (بات) ہے۔
بصورت دیگر اس فریضہ کو ادا کرنے والے کسی دوسرے شخص کے موجود نہ ہونے کی صورت میں نیکی کے حکم دینے کا دروازہ بند ہو جائے گا۔
بحوالہ : فتح الباری شرح بخاری ، باب الفتنة التي تموج كموج البحر // آن لائن ربط

امام ابوبکر الرازی الجصاص علیہ الرحمة فرماتے ہیں :

وجب أن لا يختلف في لزوم فرضه البر والفاجر لأن ترك الإنسان لبعض الفروض لا يسقط عنه فروضا غيره ألا ترى أن تركه للصلاة لا يسقط عنه فرض الصوم وسائر العبادات فكذلك من لم يفعل سائر المعروف ولم ينته عن سائر المناكير فإن فرض الأمر بالمعروف والنهي عن المنكر غير ساقط عنه

(نیکی کا حکم دینے کے متعلق) لازم ہے کہ نیک اور فاسق پر اس کے واجب ہونے کے بارے میں کچھ فرق نہ ہو ، (بلکہ اس کا ادا کرنا دونوں پر واجب ہے) کیونکہ انسان کے بعض واجبات کے چھوڑنے سے دوسرے واجبات کا چھوڑنا لازم نہیں آتا !
کیا تم نے نہیں دیکھا کہ نماز کا ترک کرنا ، انسان کے روزوں اور دوسری عبادات کے ترک کرنے کے لیے باعثِ جواز نہیں بن سکتا۔ اسی طرح جو شخص تمام نیکیاں بجا نہیں لا سکتا ، اور تمام برائیوں سے اجتناب نہیں کر سکتا ، اس پر سے بھی نیکی کا حکم دینے اور برائی سے روکنے کا واجب ساقط نہیں ہوتا۔
بحوالہ : احکام القرآن ، امام ابی بکر الجصاص // آن لائن ربط

اور اسی بات کو امام نووی علیہ الرحمۃ ، ایک دوسرے انداز سے واضح کرتے ہوئے فرماتے ہیں :

قال العلماء: ولا يشترط في الاَمر والناهي أن يكون كامل الحال، ممتثلاً ما يأمر به، مجتنبا ما ينهى عنه، بل عليه الأمر وإن كان مخلاً بما يأمر به، والنهي وإن كان متلبسا بما ينهى عنه، فإنه يجب عليه شيئان: أن يأمر نفسه وينهاها، ويأمر غيره وينهاه. فإذا أخل بأحدهما كيف يباح له الإخلال بالاَخر؟

علمائے کرام نے کہا ہے کہ (نیکی کا) حکم دینے اور (برائی سے) روکنے والے کے لیے ضروری نہیں کہ وہ خود درجۂ کمال کو پہنچا ہوا ہو۔ بلکہ اس پر (نیکی کا) حکم دینا واجب ہے، اگرچہ وہ اسے پوری طرح ادا کرنے والا نہ ہو۔ اسی طرح (برائی سے) روکنا اس پر فرض ہے اگرچہ اس کا دامن اس (برائی) سے آلودہ ہی کیوں نہ ہو۔
پس اس پر دو چیزیں واجب ہیں :
1۔ اپنے نفس کو (نیکی کا) حکم دے اور (برائی سے) روکے
2۔ دوسروں کو (نیکی کا) حکم دے اور (برائی سے) روکے
اور اگر اس نے ایک واجب میں کوتاہی کی ، تو اس کے لیے دوسرے واجب میں غفلت برتنا کیسے جائز ہو گیا؟
بحوالہ : عون المعبود شرح سنن أبي داود - كِتَاب الْمَلَاحِمِ // آن لائن ربط

بےشک یہ بات درست نہیں کہ خود سراسر بےعمل ہو کر دوسروں کو نصیحتیں کرتے جائیں۔ لیکن اس کا یہ مطلب بھی نہیں کہ "امر بالمعروف و نھی عن المنکر" کا فریضہ اسلیے چھوڑ دیا جائے کہ خود ہم "بےعمل" ہیں۔
سورہ البقرہ کی بالا آیت:44 کی تفسیر میں علامہ ابن کثیر علیہ الرحمۃ فرماتے ہیں :

وليس المراد ذمهم على أمرهم بالبر مع تركهم له

اس آیت سے مراد یہ نہیں کہ نیکی کا حکم دینے کے ساتھ نیکی ترک کرنے پر ان کی مذمت کی گئی ہے ، بلکہ نیکی کے چھوڑنے پر (ان کی مذمت کی گئی) ہے۔
بحوالہ : تفسیر ابن کثیر ، آیت : البقرہ-44 // آن لائن ربط

اسی طرح امام قرطبی اس آیت کی تفسیر میں لکھتے ہیں :

اعلم وفّقك الله تعالى أن التوبيخ في الآية بسبب ترك فعل البر لا بسبب الأمر بالبر

جان رکھو ! اللہ تعالیٰ تجھے توفیق دے کہ اس آیت میں توبیخ کا سبب نیکی کا نہ کرنا ہے ، نیکی کا حکم دینا باعثِ توبیخ نہیں۔
بحوالہ : تفسیر قرطبی ، آیت : البقرہ-44 // آن لائن ربط

کم سے کم ہمارا معاشرہ اس قدر تو زندہ ہے کہ لوگ بےعمل سہی مگر امر بالمعروف و نھی عن المنکر کا ہی کچھ خیال کر لیتے ہیں۔ اگر یہ بھی باقی نہ رہے تو پھر وہی ہوگا جس کی طرف حضرت حسن بصری رحمۃ اللہ علیہ نے اشارہ کرتے ہوئے کہا تھا کہ :

شیطان اسی بات کے ساتھ اپنا مقصد حاصل کرنا چاہتا ہے ، (تاکہ) پھر کوئی نیکی کا حکم نہ دے اور نہ ہی برائی سے روکے !!

انکارِ حدیث سے تاریخِ حدیث تک ۔۔۔

2010-12-18T17:28:00.006+03:00

۔۔۔ انسانی فکر ایک متحرک چیز ہے جو کسی ایک مقام پر مستقل قیام نہیں کرتی اور سدا خوب سے خوب تر کی تلاش میں رہتی ہے۔ جس دن فکرِ انسان کا یہ ارتقاء رک جائے گا علم کی تمام راہیں مسدود ہو جائیں گی۔
کمال صرف ربِّ ذو الجلال کا وصف ہے وہ جو بات کہتا ہے وہ از ابتدا تا انتہا ہر لحاظ سے کامل ہوتی ہے اور کسی تغیر کو قطعاً گوارا نہیں کرتی۔ لیکن انسان صداقت تک پہنچتے سو بار گرتا ہے۔ میں بھی بارہا گرا ، اور ہر بار لطفِ ایزدی نے میری دستگیری کی کہ اٹھا کر پھر ان راہوں پر ڈال دیا جو صحیح سمت کو جا رہی تھیں۔
والحمد للہ علیٰ ذلک

بالا اقتباس دراصل جناب غلام جیلانی برق کی کتاب "تاریخِ حدیث" کے مقدمہ (حرف اول) کی آخری سطریں ہیں۔

غلام جیلانی برق ۔۔۔۔۔
یہ وہ نام ہے جس نے "فتنہ انکارِ حدیث" کے فروغ کے حوالے سے خوب بدنامی سمیٹی تھی۔ اسی بدنامی کے حوالے سے آپ کی چند مشہور کتابوں میں سے ایک کتاب کا عنوان ہے : دو اسلام
اس عنوان کے سہارے جناب برق مرحوم نے یہ ثابت کرنے کی کوشش کی تھی کہ مسلم معاشرے میں "صرف قرآن" والا اسلام نہیں بلکہ خود ساختہ کتبِ روایات کے حوالے سے ایک دوسرا اسلام بھی ساتھ ساتھ چل رہا ہے۔ دین کی بنیاد کو صرف "قرآن" ثابت کرنے کے زعم میں اس کتاب میں برق صاحب نے احادیث کا جو مذاق اڑایا تھا ۔۔۔۔ اللہ انہیں اس پر معاف فرمائے۔
اس کتاب کے جواب میں سینکڑوں کتب تحریر کی گئیں۔ جن میں سے مولانا سرفراز خان صفدر مرحوم کی کتاب "صرف ایک اسلام" بھی شامل ہے۔
راقم الحروف کی نظر میں "دو اسلام" کا سب سے بہترین جواب مولانا مسعود احمد بی۔ایس۔سی نے تحریر کیا تھا۔
مسعود احمد صاحب کی اس کتاب کا عنوان ہے : تفہیم اسلام بجواب دو اسلام
اس کتاب میں مسعود احمد صاحب نے "دو اسلام" کے ایک ایک پیراگراف کا علیحدہ علیحدہ جواب دیتے ہوئے گویا "ترکی بہ ترکی" والے محاورہ کی یاد دلائی تھی۔

اللہ کی قدرت دیکھئے۔ اور سچ کہا کسی نے کہ ایک مسلمان کو ہمیشہ صراطِ مستقیم کی چاہ اور طلب میں رہنا اور اس کی دعا کرتے رہنا چاہئے۔
اس کتاب (تفہیم اسلام بجواب دو اسلام) کو پڑھ کر غلام جیلانی برق صاحب نے تو اپنے موقف سے رجوع کر لیا اور "تاریخِ حدیث" نامی بہترین کتاب تحریر کر کے حدیث سے محبت کا اپنا حق ادا کر گئے۔ اللہ ان کی مغفرت فرمائے۔
اور تفہیم اسلام کے مصنف ۔۔۔۔۔۔ ؟ آپ جناب نے ٹھوکر کھائی اور جماعت المسلمین نامی ایک نئے فرقے کی داغ بیل ڈالی اور ایک جم غفیر کو گمراہ کرنے کا سبب بنے۔

کتاب "دو اسلام" کا ایک اور جواب حافظ محمد گوندلوی نے بھی "دوامِ حدیث" نامی کتاب میں دیا ہے۔
ماہنامہ "ترجمان القرآن" (ستمبر-2010ء) کے شمارے میں اسی کتاب "دوام حدیث" کا تعارف کرواتے ہوئے جناب ارشاد الرحمٰن لکھتے ہیں :

دوامِ حدیث کی جلد دوم ان مباحث پر مشتمل ہے جو حدیث کے متعلق اسی نوعیت کے اُن اعتراضات کا جواب ہے جو ڈاکٹر غلام جیلانی برق نے دو اسلام کے عنوان سے 1949ء میں شائع کیے تھے۔ ڈاکٹر برق کی اس کتاب کے متعدد علما نے جواب لکھے اور ہر مصنف نے اپنے انداز میں اس کا جواب فراہم کیا۔ حافظ محمد گوندلوی نے مقامِ حدیث کی طرح دو اسلام کا جواب بھی محدثانہ اسلوب میں مذکورہ تحریر کے ذیل میں ہی لکھ دیا تھا۔ ڈاکٹر غلام جیلانی برق تاریخِ حدیث لکھ کر دواسلام کے مشتملات سے دست بردار ہوگئے تھے لیکن افسوس ہے کہ بعض بددیانت ناشر اسے مسلسل شائع کر رہے ہیں اور بہت سے نوخیز ذہنوں کو پراگندہ کرنے کے گناہ کے مرتکب ہو رہے ہیں۔

اس تحریر کو لکھنے کا مقصد صرف یہی ہے کہ "دو اسلام" کے مقابلے میں "تاریخِ حدیث" نامی کتاب کو فروغ دیا جائے اور قارئین کو اس کے مطالعے کی ترغیب دلائی جائے تاکہ انکارِ حدیث کی راہ پر انجانے میں چل نکلنے کے بجائے دین کے دوسرے بنیادی ستون "حدیث" سے ان کی محبت و عمل میں دو چند اضافہ ہو۔

اَپ ڈیٹ : update
19-ڈسمبر-2010ء

صاحبِ "تفہیم اسلام بجواب دو اسلام" کے نام اپنے ایک خط (16-مئی-1971ء) میں برق صاحب نے بذاتِ خود اعتراف کیا کہ :

1 : "دو اسلام" کی زبان غیر سنجیدہ ، غیر علمی اور سخت جانبدارانہ ہے !
2 : میرا یہ موقف کہ احادیث کی تدوین و تسوید اڑھائی سو برس بعد ہوئی تھی ، سر و پا غلط ہے۔ میں نے اس کی تلافی تو کر دی ہے کہ "تاریخ تدوین حدیث" لکھ کر یہ ثابت کیا ہے کہ حضور پرنور (صلی اللہ علیہ وسلم) کی حیاتِ مبارکہ ہی میں تقریباً 40 ہزار احادیث ضبط ہو چکی تھیں۔

صاحبِ "تفہیم اسلام بجواب دو اسلام" کے نام برق صاحب کے ایک اور خط (14-نومبر-1972ء) میں واضح ہدایت :

میں نے ناشرین "دو اسلام" کو تاکید کی ہے کہ وہ اس کا آئیندہ کوئی ایڈیشن شائع نہ کریں۔

یاد رہے کہ یہ اعترافات کتاب "تفہیم اسلام" کے تیسرے ایڈیشن (1987ء) کے آخری صفحات میں شائع کئے گئے ہیں۔ ان شاءاللہ اس کتاب کا ڈاؤن لوڈ لنک بھی جلد فراہم کیا جائے گا۔

***

تاریخِ حدیث - از : غلام جیلانی برق

صفحات : 227
پ۔ڈ۔ف فائل سائز : 3.5 ایم۔بی
ڈاؤن لوڈ لنک : Download-Tareekhe-Hadees

ذوق والوں کے نام : اردو بلاگنگ کے پانچ (5) سال

2010-12-13T16:48:00.002+03:00

السلام علیکم ورحمۃ اللہ ، محترم قارئین !

اردو بلاگنگ کے منظرِ عام پر آج راقم کی اس پوسٹ کے ساتھ 5 سال مکمل ہو رہے ہیں۔
پانچ سال قبل آج ہی کے دن ، یعنی 13-ڈسمبر-2005ء کو جب میں نے بلاگ اسپاٹ پر اپنا بلاگ قائم کیا تھا تو آج کی بہ نسبت نہایت ہی کم بلاگز اردو بلاگنگ کے میدان میں موجود تھے ، خاص طور پر بلاگ اسپاٹ یعنی بلاگر ڈاٹ کام پر تو گنے چنے اردو بلاگ نظر آتے تھے۔

خود میں نے جب اپنا یہ بلاگ، بلاگ اسپاٹ پر قائم کیا تھا تو نہ اُس وقت مجھے بلاگنگ کی الف بے کا علم تھا، نہ بلاگ تھیمز کو سمجھنا آتا تھا اور نہ ہی اردو یونیکوڈ تحریر سے کوئی خاص شناسائی حاصل تھی۔ کسی جگہ جناب امانت علی گوہر کا آن لائن اردو پیڈ مل گیا تھا تو وہیں اردو یونیکوڈ میں لکھنے کی مشق ہو جایا کرتی تھی۔
ویسے اردو کی انٹرنیٹ کمیونیٹی میں فورمز کے حوالے سے غالباً 2003ء کے اوائل میں میرا داخلہ ہوا تھا۔ دو سال تک تصویری اردو اور رومن اردو کے فورمز میں سیکھنا سکھانا چلتا رہا پھر یونیکوڈ اردو کے سب سے پہلے اور سب سے بڑے فورم اردو محفل سے آشنائی ہوئی اور گویا اردو یونیکوڈ کے حوالے سے ایک نئے ہوشربا جہاں کا در وا ہو گیا۔

فورمز یا فیس بک جیسی سوشل نیٹ ورکنگ سائیٹس سے جہاں اکثر اوقات غیرضروری تنازعات یا بےتکے و بےجا مباحث سے وقت کا زیاں ہے تو اس کے مقابلے میں "بلاگ" کو کسی حد تک بہتر اس لیے کہا جا سکتا ہے کہ علم کی اشاعت و توسیع اور مہذب تبادلۂ خیال میں اس پلاٹ فارم کا استعمال نسبتاً آسان ، فائدہ مند اور خودمختار حیثیت کا حامل ہے۔ (یہ الگ بات ہے کہ کچھ سادہ لوح بلاگران اس سنجیدہ پلاٹ فارم کو بھی عمومی گپ شپ کی بیٹھک کی طرح استعمال کر جاتے ہیں)۔

چونکہ 2005ء کے اختتامی مہینہ میں ، میں نے بلاگنگ کی شروعات کی تھی لہذا اس سال کی صرف ایک تحریر بلاگ پر موجود ہے۔ جبکہ ۔۔۔ 2006ء میں [8] مراسلات ، 2007ء میں [14] ، 2008ء میں [16] ، 2009ء میں [25] اور 2010ء میں تادمِ تحریر [12] مراسلات کی اشاعت اس بلاگ پر عمل میں آئی ہے۔
تحریروں کے اس قدر کم تناسب کا مطلب صرف اس قدر سمجھئے کہ اس سے 10 تا 20 گنا مضامین جو میں نے تقریباً ہر سال تحریر کئے وہ زیادہ تر فورمز پر ہی پوسٹ ہوتے رہے۔ اب میری کوشش ہے کہ مختلف و متنوع موضوعات پر مبنی ان تحاریر کو علیحدہ علیحدہ موضوعاتی بلاگز کے حوالے سے پیش کروں۔

اردو کمیونیٹی میں موضوعاتی بلاگز کی ویسے بھی کچھ کمی سی نظر آتی ہے۔ اسی سبب میں نے تین مختلف موضوعات پر الگ الگ بلاگ تخلیق کئے تھے ، یعنی :

ابن صفی
مشتاق احمد یوسفی - شہ پارے ‫!!
الصحابہ کلھم عدول (صحابہ کرام رضی اللہ عنہم سے متعلق مفید معلومات)

"حجیت حدیث" کے موضوع پر بھی بہت سارے مختلف فورمز پر انگریزی اور اردو میں میرے مباحث موجود ہیں۔ فی الحال کوشش ہے کہ جلد سے جلد اس موضوع پر علیحدہ اردو بلاگ قائم کیا جائے۔ اس کے لیے یقیناً کچھ مزید محنت کی ضرورت پڑے گی کیونکہ اب رب العزت کی عنایت و کرم سے عربی میں حدیث کا ہر مجموعہ اور ہر قدیم سے قدیم عربی کتاب پورے تحقیقی حوالوں کے ساتھ آن لائن آ چکی ہے۔ اس طرح کسی حدیث یا کسی عربی عبارت کا آن لائن حوالہ دینے میں الحمدللہ اب کوئی مشکل درپیش نہیں ہے۔

آخری بات :
مغرب کی تکنالوجی اور اس کی اخلاقی خوبیوں کے اعتراف میں کوئی باک نہیں مگر اس کی ایک خرابی کا ذکر کئے بغیر بھی چارہ نہیں۔
اپنی عمر سے بڑے یا عمررسیدہ افراد کی جو عزت و تکریم تمام ممالک کے مسلم معاشروں میں کی جاتی رہی ہے ، اس کی حقیقی وجوہات کا پتا شائد مادیت پرستی ، مساویانہ حقوق اور تیزرفتار تکنالوجی کے زعم میں مبتلا مغرب لگا نہ سکے ۔۔۔۔ مگر ہمارے ہاں اسوۂ حسنہ موجود ہے ۔۔۔۔ ملاحظہ فرمائیں :
بڑوں کو پہلے بات کرنے کا موقع دینے والے ایک واقعے کا ذکر کرتے ہوئے امام بخاری علیہ الرحمۃ نے اس حدیث (‏"‏ كبر الكبر ‏") کو جس باب کے تحت بیان کیا ہے ، اس باب کے عنوان میں لکھا :
باب اکرام الکبیر (جو عمر میں بڑا ہو اس کی تعظیم کرنا)
صحیح بخاری ، کتاب الادب
اسی طرح ایک اور حدیث کا مفہوم ہے کہ : وہ شخص ہم میں سے نہیں جو ہمارے بڑوں کے حقِ بزرگی کو نہ پہچانے۔
ابوداؤد (صحیح) ، ترمذی (حسن)

اور شعب الایمان للبیھقی میں حسن سند سے ایک روایت یوں ہے کہ :
إِنَّ مِنْ إِكْرَامِ جَلالِ اللَّهِ ، إِكْرَامُ ذِي الشَّيْبَةِ الْمُسْلِمِ
معمر مسلمان کا اکرام کرنا اللہ تعالیٰ کی تعظیم کا حصہ ہے
شعب الایمان للبیھقی

اس موضوع پر ڈاکٹر طاہر القادری نے "اسلام میں عمر رسیدہ اور معذور افراد کے حقوق" کے عنوان سے ایک اچھی کتاب تحریر کی ہے، جس کا آن لائن مطالعہ یہاں کیا جا سکتا ہے (گو کہ اس میں درج کافی روایات نبی کریم صلی اللہ علیہ وسلم سے صحیح طور ثابت نہیں ہیں۔)

اختلاف یا مبحث کوئی خراب بات نہیں ، لیکن اس کی آڑ میں دانستہ یا نادانستہ اپنے بڑوں کو بلاوجہ یا غیرضروری طور پر نشانہ بنانے سے نہ صرف ہم اسوۂ حسنہ سے دور ہوتے ہیں بلکہ انجانے میں اپنے والدین ، اساتذہ اور خاندانی ماحول کی رسوائی کا سبب بھی بن جاتے ہیں۔

عمرِ عزیز کی چار دہائیوں پر محیط موسموں کو برت چکنے پر میرا خیال ہے کہ اپنے ساتھی نوجوان بلاگران کو کم از کم اتنی نصیحت کا حق مجھے حاصل ہے۔

میں اپنے قارئین ، دوست احباب ، ناصح و خیر خواہ اور عدم خوش گمانی رکھنے والوں کا دلی شکرگزار ہوں کہ ان کی تعریف و تنقید و حوصلہ افزائیوں کے سبب تحقیق اور مطالعہ کی امنگ کا سفر مسلسل ارتقاء میں ہے۔
والسلام علیکم۔

خبر واحد : کیا صرف ایک صحابی والی روایت قابل ردّ ہوگی؟

2010-12-09T14:52:00.003+03:00

کچھ فرصت دستیاب ہونے پر ان شاءاللہ ایک علیحدہ تحریر کے ذریعے "خبر واحد" پر کچھ تحقیق پیش کرنے کی کوشش کی جائے گی۔
ہم سب کو اس مشہور حدیث کا علم ہے کہ : اعمال کا دارومدار نیتوں پر ہے (انما الاعمال بالنیات)

صحیح بخاری کی یہ سب سے پہلی حدیث ہے۔ امام قسطلانی ، اپنی مشہور شرح بخاری "ارشاد الساری" میں لکھتے ہیں : ھذا الحدیث احد الاحادیث التی علیھا مدار الاسلام ۔۔۔۔۔۔ وقال الشافعی واحمد انہ یدخل فیہ ثلث العلم
یعنی : یہ حدیث ان احادیث میں سے ایک ہے جن پر اسلام کا دارومدار ہے۔ امام شافعی (علیہ الرحمۃ) اور امام احمد (علیہ الرحمۃ) نے صرف اس ایک حدیث کو علم دین کا تہائی حصہ قرار دیا ہے۔
اب اس حدیث کے متعلق ماہرین و محققین کا کیا فیصلہ ہے؟

ڈاکٹر محمود طحان اپنی مشہور کتاب "تیسیر مصطلح الحدیث" میں لکھتے ہیں :

حديث " إنما الأعمال بالنيات " تفرد به عمر بن الخطاب رضي الله عنه : هذا وقد يستمر التفرد إلى آخر السند وقد يرويه عن ذلك المتفرد عدد من الرواة

اور اس کے اردو ترجمہ کے طور پر نیٹ کی اردو دنیا کی مشہور شخصیت محمد مبشر نذیر اپنی ویب سائیٹ پر لکھتے ہیں :

"غریب مطلق" یا "فرد مطلق" ایسی حدیث کو کہا جاتا ہے جس کی سند کی ابتدا (یعنی صحابی) ہی میں انفرادیت پائی جاتی ہو (یعنی اسے ایک صحابی روایت کر رہا ہو۔) اس کی مثال یہ حدیث ہے "اعمال کا دارومدار نیتوں پر ہے۔" یہ حدیث صرف سیدنا عمر بن خطاب رضی اللہ عنہ سے مروی ہے۔ یہ انفرادیت سند کے آخر تک برقرار رہتی ہے کہ ہر دور میں اس حدیث کو روایت کرنے والا ایک شخص ہی ہوتا ہے۔
بحوالہ : خبر غریب کی اقسام

اونٹ کا پیشاب پینے والی حدیث جتنے بھی طرق سے بیان ہوئی ہے ، اس کو بیان کرنے والے بھی صرف ایک صحابی حضرت انس بن مالک (رضی اللہ عنہ) ہیں۔ اگر اس کو صرف اس وجہ سے رد کرنا ہے کہ یہ روایت "صرف ایک" صحابی سے مروی ہے ۔۔۔۔ تو پھر ردّ کرنے والے کو سیدنا عمر بن خطاب رضی اللہ عنہ والی "انما الاعمال بالنیات" حدیث کو بھی مسترد کرنا چاہئے۔ ایسا نہیں ہو سکتا کہ اپنی مرضی چلاتے ہوئے ایک دلیل کی بنا پر ایک روایت کو تو ردّ کیا جائے اور دوسری حدیث کو اسی دلیل کی بنا پر قبول کیا جائے۔

حدیث : اونٹ کا پیشاب پینا

2010-12-07T17:38:00.004+03:00

صحیح بخاری میں ایک حدیث کچھ یوں ہے کہ نبی کریم صلی اللہ علیہ وسلم نے کچھ لوگوں کو (ایک بیماری کے علاج کے طور پر) اونٹ کا پیشاب پینے کا حکم دیا۔
اس حدیث پر اکثر و بیشتر اعتراض کیا جاتا ہے کہ پیشاب جیسی نجس چیز کو پینے کا حکم نبئ خیر الامۃ (صلی اللہ علیہ وسلم) کیسے دے سکتے ہیں؟

پہلی بات تو یہ ہے کہ پیشاب پینے کا یہ حکم "عمومی" نہیں بلکہ کسی بیماری کے علاج کے سلسلے کا "مخصوص" حکم ہے اور اسی سبب امام بخاری علیہ الرحمۃ نے اس حدیث کو "کتاب الطب" میں درج کیا ہے۔
اور دوسری بات یہ کہ ۔۔۔۔۔۔ خود قرآن سے بھی ایسی "تخصیص" ثابت ہے!
ایک ہی آیت میں اللہ تعالیٰ نے خنزیر کے گوشت اور مردہ جانور کو حرام قرار دینے کے ساتھ ساتھ یہ تخصیص بھی واضح کر دی کہ اگر آدمی "مجبور" ہو جائے تو یہ حرمت ختم ہو جائے گی۔
ملاحظہ فرمائیں : سورہ البقرہ (2) ، آیت : 173
تم پر مردہ اور (بہا ہوا) خون اور سور کا گوشت اور ہر وہ چیز جس پر اللہ کے سوا دوسروں کا نام پکارا گیا ہو حرام ہے پھر جو مجبور ہو جائے اور وہ حد سے بڑھنے والا اور زیادتی کرنے والا نہ ہو، اس پر ان کے کھانے میں کوئی پابندی نہیں، اللہ تعالٰی بخشنے والا مہربان ہے۔

اسی طرح دیگر تین آیات سے بھی اسی بات کا ثبوت دیکھئے :
سورہ المائدہ (5) ، آیت:3
سورہ الانعام (6) ، آیت:145
سورہ النحل (16) ، آیت:115

ائمہ محدثین اور علمائے عظام کی تحقیق کے مطابق اونٹ کا پیشاب پینے والی حدیث بالکل صحیح ہے اور اس کے ضعیف یا موضوع ہونے کی جانب کسی ایک معتبر محدث نے اشارہ تک نہیں کیا ہے۔ اگر کسی کے علم میں کسی محدث کی ایسی تحقیق ہو کہ جس کے سہارے اس حدیث کو ضعیف یا موضوع ثابت کیا گیا ہو تو معترض کو چاہئے کہ پورے حوالے کے ساتھ سامنے آئے۔

درحققیت حدیث پر اعتراض مسلمانوں کی طرف سے نہیں بلکہ یہود و نصاریٰ کی جانب سے ہے اور بدقسمتی سے کئی سادہ لوح مسلمان تحقیق کئے بغیر اس بےبنیاد پروپگنڈے کا شکار ہو جاتے ہیں جس کا مقصد ہی یہی ہے کہ کسی طرح مسلمانوں کی اپنے نبی (صلی اللہ علیہ وسلم) سے محبت اور آپ (صلی اللہ علیہ وسلم) کے اقوال ، افعال اور تقاریر سے جذباتی وابستگی کو ختم کیا جائے۔ یقین نہ آئے تو گوگل پر اونٹ کے پیشاب کے حوالے سے عیسائیوں/یہودیوں کے سوالات (اعتراضات) سرچ کر کے دیکھ لیں۔
غیرمسلموں کے ان تمام اعتراضات کا جواب ، دورِ جدید کی سائینس کے حوالے سے کافی کچھ باشعور مسلمانوں نے دے رکھے ہیں ، درج ذیل چند حوالے مطالعہ کیلیے کافی ہوں گے :

آخری ربط کی تحقیق کے آخر میں محقق نے وہ وجوہات بھی بیان کر دی ہیں کہ کن اسباب کے تحت اس حدیث پر اعتراض کیا جاتا ہے؟

متذکرہ بیان کردہ انہی اسباب میں سے شائد ایک سبب ہوگا جو کہ خاور صاحب کے بلاگ کے ایک تبصرے سے مبصر کی "غلط فہمی" کا یوں اظہار ہوتا ہے :

بخاری شریف کی دو کاپیاں میرے سامنے ہی اس وقت پڑی ہیں۔ جس میں ان لوگوں کا تذکرہ ہے جنہیں رسول اللہ نے آنکھوں کے امراض کے لئے اونٹ کا پیشاب پینے کا مشورہ دیا۔ وہ لوگ اونٹ کا دودھ اور پیشاب پینے کے بجائے اونٹ لے بھاگے جسکی بناء پہ رسول اللہ نے انکے قتل کا حکم دیا۔
بحوالہ : ایک تبصرہ برائے تحریر: "مغالطے"

مبصر نے واضح طور سے لکھا ہے کہ : وہ لوگ اونٹ کا دودھ اور پیشاب پینے کے بجائے اونٹ لے بھاگے

حالانکہ حدیث کے عربی متن میں صاف صاف لکھا ہے :
فَلَحِقُوا بِرَاعِيهِ فَشَرِبُوا مِنْ أَلْبَانِهَا وَأَبْوَالِهَا حَتَّى صَلَحَتْ أَبْدَانُهُمْ
اور انگریزی میں اس کا ترجمہ CRCC سائیٹ پر کچھ یوں ہے :

So they followed the shepherd that is the camels and drank their milk and urine till their bodies became healthy.
Volume 7, Book 71, Number 590

اور اردو ترجمہ میں علامہ داؤد راز (علیہ الرحمۃ) لکھتے ہیں :
۔۔۔ نبی کریم صلی اللہ علیہ وسلم نے ان سے فرمایا کہ وہ آپ کے چرواہے کے یہاں چلے جائیں یعنی اونٹوں میں اور ان کا دودھ اور پیشاب پئیں ۔ چنانچہ وہ لوگ آنحضرت صلی اللہ علیہ وسلم کے چرواہے کے پاس چلے گئے اور اونٹوں کا دودھ اور پیشاب پیا جب وہ تندرست ہو گئے تو انہوں نے چرواہے کو قتل کردیا اور اونٹوں کوہانک کرلے گئے ۔۔۔۔
صحیح بخاری ، کتاب الطب ، باب : اونٹ کے پیشاب سے علاج جائز ہے

حدیث کے عربی متن اور اردو انگریزی تراجم میں تک صاف لکھا ہے کہ ۔۔۔
۔۔۔ ان لوگوں نے پیشاب پیا اور تندرست بھی ہو گئے ۔۔۔۔۔
جبکہ ادھر مبصر کا اصرار کچھ اور ہے۔

علاوہ ازیں ۔۔۔۔۔ ہمارے بعض احباب کو پتا نہیں کیوں امام بخاری رحمۃ اللہ علیہ اور بخاری شریف سے چڑ ہے کہ جب تک امام صاحب کی کتاب کی کسی حدیث پر اعتراض جڑ نہ لیں انہیں چین نہیں پڑتا۔
انہی روشن خیال اور اپنے اذہان کو ائمہ محدثین کے فہم پر ترجیح دینے والے افراد سے ادباً اور مخلصاً عرض ہے کہ یہ حدیث اکیلے امام بخاری نے اپنی "صحیح بخاری" میں درج نہیں کی ہے بلکہ بیسوں کتبِ حدیث میں دیگر محدثین نے بھی یہی حدیث اپنی سند سے بیان کی ہے۔
ذیل میں کچھ آن لائن حوالے بطور ریکارڈ یہاں درج کئے جا رہے ہیں تاکہ آئیندہ کسی بدخواہ یا کم علم کو شکایت کا موقع نہ ملے۔
***

صحیح مسلم ، کتاب المحاربین : online-link
صحیح مسلم ، کتاب المحاربین : online-link
مسند احمد ، مسند العشرہ المبشرین بالجنۃ : online-link
ابوداؤد ، کتاب الحدود : online-link
جامع ترمذی ، کتاب الاطعمۃ : online-link
جامع ترمذی ، کتاب الطہارۃ : online-link
سنن کبریٰ للنسائی (19 احادیث) ، کتاب الطہارۃ : online-link
سنن ابن ماجہ ، کتاب الحدود : online-link
سنن ابن ماجہ ، کتاب الطب : online-link
صحیح ابن خزیمہ ، کتاب الوضو : online-link
مصنف ابن ابی شیبۃ ، کتاب السیر : online-link
صحیح ابن حبان ، کتاب الطہارۃ : online-link
سنن دارقطنی ، کتاب الطہارۃ : online-link
طبرانی صغیر ، باب الالف : online-link
طبرانی اوسط ، باب الالف : online-link
مصنف عبدالرزاق ، کتاب الاشربۃ : online-link
بیھقی کبیر ، کتاب النفقات : online-link
بیھقی صغیر ، کتاب الحدود : online-link
البحر الزخار بمسند البزار 10-13 : online-link
مسند ابی یعلیٰ : online-link
مستخرج ابی عوانہ ، کتاب الحدود : online-link
تاریخ دمشق لابن عساکر ، حرف العین : online-link
تفسیر طبری ، تفسیر سورہ طہ : online-link

اور بخاری شریف میں ۔۔۔

صحیح بخاری ، کتاب الجہاد و السیر : online-link
صحیح بخاری ، کتاب المغازی : online-link
صحیح بخاری ، کتاب الوضو : online-link
صحیح بخاری ، کتاب الطب : online-link
صحیح بخاری ، کتاب الطب : online-link
صحیح بخاری ، کتاب الحدود : online-link
صحیح بخاری ، کتاب المحاربین : online-link
صحیح بخاری ، کتاب المحاربین : online-link

یاد رہے کہ یہاں صرف چند حوالے درج کئے گئے ہیں ورنہ یہ حدیث 300 سے زائد مقامات پر بہ تکرار 100 سے زائد کتبِ احادیث میں دہرائی گئی ہے۔
ایک امام بخاری کو ریجکٹ کرنے کی بات نہیں ۔۔۔۔ کیا ہمارے نوجوان جذباتی ساتھی (کہ جن کے دل میں ، بقول خود ان کے، "حقیقی اسلام" کا بڑا درد ہے!) ان تمام ائمہ دین کو جھٹلانے کی ہمت کریں گے؟؟
یا تو دین کے دامن میں ان ائمہ عظام کے فہم کو بصد احترام قائم رہنے دیجئے یا پھر اعلان کر دیجئے کہ : 12، 14 سو سالہ اسلام بوسیدہ ہو چکا ہے لہذا اب ہم اپنی مرضی کا اسلام قائم کریں گے !!

تقدیر اور تدبیر

2010-10-09T11:23:00.003+03:00

انسان اپنے اعمال و افعال میں بس ایک حد تک مختار ہے ، مختارِ مطلق یا مختارِ کُل نہیں ہے۔ اور اس اختیار کی حدود مقرر کرنا ، انسان کے بس کی بات بھی نہیں ہے یعنی یہ بات انسان کی عقل و فہم سے بالاتر ہے۔
ایک کسان بڑے عمدہ بیج ، بالکل درست موسم میں اور بڑی زرخیز زمین میں بوتا ہے ، رکھوالی کرتا ہے ، پانی بھی خوب دیتا ہے لیکن عین فصل پکنے کے قریب کسی ارضی یا سماوی آفت کے سبب ساری فصل تباہ و برباد ہو جاتی ہے۔
اور کبھی یوں بھی ہوتا ہے کہ انسان خود کچھ محنت نہیں کرتا مگر دوسروں کی محنت کا ثمر اسے مل جاتا ہے۔

لہذا جبر و قدر کے اس مسئلہ کا درست حل یہی بنتا ہے کہ اللہ تعالٰی کو عَلَى كُلِّ شَيْءٍ قَدِير مانا جائے۔
اچھی اور بری تقدیر دونوں اللہ تعالیٰ کی طرف سے ہیں اور ان دونوں پر ایقان رکھنا مسلمانوں کے ایمان میں داخل ہے۔ جیسا کہ حدیثِ جبریل سے واضح ہے :

وَالْقَدَرِ خَيْرِهِ وَشَرِّهِ

جامع ترمذی ، کتاب الایمان

ویسے یہ بھی یاد رہے کہ صرف تقدیر پر بھروسہ کر کے ہاتھ پر ہاتھ دھرے بیکار بیٹھے رہنے سے شریعت میں منع کیا گیا ہے۔
جیسا کہ صحیح بخاری کی ایک مشہور روایت سے پتا چلتا ہے کہ جب نبی کریم صلی اللہ علیہ وسلم نے صحابہ کو بتایا کہ ہر شخص کا جنت یا جہنم والا ٹھکانہ لکھا جا چکا ہے تو صحابہ کرام (رضی اللہ عنہم) نے جواب میں عرض کیا کہ :
"پھر کیوں نہ ہم تقدیر پر بھروسہ کر لیں اور نیک عمل کرنا چھوڑ دیں؟"
تو آپ صلی اللہ علیہ وسلم نے جواباً فرمایا :

اعْمَلُوا فَكُلٌّ مُيَسَّرٌ لِمَا خُلِقَ لَهُ ، أَمَّا مَنْ كَانَ مِنْ أَهْلِ السَّعَادَةِ ، فَيُيَسَّرُ لِعَمَلِ أَهْلِ السَّعَادَةِ ، وَأَمَّا مَنْ كَانَ مِنْ أَهْلِ الشَّقَاءِ فَيُيَسَّرُ لِعَمَلِ أَهْلِ الشَّقَاوَةِ

عمل کرو۔ ہر شخص کو ان اعمال کی توفیق دی جاتی ہے جن کے لیے وہ پیدا کیا گیا ہے۔ جو شخص نیک ہوگا اسے نیکوں کے عمل کی توفیق ملی ہوتی ہے اور جو بدبخت ہوتا ہے اسے بدبختوں کے عمل کی توفیق ملتی ہے۔

پھر آپ صلی اللہ علیہ وسلم نے یہ آیات {فَأَمَّا مَن أَعْطَى وَاتَّقَى : سورہ-92- الليل} آخر تک پڑھیں ، یعنی :
جس نے دیا (اللہ کی راہ میں) اور اللہ سے ڈرا اور اچھی بات کو سچا سمجھا ، سو ہم اس کے لیے نیک اعمال کو آسان کر دیں گے۔
صحیح بخاری ، کتاب التفسیر

ان احدیث کے مطالعے سے واضح ہوتا ہے کہ تقدیر پر ایمان ، انسان کو عمل سے نہیں روکتا بلکہ اس کے اندر مزید شوق و ولولہ پیدا کرتا ہے کیونکہ وہ جان لیتا ہے کہ ہر انسان کو اس کے مقدر کے حصول کے لیے اللہ کی جانب سے مدد اور توفیق عطا ہوتی ہے اور عمل شروع کرنے سے اس کے مقدر کی راہ آسان ہو جاتی ہے۔
ونیز تقدیر پر ایمان لانے کا لازمی نتیجہ یہ بھی نکلتا ہے کہ انسان اپنی کسی بھی کوشش و سعی کے رائیگاں ہو جانے کا غم نہیں کرتا بلکہ اس نقصان کو اپنی تقدیر کا لکھا سمجھ کر صبر کرتا ہے اور جتنا کچھ اسے ملتا ہے اسی پر قناعت کرتا ہے۔

تقدیر کے مسئلہ پر گفتگو کرنے سے ممانعت کے سلسلے میں یہ دو روایات ، نبی کریم صلی اللہ علیہ وسلم سے منسوب کی جاتی ہیں :
1 :

إِنَّمَا هَلَكَ مَنْ كَانَ قَبْلَكُمْ حِينَ تَنَازَعُوا فِي هَذَا الْأَمْرِ عَزَمْتُ عَلَيْكُمْ أَلَّا تَتَنَازَعُوا فِيهِ

(تقدیر کی) انہی باتوں سے پچھلی قومیں ہلاک ہوئیں۔ میرا فیصلہ یہ ہے کہ تم اس معاملہ میں جھگڑا نہ کرو۔
جامع ترمذی ، کتاب القدر

2 :

مَنْ تَكَلَّمَ فِي شَيْءٍ مِنَ الْقَدَرِ سُئِلَ عَنْهُ يَوْمَ الْقِيَامَةِ ، وَمَنْ لَمْ يَتَكَلَّمْ فِيهِ لَمْ يُسْأَلْ عَنْهُ

جو شخص تقدیر کے بارے گفتگو کرے گا قیامت کے دن اس سے سوال کیا جائے گا، جو خاموش رہے گا اس سے کچھ سوال نہ ہوگا۔
سنن ابن ماجہ ، باب فی القدر

واضح رہے کہ محدثین کی تحقیق کے مطابق : یہ دونوں ہی روایات شدید ضعیف ہیں۔

ویب صفحات پر غزل جسٹی فیکیشن

2010-10-04T11:19:00.002+03:00

اردو کے ویب صفحات پر غزل جسٹی فیکیشن (poetry justification) کے حوالے سے عرصہ دراز سے کوئی مناسب حل ڈھونڈا جا رہا ہے۔
W3C پر CSS3 کی تحقیق کرتے ہوئے جب میں نے یہ لفظ سرچ کیا : Asian typography

تو یہ صفحہ سامنے نظر آیا ہے :
Last line alignment: the 'text-align-last' property

CSS3 کے اس کوڈ کو لے کر میں نے مختلف براؤزرز میں تجربات کئے۔
انٹرنیٹ اکسپلورر اور اوپیرا پر "غزل جسٹی فیکیشن" کا یہ سی-ایس-ایس کوڈ بہترین مطلوبہ نتائج دکھاتا ہے۔
مگر افسوس ناک امر یہ ہے کہ موزیلا فائرفاکس ، سفاری اور گوگل کروم ، CSS3 کے اس ٹکسٹ-جسٹی فیکیشن کو سپورٹ نہیں کرتے !!

سی ایس ایس کوڈ یہ ہے :

[div style="font-family: Jameel Noori Nastaleeq, Alvi Nastaleeq, Urdu Naskh Asiatype, Tahoma; font-size: 18px; line-height: 125%; text-align-last: justify; text-align: justify; text-justify: distribute; width: 80%;"]اردو غزل[/div]

میں نے کئی گھنٹے کسی ہیک کی تلاش میں مشغول کئے کہ کسی طرح CSS3 کی اس ٹکسٹ-جسٹی فیکیشن سہولت کو فائر فاکس اور کروم میں بھی کارآمد بنایا جائے۔ مگر سوائے اس ہیک کے ، کوئی مفید تحریر نہیں ملی :
William’s Blog - Justifying text

ابھی میں نے اس ہیک کو ٹسٹ نہیں کیا ہے۔ فرصت ملتے ہی دیکھوں گا ، ان شاءاللہ۔
آپ مسدس حالی کا ایک بند اس کوڈ کے سہارے ، یہاں ملاحظہ فرمائیں۔
جسٹی فیکیشن میں قید اس شاعری کو پڑھنے کے لیے انٹرنیٹ اکسپلورر یا اوپیرا براؤزر استعمال کیجئے گا۔
انٹرنیٹ اکسپلورر کا اسکرین شاٹ

مگر دینِ بر حق کا بوسیدہ ایواں
تزلزل میں مدت سے ہیں جس کے ارکاں

زمانہ میں ہے جو کوئی دن کا مہماں
نہ پائیں گے ڈھونڈا جسے پھر مسلماں

عزیزوں نے اُس سے توجہ اٹھا لی
عمارت کا ہے اس کی اللہ والی

پڑی ہیں سب اجڑی ہوئی خانقاہیں
وہ درویش و سلطاں کی امید گاہیں

کھلیں تھیں جہاں علمِ باطن کی راہیں
فرشتوں کی پڑتی تھیں جن پر نگاہیں

کہاں ہیں وہ جذبِ الٰہی کے پھندے
کہاں ہیں وہ اللہ کے پاک بندے

وہ علمِ شریعت کے ماہر کدھر ہیں
وہ اخبار دیں کے مبصر کدھر ہیں

اصولی کدھر ہیں، مناظر کدھر ہیں
محدث کہاں ہیں، مفسر کدھر ہیں

وہ مجلس جو کل سر بسر تھی چراغاں
چراغ اب کہیں ٹمٹاتا نہیں واں

مدارس وہ تعلیم دیں کے کہاں ہیں
مراحل وہ علم و یقیں کے کہاں ہیں

وہ ارکان شرعِ متیں کے کہاں ہیں
وہ وارث رسولِ امیں کے کہاں ہیں

رہا کوئی امت کا ملجا نہ ماویٰ
نہ قاضی نہ مفتی نہ صوفی نہ مُلّا

کہاں ہیں وہ دینی کتابوں کے دفتر
کہاں ہیں وہ علمِ الٰہی کے منظر

چلی ایسی اس بزم میں بادِ صرصر
بجھیں مشعلیں نورِ حق کی سراسر

رہا کوئی ساماں نہ مجلس میں باقی
صراحی نہ طنبور، مطرب نہ ساقی

بہتر کون ۔۔۔ ؟!

2010-10-02T09:48:00.001+03:00

کچھ لوگ اٹھ آتے ہیں بہتر معاشی یا سماجی یا تعلیمی پس منظر سے اور کامیابی بھی حاصل کر جاتے ہیں۔
اور کچھ کا نقطۂ آغاز انتہائی نچلی سطح یعنی کہ صفر سے شروع ہوتا ہے ، ایک ایک سنگِ میل عبور کرنے انہیں مستقل مزاجی سے سخت ترین محنت کرنا پڑتی ہے۔

کامیابی کا تقریباً ایک ہی مقام حاصل کرنے والے درج بالا دونوں طبقوں کے افراد کا تقابل اگر کیا جاتا ہے تو ان کے نقطۂ آغاز اور ان کے وہ تمام حالات کو بھی مدنظر رکھا جانا چاہئے جن سے گزر کر وہ اس مقام تک پہنچے ہیں۔

جب ایک انسان زندگی میں انتہائی نچلی سطح سے جدوجہد شروع کرتا ہے اور اس کی مدد اور رہنمائی کے ذرائع بھی کمزور ہوتے ہیں تو ناموافق حالات کی وجہ سے زندگی میں ترقی کے منازل طے کرنے میں اسے بڑی مستقل مزاجی سے سخت محنت کرنا پڑتی ہے اور ہر سنگِ میل عبور کرنے کے لیے بیشمار سختیاں جھیلنی پڑتی ہیں۔

لہذا ایسے انسان کی کامیابی ایک ایسے شخص کی کامیابی سے بڑھ کر ہے جو زندگی میں تو اسی مقام پر پہنچا لیکن اس کا معاشی اور سماجی پس منظر بہتر اور اعانت و تعاون کا نظام مستحکم تھا۔

جناب سید نوید حیدر جعفری ، کامیابی کے اصولوں کی مزید وضاحت کرتے ہوئے لکھتے ہیں کہ ۔۔۔۔۔۔

حقیقی دنیاوی کامیابی کو سمجھنے کا ایک اہم پہلو یہ بھی ہے کہ کامیابی ہمیشہ جیتنے کا نام نہیں !
بلکہ اصولوں کی پاسداری کرتے ہوئے ہار جانا یا پیچھے ہٹ جانا بھی اپنے اندر ایک طرح کا مستحسن عمل ہے۔
اگر کسی کی جیت میں "اصول" اور "انصاف" ہار جاتے ہیں تو چاہے کامران شخص نے اپنی جیت میں کچھ بھی حاصل کیا ہو مگر وہ دراصل اُس کا حق نہیں ہوتا بلکہ اس نے کسی اور کا حق غصب کیا ہوتا ہے۔

لہذا دیکھنے کی بات یہ بھی ہوتی ہے کہ کامیاب انسان نے اپنے اہداف تک پہنچنے کے لیے کون سا راستہ اختیار کیا ہے؟ کیونکہ ۔۔۔۔
جب اپنے مقاصد کے حصول کے لیے صحیح راستہ اختیار کیا جاتا ہے تو راستے کی سختیاں اور مشقت کامیاب انسان کو ذاتی طور پر مضبوط اور کردار کی سطح پہ بلند کرتی ہیں۔
اور یہی حقیقتاً کسی بھی کامیابی کی روح ہے !

اسی لیے صرف یہ دیکھنا کافی نہیں کہ کوئی انسان زندگی میں کس مقام پہ پہنچا بلکہ یہ دیکھنا بھی ضروری ہوتا ہے کہ کس راستے سے اور کن حالات سے گزر کر وہ اس مقام تک پہنچنے میں کامیاب ہو سکا ہے؟

محبت کے عملی تقاضے ۔۔۔۔ !

2010-07-25T16:57:00.001+03:00

بات گھوم پھر کر وہیں آ جاتی ہے کہ دنیا کی ہر چیز سے زیادہ ہمیں کس سے محبت ہوگی ؟

ایمان کا تقاضا ہے کہ ہماری محبت کا مرکز ہمارے پیارے رسول محمد مصطفیٰ صلی اللہ علیہ وسلم کی ذاتِ گرامی ہو۔ ماں باپ بیوی بچے ، دوست احباب رشتہ دار اقرباء پر آپ صلی اللہ علیہ وسلم کو مقدم رکھیں ، دنیا کی محبوب سے محبوب ترین شے سے زیادہ محبت ہمیں آپ صلی اللہ علیہ وسلم سے ہو۔

مگر ۔۔۔۔۔۔۔
اس محبت کے تقاضے بھی تو ہوں گے۔
ماں کو اپنی اولاد سے محبت ہوتی ہے تو اولاد کے چھوٹے سے چھوٹے کام کو رغبت و خوشی سے انجام دیتی ہے ۔۔۔ کھانا کھلانا ہو ، نہلانا دھلانا ہو ، سلانا جگانا ہو ، لکھانا پڑھانا ہو ۔۔۔۔ ماں کبھی بیزار نہیں ہوگی کہ یہ کام اولاد سے اس کی محبت کا تقاضا ہیں۔
باپ کو اپنی اولاد سے محبت ہوتی ہے تو اولاد کی مناسب دیکھ بھال ، ان کی تعلیم و تربیت ، ان کی رہائش ، لباس ، خورد و نوش اور دیگر انسانی ضروریات کو پورا کرنے کے لیے ہر دم ہر لمحہ ہر پل محنت و مشقت میں لگا رہے گا کہ یہ تمام کام اولاد سے اس کی محبت کا اظہار ہیں۔
شوہر کو بیوی سے یا بیوی کو شوہر سے محبت ہوتی ہے تو جانبین ایک دوسرے کے جذبات و احساسات ، حوائج و ضروریات ، آراء و مشورہ جات ، کا خیال رکھتے ہیں کہ ایک دوسرے کے تئیں محبت کا جذبہ سدا بہار رہے۔

ذرا سوچئے کہ ۔۔۔۔۔
اگر ماں رشتہ داروں کے حلقہ میں صرف شور مچائے کہ وہ اپنی اولاد سے نہایت ہی محبت رکھتی ہے مگر اولاد کے کسی بھی کام میں ذرہ برابر دلچسپی نہ لے
باپ معاشرے میں پروپگنڈہ برپا کرے کہ وہ اپنی اولاد کو نہایت عزیز رکھتا ہے مگر اولاد کی ذمہ داریوں کے تئیں غفلت پر غفلت کرتا رہے
شوہر اپنے دوستوں کے حلقے میں نعرہ لگائے کہ وہ اپنی بیوی کو بہت بہت چاہتا ہے مگر بیوی کے جذبات و احساسات و ضروریات کا بالکل بھی خیال نہ رکھے ۔۔۔۔۔

تو اس طرح کا شور ، پروپگنڈہ ، نعرہ بازی ۔۔۔۔ محبت کا اظہار کہلائے گی ؟ محبت کے تقاضوں کو پورا کرنے کا اعلان شمار ہوگی ؟؟

اگر نہیں ۔۔۔۔
اور یقیناً نہیں تو ہمیں ٹھنڈے دل سے سوچنا چاہئے کہ ہمارے ہاں پھر یہ دو رُخی کیوں ہے؟؟

ہم اپنے پیارے نبی (صلی اللہ علیہ وسلم) سے محبت کے لمبے چوڑے زبانی دعوے تو بہت کرتے ہیں مگر ۔۔۔۔۔
مگر اس محبت کے جو شرعی و اخلاقی تقاضے ہیں ۔۔۔۔ کیا ہم ان کو صدقِ دلی سے پورا کرتے ہیں؟ یا پھر وقتاً فوقتاً نعروں یا پروپگنڈا بازی سے ہی کام نکالتے ہیں ؟؟

یہ کیسا حُب رسول ہے جس بات کا نبی (صلی اللہ علیہ وسلم) حکم دیں ، اسے صرف سن لیا جائے اور جب عمل کرنے کی باری آئے تو سب فراموش اور اپنے نفس کی ہی بات مانی جائے ۔۔۔۔ ؟

کسی ادیب نے اپنے ایک افسانے میں ایک بہت اچھی بات کچھ یوں تحریر فرمائی تھی :

لال پیارا ہے تو لال دو۔ مال عزیز ہے تو مال بانٹ دو۔ حسن پر غرور ہے تو حسن صدقے میں اُتار دو۔ انا بیچ میں آ رہی ہو تو اسے قربان کر دو۔ سب سے عزیز چیز ، سب سے پیاری شے ، جان سے اچھی تمنا ، اور نہیں تو عزیز ترین لمحہ ہی کسی کو دے دیں ۔
یہی اپنی ذات کی نفی ہے ۔
اپنی ذات کی نفی کرنے والے اور اللہ کی ذات کو برحق ماننے والے ۔۔۔ اللہ تعالیٰ کو بہت بہت پسند ہیں ۔

فرمایا گیا ہے :

تم تقویٰ کی اعلیٰ منزل تک پہنچ ہی نہیں سکتے جب تک تم اپنی وہ چیز دوسروں کی نذر نہ کر دو جو تمہیں سب سے زیادہ پیاری ہو ۔

( سورة آل عمران : 3 ، آیت : 92 )

اللہ تعالیٰ سے دعا ہے کہ وہ ہمیں اسوۂ حسنہ پر صدقِ دلی سے چلنے کی توفیق عطا فرمائے ، نبی (صلی اللہ علیہ وسلم) کی تعلیمات اور احکام پر عمل کے متعلق ہم سب کے دلوں میں کشادگی کو جگہ دے اور کسی تنگی کو راہ نہ دے۔ نبی (صلی اللہ علیہ وسلم) سے ہماری محبت کو قلبی ، عقلی ، وجدانی اور جذباتی ہونے کے ساتھ ساتھ بھرپور طور سے عملی بھی بنا دے ۔۔۔۔۔۔
آمین یا رب العالمین !

جو شخص کسی مسلم پر پردہ ڈالے ۔۔۔

2010-07-16T03:10:00.002+03:00

اردو بلاگنگ کی حالیہ متنازعہ لہر کے حوالے سے میں کچھ عرصہ سے خاموشی سے جائزہ لے رہا تھا۔ لیکن نعمان کی اس تحریر کا درج ذیل اقتباس کافی اہم محسوس ہوا :

اردو بلاگستان میں ایک خطرناک رویہ جو پرورش پارہا ہے وہ یہ ہے کہ لوگ موضوعات کے بجائے لوگو.ں پر تحاریر لکھنے لگے ہیں۔ میلوں دور بیٹھ کر ایک دوسرے کی شخصیت اور کردار کے نقوش کی ہولناکی وضع کرنے میں اپنی لفاظیت اور روایتی پنجابی جگت سازی کے تمام گر آزما رہے ہیں۔ حماقت یہ ہے کہ وہ کبھی ایکدوسرے سے ملے بھی نہیں۔ مگر کردار کشی کے شوق سے سرشار انہیں یہ کام سب سے آسان اور دلچسپ نظر آتا ہے۔

نیٹ کی اردو کمیونیٹی کے ایک طویل عرصہ کے میرے اپنے تجربے اور مشاہدے کے مطابق صرف اردو بلاگستان نہیں ، بلکہ اردو کے نام پر جتنی ویب سائیٹس ، فورمز ، گروپس (یاھو ، گوگل وغیرہ) ، چیٹ رومز ، بلک [bulk] ایمیل فارورڈنگ وغیرہ جاری ہیں ، تقریباً سب جگہ یہ بدترین اور قابل اعتراض صورتحال موجود ہے۔
اگر ساری دنیا کے مقابلے میں برصغیری ماحول کا تقابل کیا جائے تو فیصد کچھ زیادہ ہی نظر آئے گا۔ بنیادی وجہ شائد یہی ہو کہ اپنے گریبان میں جھانکے بغیر خود کو فرشتہ اور مقابل کو شیطان یا فرعون سمجھا اور باور کرایا جائے۔

مرد و زن ، دونوں ہی طرف سے اکثر اوقات دردِ دل لئے معاشرہ کی اصلاح کے لئے نکلا جاتا ہے تو کبھی دین کی خدمت کی غرض کا شوشہ چھوڑا جاتا ہے ۔۔۔۔ مگر عموماً اپنے متضاد اعمال ، غلط سوچ ، اور لاپرواہ قلم سے ، اصلاح کے دعویدار نہ معاشرہ کی اصلاح کر پاتے ہیں اور نہ ہی دین کی خدمت بلکہ دانستہ یا نادانستہ ان کا مقصد فتنہ و فساد برپا کرنا اور شر پھیلانا ہوتا ہے چاہے اس کے لئے کسی حد تک کیوں نہ جانا پڑے۔

ذرا سوچئے کہ کتنا سچ فرمایا تھا نبی کریم صلی اللہ علیہ وسلم نے کہ :

من كان يؤمن بالله واليوم الآخر فليقل خيرا أو ليصمت

جو کوئی اللہ اور آخرت کے دن پر ایمان رکھتا ہو وہ اچھی بات زبان سے نکالے ورنہ خاموش رہے۔
(صحیح بخاری ، كتاب الادب)

ہر ناقص بات جو ذہن میں آئے ، ہر منفی سوچ جس پر نفس اکسائے ، ہر برا رویہ جو مشتعل کرے ۔۔۔۔ ضروری نہیں ہے کہ اسے بیان بھی کیا جائے چاہے "مزاح" کے نام پر یا چاہے مظلومیت کے ناتے سہی۔
اگر ہر خرابی بیان کرنے والی ہوتی تو خود نبی کریم (صلی اللہ علیہ وسلم) کو اللہ عز و جل کی طرف سے اُس وقت ٹوکا نہ جاتا (آل عمران : 128) جب آپ (صلی اللہ علیہ وسلم) کفار پر لعنت کر رہے تھے۔ جب کفار پر لعنت کرنے سے رب نے منع کیا تو ٹھنڈے دل سے سوچنا چاہئے کہ ہم کیسے مسلمان ہیں کہ اپنے ہی بھائی کا گوشت نوچنے سے باز نہیں آتے!

کسی کی ذات کے متعلق غلط سلط اندازے لگائے جائیں یا کسی کی مفروضہ یا حقیقی خامیوں کو اجاگر کیا جائے یا جلے دل کے پھپھولے پھوڑے جائیں ۔۔۔۔۔ ان تمام کاموں سے بہتر کام تو نبی صلی اللہ علیہ وسلم کی وہ سنت ہے جو واشگاف الفاظ میں یوں بیان ہوئی ہے :

من ستر مسلما ستره الله في الدنيا والآخرة والله في عون العبد ما كان العبد في عون أخيه

جو شخص کسی مسلم پر پردہ ڈالے اللہ تعالیٰ اس پر دنیا اور آخرت میں پردہ ڈالے گا اور اللہ تعالیٰ بندے کی مدد میں (رہتا) ہے جب تک بندہ اپنے بھائی کی مدد میں (رہتا) ہے۔
(صحیح مسلم ، کتاب الذکر والدعاء والتوبۃ)

اللہ سے دعا ہے کہ ہم سب کو علم و عمل کی توفیق سے نوازے ، آمین یا رب العالمین !!

سجدہ خالق کو بھی، ابلیس سے یارانہ بھی ۔۔۔ ؟!

2010-06-07T11:09:00.001+03:00

تحریر : راشد اشرف

میں تذبذب میں تھا کہ کیا کروں ، کیا نہ کروں ۔۔۔ یہ فیس بک والوں کو کیا سوجھی کہ یہ شرمناک حرکت کر بیٹھے ؟
اچھا خاصا کام چل رہا تھا، دوستوں سے بات بھی ہوتی تھی اور خیالات ، تصاویر اور ویڈیوز کا تبادلہ بھی ہوتا تھا۔ ایک عادت سی ہوچلی تھی روز شام کو فیس بک پر آنے کی۔ پیغام کے خانے میں آئے ہوئے " نامے مرے نام " کتنے اچھے لگتے تھے۔۔۔ عجلت میں جوابات دینے میں کس قدر لطف آتا تھا۔۔۔ ادبی گفتگو کے تو کیا ہی کہنے ۔۔۔ ادھرکوئی افسانہ یا کسی خود نوشت سے احساسات کو جھنجوڑدینے والا واقعہ اسکین کیا اور ادھر پوسٹ کرڈالا اور دیکھتے ہی دیکھتے جوابات کی بھرمار۔۔۔۔ پھر فیس بک پر جناب ابن صفی کے صفحے پر تو ہماری وجہ سے خوب رونق لگی رہتی تھی ۔۔۔۔ اور خاص کر جب کوئی خاتون ہماری پوسٹ کے جواب میں یہ فقرہ لکھتی تھیں کہ "نائس شیئرنگ راشد صاحب" تو من ہی من میں لڈو پھوٹتے تھے ۔۔۔۔ یہ سب کچھ کیا گیا، زندگی جیسے ویران سی ہوگئی ۔۔۔
شاید 31 مئی کے بعد فیس بک پر سے پابندی ہٹ جائے، یہ تقویت بھی دل کو تھی ۔۔۔ لیکن پھر دھیرے دھیرے یہ ہوا کہ جیسے فیس بک کو روزانہ استعمال کرنے کی عادت ہوگئی تھی، اس پابندی کے بعد اس کواستعمال نہ کرنے کی بھی عادت ہوگئی ۔۔۔
لیکن آخراس کا مستقل حل کیا ہوگا ؟ یہ سوال پیش نظر رہا۔ کچھ دن بیتے تو احساس ہوا کہ فیس بک کی انتظامیہ اپنا صوابدیدی اختیار استعمال کرتے ہوئے اس صفحے کو ہٹا بھی تو سکتی تھی جیسے ہم نے تین ماہ قبل کمال احمد رضوی صاحب (الف نون فیم) کا صفحہ تخلیق کیا تو یہ اختیارات خود بخود مل گئے کہ کسی بھی نامعقول رائے کو فی الفور ہٹا دیا جائے۔ تو یہ کیوں نہیں ہوسکتا کہ دل آزاری کا سبب بنے والے صفحے کو پاکستان میں بلاک کردیا جائے۔

اس پابندی کے بعد روزجمنے والی یاروں کی محفل میں ہم احباب کو ایک روز بتا رہے تھے بھائیو! اصل بات تو یہ ہے کہ دل میں ڈھیٹ اور بے حس قسم کا چور ہے جو چپکے سے کہتا ہے کہ ایک دن یہ پابندی ہٹ جائے گی اور یہ کہ متعلقہ صفحہ ہٹا کر بھی تو کام چلایا جا سکتا ہے۔ ہماری اس بات کے جواب میں ایک بحث شروع ہوئی ۔ احباب اپنے اپنے خیالات کا اظہار کرتے چلے گئے۔ ہم نے کہا کہ :
دوستو! کسی نے ہمیں ایک ایسا لنک بھیجا ہے جسے استعمال کرکے آپ باآسانی فیس بک پر جاسکتے ہیں ۔۔ اور تو اور اپنی لوکیشن بھی تبدیل کرسکتے ہیں۔ کیوں نہ اس کو ٹرائی کیا جائے ؟

اس تمام گفتگو کے دوران کونے میں بیٹھا ایک یار آہستگی سے کچھ کہنا چاہ رہا تھا لیکن آوازوں کے شور میں اس کی آواز دب سی جاتی تھی۔ یوں بھی پہلے کب ہم نے اس کی کسی رائے پر توجہ دی تھی ؟ نہ بات کہنے کا سلیقہ، نہ آواز میں گن گھرج ۔ نحیف ساانسان اور سدا کا کمزورموقف۔۔۔ یکایک کسی نے کہا کہ بھائیو! ذراہمارے اس دوست کی بھی سن لو کہ کیا کہنا چاہ رہا ہے۔ اجازت ملنے پر وہ اپنی کمزور سی آواز میں گویا ہوا:
"آپ لوگ کہہ رہے ہیں کہ بجائے پوری سائٹ کو بلاک کرنے کے، فیس بک کے محض ان صفحات کو بلاک کردیا جائے جہاں یہ دل آزار مواد موجود ہے۔ ذرا دل پر ہاتھ رکھ کر سوچئے! کوئی اہل ایمان ایسی عمارت کے کسی کمرے میں بیٹھ سکتا ہے جس عمارت کی کسی اور منزل پر ہی سہی، کسی اور کمرے میں ہی سہی، آنحضور (صلی اللہ علیہ وسلم) کی شان میں گستاخی کی جارہی ہو ؟ ۔۔۔ ہرگز ہرگز نہیں۔ یہی معاملہ اس ویب سائٹ کا بھی ہے"۔

کمرے میں یک دم خاموشی چھا گئی ۔۔۔ سب لوگ ٹکڑ ٹکڑ اس کی طرف دیکھے جارہے تھے۔وہ پستہ قد ، کمزور سا انسان ایک دم سے سب کی نظروں میں قد آور اور معتبر ہوگیا تھا۔ سادی سی بات ، سیدھی دلوں میں اتر چکی تھی۔

اس لمحے میں نے ایک فیصلہ کیا۔۔۔۔
پابندی کے باوجود فیس بک کو استعمال کیے جاسکنے والا وہ لنک میں کسی اور کو نہیں بھیجوں گا۔ ۔۔۔
31 مئی کو اگر حکومت نے فیس بک پر سے پابندی اٹھانے کا فیصلہ نہ کیا تو میں یہ سائٹ استعمال نہیں کروں گا۔ اور اگر حکومت نے فیس بک پرسے پابندی اٹھا لی اور اس کے بعد کسی بھی موقع پر ویب سائٹ کی انتظامیہ نے دوبارہ ایسی شرمناک حرکت کی تو اس کو ہمیشہ ہمیشہ کے لیے خیر باد کہہ دوں گا۔ آخر فیس بک کی انتظامیہ کو یہ بات کیوں سمجھ میں نہیں آرہی ہے کہ ان کی اس حرکت سے کروڑوں مسلمانوں کی دل آزاری ہوئی ہے۔
میں تو ایک بے عمل انسان ہوں۔ اکثریت کا خیال ہے کہ ان کو دنیا کی بڑی سے بڑی آسائش و سہولت، شان رسالت پر سمجھوتہ کرنے کے عوض دی جائے تو وہ اسے پائے حقارت سے ٹھوکر مارتے ہیں:

یہاں فاصلوں میں ہیں قربتیں، یہاں قربتوں میں شدتیں
کوئی دور رہ کر اویس ہے، کوئی پاس رہ کر بلال ہے

تازہ اطلات کے مطابق بنگلہ دیش کی حکومت نے بھی فیس بک پر پابندی عائد کردی ہے ۔ ایسی اطلات بھی آئیں کہ ویب سائٹ کی انتظامیہ کو پاکستان میں لگنے والی پابندی کی وجہ سے ناقابل تلافی نقصان پہنچا ہے۔ ادھر امریکہ کے موقر جریدے نیوز ویک نے فیس بک کے بانی مارک زوگر برگ کو انسانی مزاج و احساسات سے ناآشنا اور تعلقات عامہ کے فن میں نااہل قرار دیا ہے ۔نیوز ویک نے اپنی تازہ اشاعت میں کہا ہے :

مارگ زوگر اور اس کے ساتھی انفارمیشن ٹیکنالوجی کے تو ماہر ہیں مگر انسانی تعلقات کو سمجھنے کی صلاحیت سے محروم ہیں۔ انہوں نے پرائیویسی پالیسی کے حوالے سے سوچ میں غیر معمولی سقم کا مظاہرہ کیا ہے۔ فیس بک کا تعلقات عامہ کا شعبہ ناکارہ ہے۔ بحران حل کرنے کے بجائے وہ صورتحال کو مزید بگاڑ رہے ہیں۔ ابتدا میں پرائیویسی پالیسی پر نظر ثانی نہ کرنے کا اعلان کیا گیا اور اب کہا جارہا ہے کہ فیس بک کے ممبران کے دباوٴ پر پالیسی کا جائزہ لیا جارہا ہے۔ان ہتھکنڈوں سے فیس بک کی مقبولیت کو ناقابل تلافی نقصان پہنچ سکتا ہے۔

دوستو! میں آج اپنے آپ سے پوچھتا ہوں کہ یہ میرا کیا وطیرہ ہے کہ آنحضو ر (صلی اللہ علیہ وسلم) سے عقیدت بھی ہے، ان کی شفاعت کا سہارا بھی ہے اور فیس بک کو چھوڑنا بھی گوارا نہیں:

عشق قاتل سے، مقتول سے ہمدردی بھی

یہ بتا کس سے محبت کی جزا مانگے گا ؟

سجدہ خالق کو بھی، ابلیس سے یارانہ بھی

حشر میں کس سے عقیدت کا صلہ مانگے گا ؟

سب کچھ پاکستان میں ہے

2010-05-30T00:57:00.002+03:00

لفظوں کی یہ باوزن بندش ضرب المثل بنتی جا رہی ہے کہ ۔۔۔۔
"سب کچھ پاکستان میں ہے"۔
تمام موسم ، تمام قدرتی نعمتیں ، معدنیات ، پھل ، پھول ، فطین ذہن ، ارفع خیال ، صاحبانِ حسن ، صاحبانِ جمال ، اصحابِ کمال ، صاحبانِ ثروت و مال اور غربت کے غم سے نڈھال ، لوٹنے والے ، لٹانے والے ، ظلم کرنے والے ، ظلم سہنے والے ، قانون بنانے والے اور اسے توڑنے والے ، ووٹ دینے والے اور ووٹ لینے والے ۔۔۔۔۔۔
جی ہاں ، سب کچھ پاکستان میں ہے !!

ہمارے ہاں قومی زبان اردو بولنے والے بھی ہیں جن کی 99 فیصد تعداد عوام میں پائی جاتی ہے۔ اسی طرح قومی زبان "اردو" سے کھلواڑ کرنے والے بھی ہیں جن کی 99 فیصد تعداد ذرائع ابلاغ کے مختلف شعبوں میں اپنا کام دکھا رہی ہے۔ وطن عزیز میں نجی چینل کسی "وبا" کی طرح پھیلے ہوئے ہیں۔ ان پر ناشتے ، ظہرانے اور عشائیے کے علاوہ شام کی چائے کے اوقات کے زیرعنوان پروگرام نشر ہوتے ہیں۔ یہ ہمارے نوجوانوں میں انتہائی مقبول ہیں کیونکہ ایسے زیادہ تر پروگرام صرف دیکھنے کے لائق ہوتے ہیں ، سننے کے نہیں !
ان چینلز نے بھانپ لیا ہے کہ نوجوانوں میں وہی پروگرام مقبول ہوتے ہیں جن میں "اینکرز" نہیں بلکہ "اینکرنیاں" ہوں۔
یہ وہ نت نئے ملبوسات پہنے ، دوپٹے کو درخور اعتناء نہ جانے ، کرسی پر بیٹھی ، شانے اچکاتی ، اور ریختہ کے بخیے ادھیڑتی نظر آتی ہیں کیونکہ وہ نہ صرف تن زیبی کے حوالے سے "متاثرینِ مغرب" میں شامل ہوتی ہیں بلکہ قومی زبان بولتے ہوئے بھی انہیں کچھ "کمتری" کا سا احساس ہوتا ہے۔ اسی لیے وہ اردو میں کچھ کچھ انگلش شامل کرنے کے بجائے انگلش میں کچھ کچھ اردو بول جاتی ہیں ۔۔۔۔ مثلاً ، ان کا مہمان اگر کوئی فنکار ہو تو اس سے سوال کچھ یوں کرتی ہیں کہ :
"آپ اس فیلڈ میں کیسے آئے ؟ آئی مین ! واز اِٹ یور اون ایمبیشن اور اے نیچرلی بیسٹوڈ گفٹ؟ ناظرین جاننا چاہیں گے"۔
حالانکہ ناظرین کی کم از کم 60 فیصد تعداد کو تو یہی پتا نہیں ہوتا کہ ان کی نمائیندگی کرتی ہوئی اس اینکرنی نے کیا سوال کیا ہے؟ اس دوران "کالر کی کال" بھی لی جاتی ہے اور وہ نہایت سفاکی سے "حقیقت" کا اظہار یوں کرتا ہے کہ :
"آپ مجھے بہت اچھی لگتی ہیں"۔
ایسے میں ہر نوجوان یہی سوچتا ہے کہ کاش یہ "کالر" میں ہی ہوتا۔

جیسا کہ ہم نے کہا نا کہ "سب کچھ پاکستان میں ہے"
چنانچہ ایک جانب اگر ایسی "اینکرنیاں" اردو کا تیاپانچہ کر رہی ہیں تو دوسری جانب وطن سے بےحد محبت کرنے والی نستعلیق شخصیات بھی کم نہیں۔ ان میں وطنیت کوٹ کوٹ کر بھری ہے۔ لوگ انہیں "اردو میڈیم" کا "طعنہ" دیتے ہیں جسے وہ اعزاز سمجھتے ہیں۔ جب تک ایسے لوگ پاکستان میں موجود ہیں ، اردو پروان چڑھتی رہے گی ۔۔۔۔۔۔

- معروف انشائیہ نگار شہزاد اعظم کے انشائیہ "جناب و بیگم ریختہ" سے ایک اقتباس

فیس بک تنازعہ -- (ڈپلیکیٹ)

2010-05-26T12:12:00.001+03:00

انتہائی معذرت کے ساتھ ۔۔۔۔۔

فیس بک تنازعہ سے متعلق اپنا پچھلا مراسلہ (جو کہ ابھی کچھ دیر قبل پوسٹ کیا تھا) ، میں دوبارہ یہاں ارسال کر رہا ہوں۔
مجھے شکایت ملی ہے کہ اس پوسٹ کے ربط (url) میں فیس بک کا لفظ ہونے کے سبب ، پاکستان میں یہ مراسلہ PTA کی جانب سے بلاک کر دیا گیا ہے۔
چونکہ بلاگ اسپاٹ کے کسی بھی مراسلے کا یو-آر-ایل تبدیل نہیں کیا جا سکتا ، اسی لیے ایک علیحدہ مراسلے کی شکل میں دوبارہ ارسال کر رہا ہوں۔

فیس بک کو 31-مارچ-2010ء تک کے لیے حکومت پاکستان کی جانب سے بین کر دیا گیا ہے۔
سعودی عرب اور دیگر عرب ممالک نے فیس بک کے صرف اُس خاص صفحہ کو بین کیا ہے جس سے تنازعہ پھیلا ہے۔ یہ متنازعہ صفحہ آج بھی فیس بک پر موجود ہے اور لگتا تو یہی ہے کہ فیس بک کی جانب سے اسے حذف نہیں کیا جائے گا۔

دنیا کے کسی کونے میں بھی ہو ، ایک مسلمان اپنے نبی (صلی اللہ علیہ وسلم) کی شان میں گستاخی یقیناً برداشت نہیں کر سکتا۔ کیا یہ چیز بھی دنیا کے کسی انسان کو ، چاہے وہ کسی بھی مذہب سے تعلق رکھتا ہو ، سمجھانے کی ضرورت ہے کہ وہ اپنے مذہب کی اعلیٰ اور مقتدر ہستی پر کی جانے والی تضحیک و استہزاء کو صرف اس لیے برداشت کرے کہ "آزادئ اظہارِ رائے" فرد کا بنیادی حق ہے؟
آج کے گلوبل ولیج میں کس کا بنیادی حق کیا ہے اور کس قدر ہے اور کتنی حد میں ہے ۔۔۔۔ اس کا فیصلہ کون کرے گا؟
کیا اس کا فیصلہ انکل سام کریں گے؟ یا فیس بک انتظامیہ ؟ یا وہ صیہونی لابی جو دنیا کے تمام مالی معاملات پر غاصبانہ قبضہ رکھتی ہے؟

بےشک ! مانا کہ آج مسلمان اس حالت میں نہیں ہیں کہ اپنا فیصلہ یا اپنے اصول و ضوابط دنیا سے قبول کرا سکیں یا کم سے کم انہیں قائل ہی کر سکیں۔ مگر کیا اس کا یہ مطلب ہے کہ "بنیادی انسانی حقوق" پر صرف کسی ایک طبقہ کی اجارہ داری قائم ہو جائے؟
نسلِ انسانی کا ایک بنیادی حق جو صدیوں سے چلا آ رہا ہے ، وہ ہے : جیو اور جینے دو !
خود جینے اور دوسروں کو جینے دینے کے لیے ایک دوسرے کے تئیں عزت و احترام لازمی امر ہے۔

اڈولف ہٹلر ۔۔۔۔ تاریخ کی وہ شخصیت ہے جس کے کردار کے کسی ایک "اچھے" پہلو کی بھی سادہ انداز میں تعریف کی جائے تو ایک "خاص طبقہ" کو گویا آگ لگ جاتی ہے اور تعریف کرنے والے فرد یا گروہ کو الزام دیا جاتا ہے کہ "جیو اور جینے دو" کے اصول کے برخلاف اس طرح کی تعریف کے ذریعے "ایک قوم" کے جذبات کو مشتعل کیا جا رہا ہے۔ کمال کی بات تو یہ ہے کہ ایسا الزام لگاتے وقت "اس قوم" کو اپنے ہی ایک زریں اصول "آزادئ اظہارِ رائے" کی بالکل بھی یاد نہیں آتی ! اور یوں جنگ چھیڑ دی جاتی ہے کہ قومِ یہود کو پریشان کیا جا رہا ہے ، ان کی توہین و ملامت کی جا رہی ہے۔

اس کی مثال دیکھنی ہو تو اس صفحہ کو وزٹ کیجئے :
One Facebook, Two Faces [One is Real Ugly ]

فیس بک انتظامیہ کے تضاد یا دہرے معیار کی یہ اعلیٰ مثال بلکہ ثبوت روزِ روشن کی طرح عیاں ہے۔

فیس بک کو Adolf Hitler Fan Page اس لیے برداشت نہیں کہ اس سے کسی قوم / مذہب کے جذبات کو ٹھیس پہنچتی ہے۔

مگر۔۔۔۔

فیس بک کو Draw Muhammad Day Page اس لیے قبول ہے کہ یہ "آزادئ اظہارِ رائے" کے زمرے میں آتا ہے (چاہے اس صفحہ کے ذریعے کسی قوم یا مذہب کے ماننے والوں کو کتنی ہی دلی تکلیف کیوں نہ پہنچتی ہو )۔

صاف بات یہ ہے کہ ۔۔۔۔۔
گلوبل ولیج پر اپنا من چاہا فیصلہ مسلط کرنے والوں کو "بنیادی انسانی حقوق" کی پاسداری سے کوئی سروکار نہیں بلکہ یہ چاہتے ہیں کہ دنیا صرف ان ہی کے تخلیق کردہ خودساختہ اور متضاد اصول و ضوابط کو قبول کرے اور اس پر عمل پیرا ہو ۔۔۔ اب چاہے ان اصولوں سے کسی نسل ، قوم ، قبیلہ ، مذہب ، زبان ، ثقافت ، جنس ، جسمانی معذوری وغیرہ کی کتنی ہی خلاف ورزی کیوں نہ ہوتی ہو۔

یہ ایک علیحدہ موضوع ہے کہ ان حالات میں فیس بک کا استعمال کیا جانا چاہئے یا نہیں؟
کیا تمام مسلمانوں کو فیس بک پر سے اپنا اکاؤنٹ مستقلاً ختم کر لینا چاہئے؟

اسلام نے سائینس اور جدید تکنالوجی کے ذرائع سے استفادہ اور ان کے ذریعے تبلیغِ دین کو شائد کہیں بھی منع نہیں کیا بلکہ اس کی ترغیب ہی دلائی ہے۔ مگر سوال یہ ہے کہ کیا کوئی ایسا مخصوص ذریعہ بھی استعمال کیا جانا درست ہے جس کے کسی حصہ سے ہمارے پیارے نبی صلی اللہ علیہ وسلم کی مسلسل اہانت کی جاتی ہو؟ کیا "امر بالمعروف نھی عن المنکر" کی خاطر حمیتِ دین یا غیرتِ ملی سے دامن چھڑا لینا چاہئے؟

وقت کی نزاکت کو دیکھتے ہوئے ضروری ہے کہ اسلامی ممالک کے سربراہان اور معتبر و مقتدر علمائے کرام حفظہم اللہ اس موضوع پر اپنی مشترکہ رائے اور اپنے عملی اقدام سے دنیا کو آگاہ کریں۔

اس کا فیصلہ عوام کے جذبات پر چھوڑا جانا بہرحال درست عمل نہیں ہوگا !!

فیس بک [Facebook] ۔۔۔۔۔۔۔۔ ؟!

2010-05-26T10:16:00.002+03:00

فیس بک کو 31-مارچ-2010ء تک کے لیے حکومت پاکستان کی جانب سے بین کر دیا گیا ہے۔
سعودی عرب اور دیگر عرب ممالک نے فیس بک کے صرف اُس خاص صفحہ کو بین کیا ہے جس سے تنازعہ پھیلا ہے۔ یہ متنازعہ صفحہ آج بھی فیس بک پر موجود ہے اور لگتا تو یہی ہے کہ فیس بک کی جانب سے اسے حذف نہیں کیا جائے گا۔

دنیا کے کسی کونے میں بھی ہو ، ایک مسلمان اپنے نبی (صلی اللہ علیہ وسلم) کی شان میں گستاخی یقیناً برداشت نہیں کر سکتا۔ کیا یہ چیز بھی دنیا کے کسی انسان کو ، چاہے وہ کسی بھی مذہب سے تعلق رکھتا ہو ، سمجھانے کی ضرورت ہے کہ وہ اپنے مذہب کی اعلیٰ اور مقتدر ہستی پر کی جانے والی تضحیک و استہزاء کو صرف اس لیے برداشت کرے کہ "آزادئ اظہارِ رائے" فرد کا بنیادی حق ہے؟
آج کے گلوبل ولیج میں کس کا بنیادی حق کیا ہے اور کس قدر ہے اور کتنی حد میں ہے ۔۔۔۔ اس کا فیصلہ کون کرے گا؟
کیا اس کا فیصلہ انکل سام کریں گے؟ یا فیس بک انتظامیہ ؟ یا وہ صیہونی لابی جو دنیا کے تمام مالی معاملات پر غاصبانہ قبضہ رکھتی ہے؟

بےشک ! مانا کہ آج مسلمان اس حالت میں نہیں ہیں کہ اپنا فیصلہ یا اپنے اصول و ضوابط دنیا سے قبول کرا سکیں یا کم سے کم انہیں قائل ہی کر سکیں۔ مگر کیا اس کا یہ مطلب ہے کہ "بنیادی انسانی حقوق" پر صرف کسی ایک طبقہ کی اجارہ داری قائم ہو جائے؟
نسلِ انسانی کا ایک بنیادی حق جو صدیوں سے چلا آ رہا ہے ، وہ ہے : جیو اور جینے دو !
خود جینے اور دوسروں کو جینے دینے کے لیے ایک دوسرے کے تئیں عزت و احترام لازمی امر ہے۔

اڈولف ہٹلر ۔۔۔۔ تاریخ کی وہ شخصیت ہے جس کے کردار کے کسی ایک "اچھے" پہلو کی بھی سادہ انداز میں تعریف کی جائے تو ایک "خاص طبقہ" کو گویا آگ لگ جاتی ہے اور تعریف کرنے والے فرد یا گروہ کو الزام دیا جاتا ہے کہ "جیو اور جینے دو" کے اصول کے برخلاف اس طرح کی تعریف کے ذریعے "ایک قوم" کے جذبات کو مشتعل کیا جا رہا ہے۔ کمال کی بات تو یہ ہے کہ ایسا الزام لگاتے وقت "اس قوم" کو اپنے ہی ایک زریں اصول "آزادئ اظہارِ رائے" کی بالکل بھی یاد نہیں آتی ! اور یوں جنگ چھیڑ دی جاتی ہے کہ قومِ یہود کو پریشان کیا جا رہا ہے ، ان کی توہین و ملامت کی جا رہی ہے۔

اس کی مثال دیکھنی ہو تو اس صفحہ کو وزٹ کیجئے :
One Facebook, Two Faces [One is Real Ugly‪]

فیس بک انتظامیہ کے تضاد یا دہرے معیار کی یہ اعلیٰ مثال بلکہ ثبوت روزِ روشن کی طرح عیاں ہے۔

فیس بک کو Adolf Hitler Fan Page اس لیے برداشت نہیں کہ اس سے کسی قوم / مذہب کے جذبات کو ٹھیس پہنچتی ہے۔

مگر۔۔۔۔

اس کا فیصلہ عوام کے جذبات پر چھوڑا جانا بہرحال درست عمل نہیں ہوگا !!

13 جنوری 1948ء - پاکستان کا مقصد کیا ۔۔۔ سیکولرزم یا اسلام ؟

2010-01-15T02:42:00.003+03:00

پاکستان کا مطلب کیا
لا الٰه الا الله
یہ وہ نعرہ ہے جس نے قیامِ پاکستان کی تحریک کے دوران مسلمانوں میں جوش و خروش پیدا کیا تھا ۔

بانئ پاکستان محمد علی جناح نے قیامِ پاکستان سے پہلے اور اس کے بعد بھی متعدد مواقع پر قیامِ پاکستان کے مقاصد کو نہایت واضح اور غیر مبہم الفاظ میں بیان کیا ہے ۔
13۔ جنوری 1948ء کو اسلامیہ کالج ، پشاور کے جلسہ میں حصولِ پاکستان کا مقصد بیان کرتے ہوئے قائد پاکستان نے فرمایا تھا :
ہم نے پاکستان کا مطالبہ ایک زمین کا ٹکڑا حاصل کرنے کے لیے نہیں کیا تھا بلکہ ہم ایک ایسی تجربہ گاہ حاصل کرنا چاہتے تھے جہاں ہم اسلام کے اصولوں کو آزما سکیں ۔

we did not demanded Pakistan just for the sake of a piece of land. Instead, we wanted to obtain such a laboratory, where we can adopt the Principles of Islam.
Ref.: Link

آج اگر پاکستانی ذرائع ابلاغ میں سیکولرزم کی تازہ لہر چل نکلی ہے تو اس کے پسِ پشت عالمی منصوبہ بندی کا شبہ بھی ناممکن نہیں ۔ اور اس قسم کی منصوبہ بندی کا اہم ترین ہدف یہ ہے کہ پاکستان اور دیگر اسلامی ممالک میں اسلامی تحریکوں کو کامیاب نہ ہونے دیا جائے ۔
بے شک پاکستان میں صحافت کو اور صحافیوں کو آزادئ رائے کی سہولت حاصل ہے ۔ اسی سبب اگر ... پاکستان کے سیکولر مزاج صحافی دانستہ یا نادانستہ طور پر اپنے مضامین میں پاکستان کی نظریاتی اساس پر حملہ کرتے ہیں تو اس پر غصہ یا ناراضگی کا جذباتی اور غیر ضروری اظہار مناسب عمل نہیں ۔ بلکہ ایسے مواقع پر ہونا تو یہ چاہئے کہ وہ صحافتی طبقہ بھی کھل کر سامنے آئے جس کے نزدیک نظریۂ پاکستان کا دوسرا نام اسلام ہے ۔

* نظریۂ پاکستان . .. یعنی پاکستان آئیڈیالوجی کی اصطلاح کب اور کس سوچ کے تحت استعمال کی گئی ؟
* کیا پاکستان کا مطالبہ حقیقت میں محض زمین کے ایک ٹکڑے کے حصول کی خاطر کیا گیا تھا ؟
* جس ریاست کے دستور کے پیشِ نظر شریعتِ اسلامی رہی ہو کیا اس ریاست کو سیکولر ریاست کا درجہ دیا جا سکتا ہے ؟
* کیا قائد پاکستان نے نظریۂ پاکستان کا نعرہ کبھی استعمال ہی نہیں کیا تھا ؟
* کیا یہ حقیقت ہے کہ نظریۂ پاکستان کی اصطلاح جماعتِ اسلامی کی قائم کردہ ہے ؟

اِن تمام سوالات کے جوابات سے نئی نسل کو واقف کرانے کی خاطر آج یہ امر ضروری ہو گیا ہے کہ تاریخِ قیامِ پاکستان کے گمشدہ اوراق کو تلاش کیا جائے ۔

نظریۂ پاکستان یا پاکستان آئیڈیالوجی یا پاک آئیڈیالوجی کی اصطلاح ... سب سے پہلے لفظ "پاکستان" کے خالق چودھری رحمت علی نے 1934ء میں استعمال کی تھی ۔ ان کے اپنے الفاظ یوں ہیں :

The effect of Pak-Ideology on the myth of Indian unity has been devastating. It has destroyed the cult of uni-nationalism and uni-territorialism of India and created instead the creed of the multi-nationalism and multi-territorialism of "Dinia" (South Asia).

ہندوستانی وحدت کے موہوم راز پر پاک آئیڈیالوجی کے بہت تباہ کن اثرات مرتب ہوئے ۔ اس نے وحدانی علاقائیت ، وحدانی قومیت کے عمومی تصور کو ختم کر دیا اور اس کے بجائے کثیر القومیت اور کثیر علاقائیت یعنی دینیہ (جنوبی ایشیا) کے تصور کو پروان چڑھایا ۔

Ref.: Pakistan - The Father Land of the Pak Nation. By: Ch. Rehmat Ali, P:205

نظریۂ پاکستان کا تعلق یقینی طور پر تحریکِ پاکستان سے مربوط ہے ۔ خود قائد پاکستان نے بھی نظریۂ پاکستان کے الفاظ اپنی تقریروں میں ارشاد فرمائے تھے ۔

It is by our own dint of arduous and sustained efforts that we can create strength and support our people not only to achieve our freedom and independance but to be able to maintain it and live according to Islamic ideals and principles.
Pakistan not only means freedom and independance but the Muslim Ideology which has to be preserved, which has come to us as a precious gift and treasure and which we hope other will share with us.

ہم اپنی سخت اور پیہم جدوجہد کے ذریعے قوت بہم پہنچا سکتے ہیں ، ہم نہ صرف آزادی کے حصول کے لیے اپنے لوگوں کی معاونت کر سکتے ہیں ، بلکہ ہم انہیں اس قابل بھی بنا سکتے ہیں کہ وہ اس کو قائم رکھیں اور اسلامی آدرش اور اصولوں کے مطابق اپنی زندگی بسر کر سکیں ۔
پاکستان کا مطلب محض آزادی نہیں ہے ، اس کا مطلب مسلم آئیڈیالوجی بھی ہے جس کا تحفظ کیا جانا باقی ہے ، جو ہم تک ایک قیمتی تحفے اور خزانے کے طور پر پہنچا ہے ۔ ہم امید کرتے ہیں کہ دوسری (اقوام) بھی اس میں حصہ دار بن سکتی ہے ۔

Ref.: Some recent speeches and writing of Mr.Jinnah. Published By: Sh. Muhammad Ashraf, Lahore, 1947. Page:89.

اسلام دشمن طبقہ نے جب قائد پاکستان کی ایک تقریر کا من چاہا مفہوم اخذ کرتے ہوئے یہ منفی پروپیگنڈا شروع کیا تھا کہ پاکستان کا دستور اسلامی شریعت کی بنیاد پر نہیں بنایا جائے گا ... تب قائد پاکستان نے بھرپور انداز میں اس شرانگیزی کی مذمت کی تھی ۔
25۔ جنوری 1948ء کو کراچی بار اسوسی ایشن سے خطاب کرتے ہوئے قائد پاکستان نے فرمایا تھا :
میں ان لوگوں کی بات نہیں سمجھ سکتا ، جو دیدہ و دانستہ اور شرارت سے پروپیگنڈا کرتے رہتے ہیں کہ پاکستان کا دستور شریعت کی بنیاد پر نہیں بنایا جائے گا ۔ اسلام کے اصول عام زندگی میں آج بھی اسی طرح قابل اطلاق ہیں ، جس طرح تیرہ سو سال پہلے تھے ۔
میں ایسے لوگوں کو جو بدقسمتی سے گمراہ ہو چکے ہیں ، یہ صاف صاف بتا دینا چاہتا ہوں کہ نہ صرف مسلمانوں کو بلکہ یہاں غیر مسلمانوں کو بھی کوئی خوف نہیں ہونا چاہئے ۔

Why this feeling of nervousness that the future constitution of Pakistan is going to be in conflict with Shariat Laws? Islamic principles today are as applicable to life as they were 1,300 years ago.
I would like to tell those who are misled by propaganda that not only the Muslims but Non Muslims have nothing to fear.
Ref. : Link1 / Link2

علاوہ ازیں قائد پاکستان نے 4۔ فبروری 1948ء کو سبی میں خطاب کے دوران یہ واضح ترین الفاظ بھی ارشاد فرمائے :
میرا ایمان ہے کہ ہماری نجات کا واحد ذریعہ اس سنہری اصولوں والے ضابطہ حیات پر ہے جو ہمارے عظیم واضعِ قانون پیغمبرِ اسلام (صلی اللہ علیہ وآلہ وسلم) نے ہمارے لیے قائم کر رکھا ہے ۔ ہمیں اپنی جمہوریت کی بنیادیں سچے اسلامی اصولوں اور تصورات پر رکھنی چاہئیں ۔ اسلام کا سبق یہ ہے کہ مملکت کے امور و مسائل کے بارے میں یہ فیصلے باہمی بحث و تمحیص اور مشوروں سے کیا کرو

It is my belief that our salvation lies in following the golden rules of conduct set for us by ou great law-giver, the Holy Prophet of Islam (peace be upon him). Let us lay the foundation of our democracy on the basis of truly Islamic ideals and principles. Our Almighty has taught us that "our decisions in the affairs of the State shall be guided by discussions and consultations".
Tribal Politics in Baluchistan - Ch.-III:Tribal attitude towards Pakistan, P:56

پسِ نوشت :

کچھ سال قبل یہ تحریر ایک ویب سائیٹ پر میں نے لگائی تھی جو اب بند ہو چکی ہے۔ پھر یہی اقتباسات اردو مجلس فورم پر یہاں پیش کئے تھے۔ اور اب ابوشامل کی اس تحریر : قائد اعظم – ایک سیکولر رہنما؟ سے متاثر ہو کر اس بلاگ پر بھی شامل کیے جا رہے ہیں۔

I love you

2009-12-27T13:50:00.000+03:00

بڑا عجیب زمانہ آ گیا ہے۔ زندگی خاصی تیز رفتار ہو گئی ہے۔
ایک طرف نوجوان نسل مغربی تہذیب ، مغربی رسم و رواج سے متاثر ہو رہی ہے تو دوسری طرف جب متنازعہ کارٹون شائع ہوتے ہیں تو ہنگامہ مچ جاتا ہے ، جگہ جگہ مظاہرے کئے جاتے ہیں۔ نوجوان اسلام کی طرف لوٹنا بھی چاہتے ہیں اور وہ آزادی بھی حاصل کرنا چاہتے ہیں جس کے لالچ کا لالی پاپ مغربی تہذیب دکھا رہی ہے۔

I love you
نہایت عام سا محاورہ بن چکا ہے۔ مگر کیا یہ "محبت" ہے؟؟
نہیں۔ یہ تو نوعمری ، نوجوانی کا محض ایک جذباتی لگاؤ ہے۔ جو انسانی نفسیات کے مطابق عمر کے ایک مخصوص عرصہ میں دل و دماغ پر چھا جاتا ہے۔
ایسے ہی مواقع پر نوجوان نوعمر نسل کو ناصحانہ ہمدردی کی ضرورت لاحق ہوتی ہے۔ مگر یہ بات وہ کسی سے نہیں کہتے۔ اپنے والدین سے بھی نہیں!
ہم میں سے کتنے ہیں جو یہ بات خود سمجھتے ہوں اور آگے بڑھ کر اپنی نسل کو ٹوٹنے بکھرنے سے بچاتے ہوں ۔۔۔۔۔ ہم میں سے کتنے لوگ ہیں جو ایسا سوچتے ہیں ؟؟!!

ہمارے دوست رفی صاحب کہتے ہیں :

ہمارے ہاں قرآن و سنت میں کسی بھی معاشرتی پہلو بشمول جنسی امور پر بات کرنے سے ہچکچاہٹ نہیں کی گئی تو پھر کیا وجہ ہے کہ والدین و اساتذہ نئی نسل کو اس کے بارے میں بتانے سے نہ صرف گریز کرتے ہیں بلکہ شروع سے ہی ان کے ذہنوں میں بھر دیا جاتا ہے کہ یہ ایک ناپاک فعل ہے جس پر بات کرنا انتہائی معیوب ہے نتیجتاً معصوم بچے اور بچیاں حیوانیت کا شکار ہو کر بھی اپنے اوپر ہونے والے ظلم و زیادتی کی فریاد اپنے گھروالوں تک نہیں کر پاتے۔

جنس (سیکس) انسانی زندگی کی ایک ناگزیر اور اہم حقیقت ہے، اسے ہوّا سمجھنا ایک فاش غلطی ہے۔ مگر افسوس کہ ہمارے معاشرے میں آج تک اسے وہ مقام حاصل نہ ہو سکا جو اس کا حق تھا ، وہ اہمیت نہ مل سکی جو اسے ملنی چاہئے تھی۔

درحقیقت جنس کا راز ، زندگی اور افزائش نسل کا راز ہے جسے صحت مند طریقے سے سمجھنے اور معلومات حاصل کرنے میں ہماری فلاح و بہبود مضمر ہے۔
نیٹ کی تیز رفتار زندگی کے باوجود آج بھی صحت مند اور مفید جنسی معلومات کے دروازے بند ہیں, خصوصاً ہماری زبان اردو میں۔ جو کچھ انگلیوں کی ٹپ پر گوگلنگ سے سامنے آتا ہے وہ مہذب و مفید معلومات نہیں بلکہ بیشتر اوقات فحاشی کی ترغیب پر مشتمل مواد ہوتا ہے۔ دوسری طرف ۔۔۔۔ والدین خاموش ، اسکول اور کالج کے اساتذہ چپ ، مذہبی پیشوائیان منہ بند کئے ہوئے ۔۔۔۔
لے دے کے کوئی ہمت بھی کرتا ہے تو وہ بھی صرف بےتکلف دوستوں کی محفل میں سرگوشی کی حد تک۔ اور یہ کون "دوست" ہیں؟ وہ خود بھی اس گھٹے ہوئے ماحول کے تربیت یافتہ ہیں جو "جنس" کا واضح ، صحت مند اور اَپ ڈیٹیڈ تصور نہیں رکھتے بلکہ صدیوں سے چلے آ رہے غلط تصورات ، نظریات اور توہمات کو "جنسی علم" سمجھتے رہے ہیں۔

اور بڑے مزے کی بات تو یہ ہے کہ جب نونہالانِ قوم پڑھ کر جوان ہوتے ہیں تو ان سے یہ توقع رکھی جاتی ہے کہ اسکول اور کالج کے امتحانات کی طرح ازدواجی زندگی میں بھی کامیابی کا ثبوت دیں گے۔

اگر انسانوں کو اپنے جبلی تقاضوں اور فطری خواہشات کی تکمیل کے لیے علم و فن کی ضرورت پڑتی ہے تو کیا زندگی کے دیگر تقاضوں کی طرح جنس بھی ایک تقاضا نہیں ہے؟ کیا اس تقاضے کی موثر تکمیل کے لیے علم کی ضرورت نہیں ہے؟ کیا انسان اور حیوان میں کوئی فرق نہیں کہ ہم اس معاملے میں علم کی ضرورت کو نظرانداز کر دیں کہ افزائش نسل میں تو جانور بھی مصروف ہیں اور وہ اس کا کوئی علم حاصل نہیں کیا کرتے!

اولاد کے جوان ہوتے وقت جنسی تبدیلیوں/تقاضوں کو مذہب و تہذیب کے دائرے میں رہ کر انہیں سمجھانا اور اس علم کے سہارے انہیں اپنے جسمانی و ذہنی تحفظ کا خیال دلانا ، والدین اور سرپرستوں کا یقینی فرض بنتا ہے۔

ہمارے سماج نے جنسی مسائل سے متعلق نئی نسل میں صحیح شعور پیدا کرنے کی کوئی کوشش نہیں کی ، جس پر نوجوان نسل کی شخصیت کی تعمیر کا انحصار ہے۔ جنسی جبلت کو اتنی اہمیت بھی نہیں دی گئی جس کی عقلِ سلیم متقاضی ہے بلکہ اسے غیرفطری میلان سمجھ کر دبایا گیا یا پھر موسمی چیز سمجھ کر سرپرستوں / والدین نے نوجوانوں کو اس "موسمی چیز" کے چکھنے سے باز رکھا۔
نتیجہ ؟
ظاہر ہے کہ ان کوتاہیوں/نادانیوں کے سبب سلگتے شباب بھڑک اٹھے اور دہکتی جوانیاں اپنی ہی آگ میں جل کر ڈھیر ہو گئیں اور خاکستر میں بسی کچھ چنگاریاں نفسی امراض کے چنگل میں دم توڑ رہی ہیں۔

ہجرت کا سبق - ' امید '

2009-12-26T08:22:00.004+03:00

ہجرت کے تمام واقعات کا سب سے بڑا سبق "امید" ہے۔
امت ، جو مایوسیوں کے اندھیروں میں ٹھوکریں کھا رہی ہے اس کے لیے ہجرت کا واقعہ "امید کی نئی کرن" دکھاتا ہے۔

چشم فلک نے وہ وقت دیکھا ہے جب اللہ کے رسول (صلی اللہ علیہ وسلم) کو اپنی محبوب سرزمین چھوڑنی پڑی۔ نعیم صدیقی اپنی معروف تصنیف "محسنِ انسانیت" میں واقعہ کی عکاسی کرتے ہوئے لکھتے ہیں:

آج مکہ کے پیکر سے اس کی روح نکل گئی تھی۔ آج اس چمن کے پھولوں سے خوشبو اڑی جا رہی تھی، آج یہ چشمہ سوکھ رہا تھا، آج اس کے اندر سے بااصول اور صاحبِ کردار ہستیوں کا آخری قافلہ روانہ ہو رہا تھا۔ دعوتِ حق کا پودا مکہ کی سرزمین سے اُگا لیکن اس کے پھلوں سے دامن بھرنا مکہ والوں کے نصیب میں نہ تھا ، پھر مدینہ والوں کے حصے میں آئے۔ آج دنیا کا سب سے بڑا محسن و خیرخواہ (صلی اللہ علیہ وسلم) بغیر کسی قصور کے بےگھر ہو رہا ہے۔ کلیجہ کٹا ہوگا، آنکھیں ڈبڈبائی ہوں گی، جذبات امڈے ہوں گے مگر خدا کی رضا اور زندگی کا مشن چونکہ اس قربانی کا بھی طالب ہوا، اس لیے انسانِ کامل نے یہ قربانی بھی دے دی۔

رسول اللہ (صلی اللہ علیہ وسلم) نے مکہ کے پہاڑوں ، گلیوں اور وادیوں پر آخری نگاہ ڈالی ، یہی وہ گلیاں، یہی وہ پہاڑ اور وادیاں ہیں جہاں آپ (صلی اللہ علیہ وسلم) کا بچپن گزرا، جہاں آپ (صلی اللہ علیہ وسلم) جوان ہوئے۔ الوداعی نگاہ ڈالتے ہوئے مکہ سے خطاب فرمایا :
خدا کی قسم ! تو اللہ کی سب سے بہتر زمین ہے اور اللہ کی نگاہ میں سب سے بڑھ کر محبوب ہے۔ اگر یہاں سے مجھے نہ نکالا جاتا تو میں کبھی نہ نکلتا۔

(ترمذی ، مسند احمد)

اللہ تعالیٰ کی رضا اور مشن کی تکمیل کے لیے اللہ کے رسول (صلی اللہ علیہ وسلم) کو یہ قربانی بھی دینی پڑی مگر رہتی دنیا تک امت کے لیے ہجرت کا راستہ کھلا چھوڑا۔
آپ (صلی اللہ علیہ وسلم) کے فرمان کا مفہوم ہے :
ہجرت کا دروازہ اس وقت تک کھلا رہے گا جب تک توبہ کا دروازہ کھلا ہے اور توبہ کا دروازہ اس وقت تک کھلا ہوگا جب تک سورج مغرب سے طلوع نہ ہو۔

(ابوداؤد)

گویا آپ (صلی اللہ علیہ وسلم) نے ہجرت کو "تزکیہ" کا ہم معنی قرار دیا ہے۔

ایک اور جگہ پر آپ (صلی اللہ علیہ وسلم) ہجرت کے حقیقی مفہوم کو واضح کرتے ہوئے فرماتے ہیں:
حقیقی ہجرت کرنے والا وہ ہے جس نے ان امور سے ہجرت کی (یعنی: ترک کیا) جن سے اللہ تعالیٰ نے منع فرمایا ہے۔

(مسند احمد)

ہجرت کے ایک ایک واقعے میں "امید" کا سبق دہرایا جاتا ہے۔ مایوسیوں کے گرداب میں ڈوبتی اس امت کے دلوں میں امید کے جوت جگانے کی ضرورت ہے کہ ۔۔۔ کس طرح گھٹا ٹوپ اندھیرے سے نور کی کرن پھوٹتی ہے ، شر کے قلب سے خیر کا پہلو نکلتا ہے اور غموں کے بطن سے خوشی پیدا ہوتی ہے؟
تاریخ کا وہ کون سا دَور ہے جس میں امت کو امتحانوں سے گزارا نہ گیا ہو؟
آج ایک مرتبہ پھر امید کا سبق دہرایا جانا ہے !!
زمینی حقائق کا کہنا ہے کہ چاروں طرف موت منڈلا رہی ہے مگر آسمانی حقیقت کہتی ہے کہ جو اللہ پر بھروسہ کرے گا وہی اس کے لیے کافی ہوگا۔
آج امت چہار سو خطرات کی زد میں ہے۔ امت کے افراد میں سے جو دین پر عمل پیرا ہیں ان کا حال اس شخص سے مختلف نہیں جس نے انگارہ مٹھی میں اٹھا رکھا ہو۔

اس امت کو شروع دن سے سمجھایا گیا ہے کہ ۔۔۔۔۔
تنگی کے ساتھ فراخی بھی ہے، بےشک تنگی کے بعد فراخی بھی ہے۔

(الم نشرح : 5-6)

اس امت کے دین میں مایوسی کفر ہے ۔۔۔
اللہ کی رحمت سے مایوس نہ ہو ، اللہ کی رحمت سے مایوس کافر ہی ہوا کرتے ہیں۔

(یوسف : 87)

اللہ کی رحمت ایک مرتبہ پھر ہماری طرف متوجہ ہوگی ، یقیناً اللہ کی رحمت ہم سے قریب ہے۔
ہجرت کا بھولا ہوا سبق ہمیں یاد دلا رہا ہے کہ ۔۔۔۔۔۔
تاریکی کے بعد روشنی ہے ،
اندھیرا چھٹنے والا ہے اور
مومنین صادقین صبح صادق کو دیکھ کر خوش ہوں گے۔

یہی ہجرت کا سبق ہے !!

(ماخوذ از مضمون : نظر حجازی)

لایعنی باتیں اور ہمارا رویہ

2009-12-19T16:50:00.002+03:00

نبی اکرم صلی اللہ علیہ وسلم نے ارشاد فرمایا

انسان کے اسلام کی خوبی یہ ہے کہ لایعنی (غیر مفید) چیز کو ترک کر دے۔

اس ارشادِ نبوی (صلی اللہ علیہ وسلم) کو پڑھنے کے بعد خیال ہوتا ہے کہ یہ کون سی خاص ضرورت کی بات ہے ، نہ اس میں کسی ثواب کا ذکر ہے نہ عذاب کا وعدہ اور نہ ہی کسی کام کا حکم ہے۔
لیکن حضرت محمد صلی اللہ علیہ وسلم کی تعلیم میں یہی خوبی ہے کہ بڑے بڑے مہلک امراض کا علاج نہایت معمولی باتوں میں کر دیتے ہیں۔
یہ بظاہر معمولی بات ہے لیکن اس کو بجا لانے میں جو منافع ہیں اور ترک میں جو نقصان ہیں ان کو معلوم کر کے اس کی ضرورت و اہمیت واضح ہوگی۔
اس تعلیم سے بڑی غفلت ہے اور عوام و خواص سب کو ہے۔ گناہ سے تو سب کو ندامت ہوتی ہے لیکن "لایعنی امور" کا ارتکاب کر کے کسی کو ندامت نہیں ہوتی۔ چنانچہ غیبت کر کے پچھتاوا ہوتا ہے مگر ہنسی دل لگی کر کے کوئی نہیں پچھتاتا کہ اے اللہ ! میں نے فضول وقت ضائع کیا۔

نبی کریم صلی اللہ علیہ وسلم کا ارشاد ہے کہ

کثرتِ کلام دل کو سخت کر دیتا ہے اور زیادہ ہنسنے سے دل مردہ ہو جاتا ہے۔

مطلب یہ ہے کہ "لایعنی باتوں" سے دل مردہ ہو جاتا ہے اور نور جاتا رہتا ہے۔ نورِ قلب زائل ہونے سے طاعت کا شوق کم ہوتا ہے اور ہمت میں پستی آ جاتی ہے۔ اور جہاں شوق و ہمت میں کمی آئی وہیں گناہ کا سلسلہ شروع ہو جاتا ہے کیونکہ گناہوں سے بچنے کے لیے دو چیزوں کی ضرورت ہے : ایک شوق و محبت دوسرے ہمت۔

آخر کچھ تو وجہ ہے کہ ہمارے ہاں عمل میں بہت کوتاہی ہے۔ نمازیں بھی پڑھتے ہیں ، وضو بھی کرتے ہیں لیکن گناہ بھی کثرت سے کرتے ہیں۔ اس کی یہی وجہ ہے کہ نماز اور وضو سے قلب میں جو نور پیدا ہوتا ہے وہ "لایعنی امور" سے زائل ہو جاتا ہے۔

اس بات کو سمجھنا بھی ضروری ہے کہ کبھی کبھی "لایعنی امور" بھی ضروری ہو جاتے ہیں۔
مثلاَ : حدیث میں ہے کہ جب نماز پڑھتے پڑھتے نیند آنے لگے تو سو جاؤ۔
مثلاَ : امام غزالی (علیہ الرحمة) نے لکھا ہے کہ جب ذکر سے دل اکتا جائے تو ذاکر پر تھوڑی دیر ہنسنا بولنا واجب ہے۔

مختصر یہ کہ ہر پہلو کو سامنے رکھتے ہوئے اس حدیث پر عمل کیا جائے تو دل میں ایسا نور اور اطمینان رہے گا کہ اس دولت کے سامنے سلطنت بھی ہیچ معلوم ہو جائے گی کیونکہ اصل راحت اسی کا نام ہے کہ دل کو چین و سکون ہو !!

(مولانا اشرف علی تھانوی علیہ الرحمة کے مضمون سے مفید اقتباس)

شہادت ہے مطلوب و مقصود مومن ۔۔۔

2009-12-11T14:48:00.002+03:00

25 نومبر 2009ء کو جدہ میں ہونے والی طوفانی بارش نے جہاں جدہ (سعودی عرب) کے شہریوں کو بے شمار غم اور دردناک سانحوں سے دوچار کیا ہے وہیں انسانیت نواز واقعات نے تمام فرزندانِ اسلام خصوصاً پاکستانی کمیونٹی کا سر فخر سے بلند کر دیا ہے۔
32 سالہ پاکستانی نوجوان فرمان علی خان نے 14 افراد کی جان بچا کر 15 ویں شخص کو بچاتے ہوئے موت کو گلے لگا لیا۔
انا للہ وانا الیہ راجعون

سعودی عرب کے اخبارات نے فرمان علی خان کی جراتمندانہ شہادت کو بہترین الفاظ میں خراجِ عقیدت پیش کیا ہے۔ جدہ کے شہری اس کی ہمت، انسانیت نوازی اور ایثار کے جذبے کا تذکرہ بڑے فخر و ناز اور انتہائی ممنونیت سے کر رہے ہیں۔
فرمان علی خان کے بڑے بھائی رحمٰن علی خان نے الحیاۃ اخبار سے گفتگو کرتے ہوئے کہا کہ مجھے اپنے بھائی کی موت کا دکھ بےشک ہے لیکن جس انداز سے اس نے جامِ شہادت نوش کیا اس پر ہم سب پہلے تو رب کریم کے حضور سجدہ شکر ادا کرتے ہیں اور پھر بھائی کے کارنامے پر نازاں بھی ہیں۔

تفصیلات کے مطابق کے فرمان علی خان کراٹے کا چیمپیئن تھا۔اس نے جدہ میں آنے والے تاریخی سیلاب سے ٹکر لینے کی کوشش کی اور سیلاب کے جبڑوں سے 14 افراد کو نکالنے میں کامیاب ہوا، تاہم سیلاب نے اسے آخرت کے سفر پر روانہ کر دیا۔
یونیورسٹی گریجوایٹ فرمان علی دیگر رضاکارانہ سرگرمیوں کی توصیفی اسناد سے بھی اپنے سینے کو سجائے ہوئے تھا۔ ابھی وہ 16 برس کا ہی تھا کہ اس نے ایک آتشزدہ مکان میں داخل ہو کر گیس سیلنڈر نکال کر پورے محلے کو خوفناک المیے سے بچا لیا تھا۔ فرمان علی 6 برس قبل مملکت آیا تھا، اس کی تین بیٹیاں، زبیدہ (7 برس)، مدیحہ (6) برس اور جریرہ (4 برس) ہیں۔ 6 سالہ قیام کے دوران صرف دو مرتبہ ہی پاکستان گیا تھا اور سب سے چھوٹی بیٹی کو دیکھ بھی نہیں پایا تھا۔

اللہ اسے جنت الفردوس میں اعلٰی مقام سے سرفراز کرے۔ آمین !

فرمان علی کو جمعرات 10-ڈسمبر-2009ء کی دوپہر ان کے آبائی علاقے سوات میں سپردخاک کر دیا گیا۔

اس موقع پر فرمان علی کے بھائی محمد عزیز اور ان کے والد عمررحمان نے بتایا کہ خادم حرمین شریفین شاہ عبداللہ کی جانب سے بھی ہمارے بھائی کے کارہائے نمایاں پر انہیں تعریفی سند سے بھی نوازا گیا ہے۔

دریں اثنا فیس بک پر سعودی نوجوانوں نے متعلقہ سعودی اداروں سے مطالبہ کیا ہے کہ فرمان علی کے خاندان کو مالی امداد فراہم کی جائے اور جدہ کی ایک سڑک کو اس کے نام سے موسوم کیا جانا چاہئے۔

(خبر بشکریہ : اردو نیوز ، سعودی عرب)

ہمارے دوست رفی بھائی نے اس واقعہ پر تبصرہ کرتے ہوئے بالکل بجا فرمایا ہے کہ :

جہاں یہ واقعہ اسلام میں انسانیت کی قدروں میں ایک سنگِ میل کی حیثیت رکھتا ہے وہیں پاکستان میں ہونے والے آئے روز کے خودکش دھماکوں نے پاکستان اور اسلام کو سرنگوں کرنے کی مکروہ سازش جاری رکھی ہوئی ہے۔

اللہ سب مسلمانوں کو ایسا جذبہ عطا کرے کہ مشرق سے مغرب تک کہیں بھی نہ صرف مسلمان بلکہ کوئی بھی انسان دکھ درد میں مبتلا ہو تو ان کی مدد اپنی جان پر کھیل کر کی جائے نہ کہ مساجد میں مشغولِ عبادت افراد کی جانیں لے کر اسلام کو بدنام کیا جائے!

کامیابی کے گُر

2009-12-05T11:19:00.004+03:00

دنیا میں لوگوں کی تین قسمیں ہوتی ہیں۔
ایک : وہ لوگ جو اپنے ذاتی تجربات سے سیکھتے ہیں۔ یہ عقلمند لوگ ہوتے ہیں۔
دو : وہ لوگ جو دوسروں کے تجربات سے سیکھتے ہیں۔ یہ خوش باش لوگ ہوتے ہیں۔
تین : وہ لوگ جو نہ اپنے تجربات سے کچھ سیکھتے ہیں اور نہ دوسروں کے تجربات سے سبق حاصل کرتے ہیں۔ یہ بےوقوف اور نادان لوگ ہوتے ہیں۔

سڑک کے کنارے مایوس کھڑے ہو کر وہاں سے گزرنے والے امیر اور کامیاب آدمیوں کو دیکھ کر ان سے حسد کرنا سب سے بڑی بیوقوفی ہے۔ عقلمندی یہ ہے کہ ہم ان میں وہ جوہر تلاش کریں جن کے سبب انہوں نے یہ مقام حاصل کیا۔
ایک کامیاب انسان بھی زندگی میں پریشانیوں اور ناکامیوں کا سامنا کر سکتا ہے۔ لیکن کامیاب لوگ اس حقیقت سے واقف ہوتے ہیں کہ کسی مصیبت کے بغیر کوئی سکون نہیں۔ کسی دکھ کے بغیر کوئی سکھ نہیں۔ کسی رنج کے بغیر کوئی راحت نہیں۔ کسی کوشش کے بغیر کوئی کامیابی نہیں !

یاد رکھنا چاہئے کہ وہ کامیابی جو راتوں رات حاصل کی جاتی ہے وہ صبح طلوع ہونے سے قبل ختم ہو جاتی ہے۔
پائیدار خوشیاں اور کامیابیاں حاصل کرنے کے لیے اپنی شخصیت کی کمزوریوں پر قابو پانا اور ناکامی پر کڑھنے کے بجائے نئے حوصلوں کے ساتھ جدوجہد کرنا ہوگا۔

فاسٹ فوڈ لائف اور ہمارا کردار

2009-11-09T10:26:00.002+03:00

دورِ حاضر کی زندگی بڑی برق رفتار ہو گئی ہے !

اور اس مادّی مسابقت کی گہما گہمی میں ہمارے رویے بھی "فاسٹ فوڈ" کی طرح تیز رفتار ہو گئے ہیں۔ مگر یہ بڑا عجیب معاملہ ہے کہ تیز رفتاری میں اگر کوئی حادثہ ہو جائے یا کسی قسم کی کوئی چوٹ لگ جائے تو اپنی جسمانی تکالیف کے علاج کے لیے ہم دوڑے دوڑے ڈاکٹر کے پاس چلے جاتے ہیں۔ لیکن روحانی امراض کے علاج کی خاطر اپنا احتساب کرنے ہمارے پاس شاید وقت کی کمی نکل آتی ہے !

درحقیقت ہمارے اخلاقی کردار کا براہ راست اثر ہمارے گھر ، ہمارے معاشرے پر پڑتا ہے۔ خود سے منسلک مختلف و متنوع کردار دراصل وہ خوبصورت اور متاثر کن کردار ہیں جنہیں رب کائینات نے ہمیں عطا کیے ہیں۔ اگر ہر کردار سے متعلق جوابدہی کا اعلیٰ و ارفع تصور ہم اپنے دل و دماغ میں پیوست کر لیں اور یوں ہر کردار کو ایک امتحان سمجھ کر ادا کرنا شروع کر دیں تو ہمارا یہ عمل ہی ہمیں ایسی روحانی قوت عطا کرے گا جس کے باعث ہر رشتے کے ساتھ بہترین اور معتدل اخلاقی رویہ اختیار کرنا ہمارے لئے آسان ہو جائے گا۔

مثبت طرز فکر یقیناً کسی نعمت سے کم نہیں۔ اس سے نہ صرف ہمیں توانائی حاصل ہوتی ہے بلکہ اس کے بہتر اثرات ہمارے گھر ، ہماری صلاحیتوں اور ہمارے زیر انتظام پرورش پانے والی نئی نسل پر بھی پڑتے ہیں۔ افراد سے اگر معاشرہ بنتا ہے تو ہر فرد کی انفرادی ذمہ داری بھی بنتی ہے کہ معاشرے کی اخلاقی فلاح و بہبود کی طرف وہ بذات خود توجہ دے۔

** ذاتی مفاد کو اہمیت دینے کے بجائے اجتماعی مفاد کو ترجیح دیا جائے
** ہر رشتے کے ساتھ عدل و انصاف کو خصوصی توجہ دی جائے
** اچھے اخلاق کے حامل انسانوں سے ربط و ضبط بڑھایا جائے
** سنی سنائی باتوں پر دھیان دینے سے گریز کیا جائے
** بدگمانی کو بتدریج کم کیا جائے
** معاف کرنے اور درگزر کرنے کے جذبات کو بڑھاوا دیا جائے
** رویوں میں دو رنگی کو آہستہ آہستہ کم کیا جائے
** حکمت عملی سے کام لیا جائے کہ یہ وہ خزانہ ہے جس کی بدولت کامیابی قدم چومتی ہے۔

دورِ حاضر کے موثر ذرائع ابلاغ کے ذریعے مختلف تہذیبوں کے لٹریچر ، ڈراموں ، فلموں اور دیگر فنون تک اگر ہماری رسائی سہل و آسان ہو گئی ہے تو ایک ذمہ داری یہ بھی ہم پر لاگو ہو گئی ہے کہ اپنے رویوں اور اپنی تحریروں کے ذریعے نئی نسل تک اپنی تہذیب و تمدن کے اعلیٰ و معیاری اخلاق و روایات کو منتقل کیا جائے۔
کاش کہ اس جانب بھی ہم مستقل مزاجی سے کام کر سکیں۔

اللہ کو بزنس پارٹنر بنائیں ۔۔۔۔ !

2009-11-07T09:27:00.004+03:00

قارون ۔۔۔ دنیا کا امیر ترین شخص تھا !!
قارون کے پاس ان گنت دولت تھی مگر ۔۔۔۔
مگر وہ اللہ کی راہ میں خرچ کرنے سے گریزاں تھا جس کے باعث اس کی دولت بھی اس کے ساتھ غرق ہو گئی اور اس کی کمائی گئی دولت اس کے کسی کام نہیں آئی !

ایک نوجوان نے نوکری کی مسلسل تلاش میں ناکامی کے بعد ایک بزرگ محترم سے مشورہ کیا تو آپ جناب نے فرمایا :
میرا مشورہ مانیں تو اللہ کا نام لے کر کوئی چھوٹا موٹا کاروبار شروع کر لیں اور اس میں اللہ تعالیٰ کو بزنس پارٹنر بنا لیں۔
"بزنس پارٹنر" کی اصطلاح پر جب نوجوان نے بھویں اچکائیں تو جواباً آپ نے فرمایا :
اگر کاروبار کے خالص منافع میں سے 5 فیصد بزنس پارٹنر کا حصہ سمجھ کر اللہ تعالیٰ کی مخلوق کو دے دیا کریں اور کبھی بھی اس میں ہیرا پھیری یا ڈنڈی نہ ماریں تو ان شاءاللہ کاروبار دن دگنی رات چگنی ترقی کرتا رہے گا۔

بزرگ کے مشورے کی افادیت پر مشکوک ہونے کے باوجود نوجوان نے عمل کیا اور اللہ تعالیٰ کے ساتھ شراکتی کاروبار میں کبھی بھی بےایمانی کو قریب نہیں پھٹکنے دیا۔ کوئی دس سال بعد آج وہی نوجوان کہتا ہے کہ :
بزنس پارٹنر کے لئے روزانہ ایک ہزار روپیہ نکل آتا ہے جو الحمدللہ اللہ ہی کی مخلوق پر بلاتفریق خرچ کرنے میں کبھی کوتاہی نہیں ہوتی۔

ایسی ہی ایک دوسری مثال لاہور کے رہائشی درویش صفت ، عام سے غریب شخص منشی محمد کی بھی ہے۔ ان کی گزر بسر مشکل سے ہوتی تھی۔ انہوں نے ایک دن فیصلہ کیا ہے اپنی آمدنی کا 4 فیصد اللہ کی راہ میں خرچ کرنا ہے۔
کچھ ہی عرصہ بعد آپ نے ایک عام سا کاروبار شروع کیا اور وہ ترقی کرتے ہوئے تھوڑے ہی عرصہ میں ایک فیکٹری کے مالک بن گئے۔ آپ نے اپنی آمدنی کا 4 فیصد مستحق مریضوں کی صحت پر خرچ کرنا شروع کر دیا اور ایک دن ایسا آیا کہ منشی محمد نے 4 کروڑ روپے کی مالیت سے لاہور میں "منشی ہسپتال" قائم کر دیا۔

دنیا کے کچھ امیر ترین افراد کا جائزہ لیجئے۔
51 سالہ ٹی وی میزبان اوپرا ونفرے ایک ارب 30 کروڑ ڈالر کی مالکہ ہیں۔ وہ سالانہ ایک لاکھ ڈالر بےسہارا بچوں کی فلاح و بہبود پر خرچ کرتی ہیں۔
کمپیوٹر کے بادشاہ بل گیٹس کی دولت کا اندازہ قریب 100 ارب ڈالر لگایا گیا ہے۔ وہ ہر سال اپنے فلاحی ادارے کی جانب سے 27 ارب ڈالر انسانی فلاحی کاموں میں خرچ کرتے ہیں۔
اٹلی کے سابق وزیراعظم سلویا برلسکونی اپنے ملک کے سب سے امیر اور دنیا کے 10 امیرترین افراد میں شامل ہیں۔ وہ سالانہ تقریباً 5 کروڑ ڈالر غریب ملکوں کو بھیجتے ہیں۔
یہودی قوم کی ایک خاصیت ہزاروں سال سے مشہور ہے۔ ہر یہودی اپنی اصل آمدنی کا 20 فیصد لازمی طور پر انسانی خدمت کی مد میں خرچ کرتا ہے۔ آج کیا یہ بتانے کی ضرورت ہے کہ دنیاوی دولت کا 60 فیصد حصہ یہودی قوم کی ملکیت ہے !

پسِ تحریر :
حدیثِ قدسی میں اللہ تعالیٰ کا ارشاد گرامی ہے :
انفق یا ابن ادم انفق علیک
تو میرے ضرورت مند بندوں پر خرچ کر ، میں تجھے خزانۂ غیب سے دیتا رہوں گا۔
صحیح البخاری , کتاب النفقات , باب فضل النفقة على الاہل

(ندیم ذکاء آغا کے مضمون سے شکریے کے ساتھ استفادہ)

دین و دنیا / کامیابی اور ناکامی

2009-11-04T08:47:00.003+03:00

کچھ دن پہلے کی بات ہے کہ ہمارے دفتر کے ایک ساتھی بڑے پریشان ہو رہے تھے۔ ان کے بڑے لڑکے نے بارہویں جماعت کا امتحان دے دیا تھا اور وہ اسے کسی بہترین کالج میں کمپیوٹر انجینرنگ کے کورس میں داخلہ دلانے کی فکر کر رہے تھے۔ کہنے لگے :
ویسے تو میں نے بذات خود اسے اس کے فائینل ایگزام کی تیاریاں کروائی تھیں پھر بعض اہم سبجکٹس کے ٹیوشنز بھی دلائے۔ لیکن پھر بھی کچھ دل یوں یوں سا ہو رہا ہے بھائی۔
میں نے پوچھا کہ : کس سبب آپ یوں فکر مند ہیں؟
جواباً بولے : دراصل آج کل کے نوجوانوں کو تو آپ جانتے ہی ہیں۔ کچھ لاپرواہ قسم کے ہوتے ہیں۔ تو اس کو دوست بھی کچھ ایسے ہیں ملے ہیں۔ میں نے لاکھ کوشش کر لی کہ ایسے دوستوں سے پیچھا چھڑا لے اور تعلیم کی سمت بھرپور توجہ دے ، مگر ۔۔۔۔ جیسا کہ آپ جانتے ہیں ۔۔۔

ہمارے دوست بڑے فکرمند تھے۔ اپنے بچے کے نتیجے کا بڑا انتظار تھا۔ یہ تشویش بھی تھی کہ اگر نمبرات کم آئیں تو ؟؟
یہ فکر بھی تھی کہ اگر خدا نہ کرے فیل ہو جائے تو ؟؟

کچھ سال پہلے نیٹ پر کسی دانشور کا ایک مقولہ پڑھنے کو ملا تھا :

آپ کو اس کی بڑی فکر ہے کہ آپ کے مرنے کے بعد آپ کے بچوں کا کیا ہوگا؟ لیکن اس کی فکر نہیں ہے کہ آپ کے بچوں کے مرنے کے بعد ان کا کیا ہوگا؟؟

اگر سنجیدگی سے غور کیا جائے تو یہ ایک نہایت تلخ حقیقت ہے !!
ہمیں دنیا کے حوالے سے اپنی اور اپنے اعزاء و اقرباء کی بڑی فکر ہے۔ لیکن آخرت کی جو امتحان گاہ ہے ، اس کے متعلق ۔۔۔۔۔۔
کیا واقعی ہم نے کچھ سوچ رکھا ہے؟
کیا واقعی ہم نے دن بھر میں اس کے لئے کچھ تیاری کی ہے؟
کیا واقعی ہم اس دن کے لیے کچھ فکر مند ہیں؟؟

یہ سب باتیں مجھے اس وقت دوبارہ یاد آئی ہیں جب میں ایک حوالے سے مولانا مودودی (رحمة اللہ علیہ) کی تفہیم القرآن میں کچھ ڈھونڈ رہا تھا۔
مولانا نے ذیل میں یہ جو کچھ لکھا ہے ۔۔۔۔۔ کاش کہ ہم اس پر سنجیدگی سے غور کر سکیں ۔۔۔۔۔

دنیا میں انسان کی حیثیت درختوں اور جانوروں کی طرح نہیں کہ اس کا مقصدِ تخلیق یہیں پورا ہو جائے اور قانونِ فطرت کے مطابق ایک مدت تک اپنے حصے کا کام کر کے وہ یہیں مر کر فنا ہو جائے۔
ونیز یہ دنیا اس کے لیے نہ دارالعذاب ہے جیسا کہ راہب سمجھتے ہیں
نہ دارالجزا ہے جیسا کہ تناسخ کے قائلین سمجھتے ہیں
نہ چراگاہ اور تفریح گاہ ہے جیسا کہ مادہ پرست سمجھتے ہیں
بلکہ دراصل یہ اس کے لیے ایک امتحان گاہ ہے۔
وہ جس چیز کو عمر سمجھتا ہے ، حقیقت میں وہ امتحان کا وقت ہے جس اسے یہاں دیا گیا ہے۔ دنیا میں جو قوتیں اور صلاحیتیں بھی اس کو دی گئی ہیں ، جن چیزوں پر بھی اس کو تصرف کے مواقع دئے گئے ہیں ، جن حیثیتوں میں بھی وہ یہاں کام کر رہا ہے اور جو تعلقات بھی اس کے اور دوسرے انسانوں کے درمیان ہیں ۔۔۔ وہ سب اصل میں امتحان کے بےشمار پرچے ہیں اور زندگی کی آخری سانس تک اس امتحان کا سلسلہ جاری ہے۔ نتیجہ اس کا دنیا میں نہیں نکلنا بلکہ آخرت میں اس کے تمام پرچوں کو جانچ کر یہ فیصلہ ہونا ہے کہ وہ کامیاب ہوا ہے یا ناکام ؟

افطار : تاخیر ۔۔۔؟ / افطار : وقت سے پہلے ۔۔۔؟

2009-09-12T12:21:00.003+03:00

افطار میں تاخیر ۔۔۔ خلافِ سنت ہے !

امت مسلمہ کو اس بات کی خوش خبری دی گئی ہے کہ وہ جب تک روزہ افطار کرنے میں جلدی (مغرب کی اذاں کے ساتھ ہی روزہ افطار) کریں گے ، خیریت سے رہیں گے ۔
حضرت سہل بن سعد (رضی اللہ عنہ) سے روایت ہے کہ رسول اللہ (صلی اللہ علیہ وسلم) نے فرمایا :
اس وقت تک لوگ خیر و عافیت سے رہیں گے جب تک وہ روزہ افطار کرنے میں جلدی کریں گے ۔
(بخاری، مسلم ، جامع ترمذی ، سنن ابی نسائی)

روزہ جلدی افطار کرنا اس بات کی علامت ہے کہ دین کی بالادستی قائم ہے ۔ کیونکہ روزہ کا دیر سے افطار کرنا یہودیوں اور نصاریٰ کے ہاں رائج ہے ۔
حضرت ابو ہریرہ (رضی اللہ عنہ) سے روایت ہے کہ رسول اللہ (صلی اللہ علیہ وسلم) نے فرمایا:
دین اسلام اس وقت تک بلند رہے گا جب تک لوگ روزہ افطار کرنے میں جلدی کریں گے ، کیونکہ یہودی اور نصاریٰ (اپنے مذہب کے مطابق) دیر سے روزہ افطار کرتے ہیں۔
(مسند احمد ، جامع ترمذی ، سنن ابن ماجہ)
لہذا ہر مسلمان پر فرض ہے کہ وہ ہر بات میں نبی کریم صلی اللہ علیہ وسلم کی اطاعت کرے ۔

سحری اور افطاری میں سنت نبوی یہ ہے کہ سحری دیر سے تناول کی جائے جبکہ روزہ افطار کرنے میں جلدی کی جائے۔
امام نسائی (رحمة اللہ) ، حضرت ابو عطیہ (رضی اللہ عنہ) سے روایت کرتے ہیں کہ انہوں نے حضرت عائشہ (رضی اللہ عنہا) سے سوال کیا کہ ہم میں دو آدمی ایسے ہیں جن میں سے ایک روزہ افطار کرنے میں جلدی اور سحری کرنے میں تاخیر کرتا ہے ۔۔۔ جبکہ دوسرا شخص روزہ افطار کرنے میں تاخیر اور سحری کرنے میں جلدی کرتا ہے ؟ حضرت عائشہ(رضی اللہ عنہا) جواب میں فرماتی ہیں :
"جو شخص روزہ افطار کرنے میں جلدی اور سحری کرنے میں تاخیر کرتا ہے ، وہ رسول کریم صلی اللہ علیہ وسلم کے طریقے پر عمل کرتا ہے ۔ "

وقت سے پہلے افطار

جو شخص رمضان کے مہینے میں روزہ رکھ کر کسی شرعی عذر کے بغیر قبل از وقت روزہ توڑ دے تو یہ بڑ ا سنگین جرم ہے، اور اس کی سزا بھی بڑی عبرت ناک ہے ۔
ایک حدیث میں رسول اللہ صلی اللہ علیہ وسلم کا ارشاد گرامی ہے :
" میں نے خواب میں دیکھا کہ میرا گزر ایسے لوگوں کے پاس سے ہوا جو اُلٹے لٹکائے گئے تھے ، اُن کے جبڑے پھٹے ہوئے تھے اور اُن سے خون رس رہا تھا ۔ میں نے پوچھا کہ یہ کون لوگ ہیں ؟
مجھے بتایا گیا کہ یہ وہ لوگ ہیں جو وقت سے پہلے روزہ افطار کر لیا کرتے تھے ۔ یعنی افطاری سے پہلے ہی روزہ توڑ لیا کرتے تھے ۔ "
(صحیح ابن خزیمہ / صحیح ابن حبان)

اس کے علاوہ ، کسی شرعی عذر کے بغیر عمداً روزہ توڑ دینے کی دنیاوی سزا بھی شریعت نے سخت رکھی ہے کہ ایسے شخص کو قضا کے ساتھ کفارہ میں لگاتار ساٹھ دن کے روزے رکھنا ضروری قرار دیا گیا !

آئیے ، ہم اللہ تعالیٰ کا شکر ادا کریں !

2009-08-14T14:13:00.003+03:00

بسم اللہ الرحمٰن الرحیم

آئیے ، ہم اللہ تعالیٰ کا شکر ادا کریں !

14۔ اگست ، 1947ء
﴿ قیام پاکستان پر قوم کے نام قائد اعظم کا تہنیتی پیغام ﴾

اہالیان ِ پاکستان !
میں انتہائی مسرت و شادمانی اور قلبی احساسات کے ساتھ آج آپ کی خدمت میں تہنیت پیش کرتا ہوں۔
14۔ اگست ، ہماری آزادی اور خود مختار مملکت پاکستان کے وجود میں آنے کا دن ہے!

آج کا دن مسلم قوم کی سرخروئی کا دن ہے جس نے اپنا وطن حاصل کرنے کے لیے گزشتہ کئی برسوں میں بڑی بڑی قربانیاں دی ہیں ۔
اِس انتہائی اہم ساعت میں میرا دل جنگ آزادی کے اُن دلیر مجاہدوں کی یاد سے معمور ہے جنہوں نے پاکستان کو حقیقت بنانے کے لیے اپنا سب کچھ حتیٰ کہ اپنی جانیں تک نثار کر دیں۔ میں اُنہیں یقین دلاتا ہوں کہ پاکستان ہمیشہ ان کا ممنون احسان رہے گا اور اُن ساتھیوں کو جو ہم میں نہیں ہیں ، ہمیشہ دل سے یاد رکھے گا۔

اِس نئی مملکت کے قائم ہو جانے سے پاکستان کے شہریوں پر زبردست ذمہ داریاں عائد ہوتی ہیں ۔ انہیں یہ موقع حاصل ہوا ہے کہ دنیا کے سامنے یہ ثابت کر دکھائیں کہ کس طرح ایک ایسی قوم جس میں مختلف عناصر شامل ہیں ، آپس میں مل جل کر صلح و آشتی کے ساتھ رہتی ہے اور دین و ذات کا امتیاز کیے بغیر اپنے تمام شہریوں کے لیے یکساں فلاح و بہبود کے لیے کام کرتی ہے ۔
ہمارا مطمحِ نظر ، امن ہونا چاہئے ۔۔۔ اندرون ملک بھی اور بیرون ملک بھی ۔
ہم صلح و امن کے ساتھ رہنا چاہتے ہیں ۔ اور اپنے قریبی پڑوسیوں کے ساتھ اور ساری دنیا کے ساتھ خوشگوار اور دوستانہ تعلقات رکھنا چاہتے ہیں ۔
ہم کسی کے ساتھ جارحانہ عزائم نہیں رکھتے۔ ہم اقوام متحدہ کے منشور کے پابند ہیں ۔ اور عالمی امن و خوش حالی کو فروغ دینے میں بخوشی پورا پورا حصہ لیتے رہیں گے ۔

آئیے ! ہم آج کے دن اللہ تعالیٰ کی بخشی ہوئی نعمتوں کا شکر بجا لائیں اور دعا کریں کہ وہ ہمیں اس کا اہل ثابت ہونے کی توفیق عطا فرمائے۔
آج ہماری قومی تاریخ کے تلخیوں سے بھرپور دور کا اختتام ہوتا ہے اور آج ہی کے دن سے ہمارے نئے ، شاندار اور پروقار عہد کا آغاز بھی ہونا چاہئے۔
اپنی سرحدوں کے حریت پسند قبائل اور سرحدوں کے پرے کی مملکتوں کے باشندوں کی خدمت میں ہم تہنیت پیش کرتے ہیں اور انہیں یقین دلاتے ہیں کہ پاکستان ہمیشہ ان کے مرتبے کا احترام کرے گا اور قیام امن کے سلسلے میں ان کے ساتھ ہمیشہ دوستانہ تعاون کرتا رہے گا۔ ہم چاہتے ہیں کہ ہم خود باعزت طور پر زندگی بسر کریں اور دوسروں کو بھی باعزت زندگی بسر کرنے دیں۔ اس سے زیادہ ہماری کوئی اور تمنا نہیں ۔

آخر میں میرے عزیز ہم وطنو ! میں آپ کو یہ بتانا چاہتا ہوں کہ پاکستان کی سرزمین عظیم وسائل سے مالا مال ہے ، لیکن اسے ایسا ملک بنانے کے لیے جو مسلم قوم کے شایان شان ہو ہمیں اپنی تمام قوتوں کی آخری رمق تک درکار ہوگی ، اور ۔۔۔
مجھے بھروسہ ہے کہ اس مقصد کے حصول کے لیے سب لوگ دل و جاں سے اپنی پوری قوتیں وقف کر دیں گے۔

پاکستان زندہ باد !!!

اے کاش کہ ۔۔۔۔۔۔۔۔۔۔۔۔۔۔ !

2009-08-09T09:45:00.001+03:00

ہم فتنوں کے دَور سے گزر رہے ہیں !!
تاریک رات کے ٹکڑوں کی طرح فتنوں کی یورش و یلغار ہے۔ بڑے بڑے عقلاء کی عقلیں حیران ہیں کہ کیا کریں ؟
کس مسئلے پر اپنا احتجاج کریں اور کس طرح کریں؟
ہمارا دشمن اسلام دشمنی میں منظم ہے اور اہل اسلام میں انتشار و خلفشار ہے۔
ہم اپنے پاس سب کچھ رکھتے ہوئے بھی دوسروں کے محتاج ہیں ۔۔۔ تہذیب میں ، سیاست میں ، اقتصادیات میں بھی اور تعلیم و تربیت میں بھی۔

یہ آزمائشیں اور فتنے ہمارے اپنے اعمال و عقائد کا نتیجہ ہیں اور اعمال و عقائد کی طرف ہماری مطلقاً توجہ نہیں ۔۔۔ بس ایک ہوس و خواہش کا طوفانِ بلاخیز ہے ، جس میں اپنی اپنی ہمت کے مطابق بلکہ اپنی بساط سے کہیں زیادہ ہم تیر رہے ہیں اور سیراب نہیں ہوتے !

بڑے افسوس کی بات ہے کہ ۔۔۔۔
ہمارے وہ جلسے جس کسی مسئلے پر احتجاج کے لیے منعقد ہوتے ہیں ، ان میں اس بات پر درد و کرب کا اظہار کیا جاتا ہے کہ ہمارے قرآن کریم کے خلاف جو کچھ کیا جا رہا ہے وہ نہایت قابل مذمت ہے ، ایسے عناصر زمین پر بوجھ ہیں ، ان کو کیفر کردار تک پہنچانا چاہئے۔
لیکن ۔۔۔۔
اس عنوان پر احتجاج کرنے والے قرآن مجید کے کتنے ہی صریح احکامات کی برسرعام خلاف ورزی کرتے ہیں ، اس پر سوچنے کی کسی کو فرصت نہیں !
اسی لیے قرآن میں ایک ایسی ہی قوم کی مثال میں فرمایا گیا ہے :
کتاب اٹھانے کے باوجود کتاب کے حامل نہیں ہیں ، ان کی مثال ان گدھوں کی سی ہے جن پر کتابوں کا انبار لدا ہوا ہے مگر اس سے بےبہرہ ہیں۔

کاش ۔۔۔۔۔۔
کاش کہ ہم ایسے کڑے وقت میں تدبر اور حکمت عملی سے آگے بڑھیں اور اپنے آپ کو قرآن اور للٰہیت کے رنگ میں مکمل طور پر رنگ لیں جو کہ سب سے اچھا رنگ ہے۔
کاش کہ ہمارا مقصود اتباع قرآن و سنت ہو جائے
کاش کہ ہم اپنے آس پاس کے ماحول کو اسلامی تعلیمات کے بےلوث چراغ سے روشن کر دیں
کاش کہ ہم اپنے ماحول کو قرآن و سنت کا آشنا بنا دیں
کاش کہ ہر حالت میں ہم اللہ تعالیٰ کی طرف رجوع ہونے کی عادت اپنا لیں ۔۔۔
کاش کہ ۔۔۔۔
کاش کہ ۔۔۔۔۔۔۔۔۔۔۔۔۔۔

اشاعتی حقوق (copyrights) ۔۔۔؟!

2009-08-04T14:40:00.006+03:00

سافٹ وئر پائریسی سے متعلق یاسر عمران مرزا نے اپنے بلاگ پر ایک نہایت مفید تحریر بعنوان "سافٹ ویر پائریسی، حلال یاحرام" ارسال کی ہے جس پر کافی تبصرے ہوئے ہیں۔
یہ دورِ حاضر کا کچھ سلگتا ہوا سا موضوع ہے کہ امتِ مسلمہ شش و پنج کا شکار ہے۔ حالانکہ اس ضمن میں سعودی عرب کے مفتی شیخ محمد صالح المنجد کے دو فتاویٰ درج ذیل روابط پر موجود ہیں :
تقسيم كرنے كى غرض سے كيسٹيں اور سى ڈيز كاپى كرنا
مختلف قسم كے كاپى شدہ سوفٹ وئر پروگرام استعمال كرنا

اور میرا نہیں خیال کہ کسی بھی مکتبِ فکر کے عالم دین کی طرف سے ان فتاویٰ کو غلط قرار دیا گیا ہو۔ کیونکہ یہ مسئلہ خرید و فروخت کے معاملات سے متعلق ہے جس پر مختلف مکاتبِ فکر میں سنگین اختلافات نہایت ہی کم درجہ پر دیکھنے کو ملتے ہیں۔
پہلے فتوے کا درج ذیل پیراگراف کچھ قابل غور ہے :

بعض اوقات ایسے حالات پیش آ سکتے ہیں جن میں مالک کى اجازت کے بغیر ہى کاپى اور
فوٹو کرنا جائز ہو جاتا ہے، اور یہ دو حالتوں میں ہے‫:
‫1 - جب مارکیٹ میں نہ ہو، اور ضرورت کى بنا پر کاپى کى جائے، اور خیراتى تقسیم کے لیے ہو اور فروخت کر کے اس سے کچھ بھى نفع نہ حاصل کیا جائے.
‫2 - جب اس کى ضرورت بہت شدید ہو، اور اس کے مالک بہت زیادہ قیمت وصول کریں، اور انہوں نے اپنے اس پروگرام پر خرچ آنے والى رقم ایک مناسب نفع کے ساتھ وصول کر لى ہو، یہ سب تجربہ کار لوگ جانتے ہیں، تو اس وقت جب مسلمانوں کى مصلحت اس سے معلق ہو تو اسے کاپى کرنا جائز ہے، تا کہ نقصان کو دور کیا جا سکے، لیکن شرط یہ ہے کہ اسے ذاتى مفاد کے لیے فروخت نہ کیا جائے.

یہاں "ذاتی مفاد کے لیے فروخت نہ کرنے (یعنی redistribute)" کی بات کی گئی ہے۔ اور ضرورت کی بنا پر کاپی کرنے کو جائز سمجھا گیا ہے۔
آدمی کی "ضرورت" اور "منافع کا حصول" کا درمیانی فرق مجھے تو کم سے کم یہ نظر آتا ہے کہ پائیریٹیڈ سافٹ وئرز کے ذریعے کمپیوٹر میں اپنا مواد محفوظ رکھنا آدمی کی ضرورت ہے لیکن اسی کمپیوٹر پر پائیریٹیڈ سافٹ وئرز کو کاروباری طریق پر استعمال کرنا ، یہ اس کا منافع ہے۔ سوال یہ ہے کہ بلا اجازت دوسروں کی اشیاء کے سہارے کیا ہم منافع حاصل کر سکتے ہیں اور ایسا منافع جائز ہوگا؟

جہاں تک کتابوں کے حقوق کا معاملہ ہے ۔۔۔۔۔
جب میں نے ابن صفی بلاگ شروع کیا اور بلاگ پر ابن صفی کے بہت سے ناولوں کی پ۔ڈ۔ف فائلوں کے ربط دئے تو ابن صفی کے فرزند محترم احمد صفی صاحب کا اعتراض نامہ وصول ہوا اور انہوں نے کہا کہ ناشر (ابن صفی خاندان) کی اجازت کے بغیر نیٹ پر ان ناولوں کی فراہمی کاپی رائیٹ کی خلاف ورزی ہے۔
میں نے بہرحال روابط ہٹا دئے۔ لیکن بہت سے دوستوں کا اعتراض ہے کہ :
اسلام کا درس تو اوپن سورس ہے ورنہ کتبِ احادیث نہ سامنے آتیں نہ ہم کو دین کا کچھ علم ہوتا
اُن (ابن صفی) کی کتب تو قومی اثاثہ ہیں
ایسا ہی ایک اعتراض یاسر صاحب کی متذکرہ بالا تحریر کے تبصرے میں محمد سعد صاحب نے یوں کیا ہے:
مصنف کو یہ حق تو حاصل ہے کہ اس کی تحریر کو کوئی اور اپنے نام سے نہ چھاپے لیکن یہ نہیں کہ اگر کوئی اسی سے کتاب خریدنے کی استطاعت نہیں رکھتا تو اس پر علم کے دروازے بند کر دے۔

علم کے دروازے بند کرنے کی بات کچھ سمجھ میں نہیں آئی۔ پاکستان یا کسی دوسرے ملک کا کوئی علاقہ ایسا پسماندہ تو نہیں کہ وہاں "لائیبریری" کا وجود ہی نہ ہو۔ اگر پسماندہ ہو بھی تو اس کے قصور وار حکومت یا علاقے کے حکام ٹھہریں گے یا مصنفین؟
مانا کہ تبلیغِ علم اہم فریضہ ہے مگر یہ تو ہر عام مسلمان کی ذمہ داری ہے۔
یہ کہاں کا انصاف ٹھہرا کہ مصنف تو اپنی صلاحیتوں کے بل پر کتاب لکھے ، اسے اپنے خرچے پر شائع کروائے اور پھر علم کے متلاشی غریب غرباء میں فی سبیل للہ مفت بانٹ دے؟
دیگر جو صاحبین استطاعت ہیں ، جو کتاب/کتب کے نسخے خرید کر بانٹ سکتے ہیں ، وہ اپنی ذمہ داری سے بَری ہیں؟
اور وہ جو بلااجازت کتب چھاپ کر منافع اور مشہوری حاصل کریں وہ قابلِ مواخذہ نہیں ہوں گے؟

حقوق کی حفاظت کے معاملے میں ایک واضح صحیح حدیث موجود ہے ، ملاحظہ فرمائیں۔
رسول كريم صلى اللہ عليہ وسلم كا فرمان ہے:
لا يحل مال امرئ مسلم إلا بطيب نفس منه
كسى بھى مسلمان شخص كى اجازت اور رضامندى كے بغير اس كا مال حلال نہيں۔
(صحیح الجامع الصغیر ، کنز الاعمال ، مجمع الزوائد)
علامہ البانی نے اس روایت کو "صحیح الجامع الصغیر" میں صحیح‌ کہا ہے۔

بلاگ اسپاٹ بلاگز کی مکمل چوڑائی والی تھیمز

2009-07-20T00:06:00.004+03:00

بلاگ اسپاٹ کے بلاگز کی کچھ تھیمز ایسی ہیں جو براؤزر کے ونڈو کی تمام چوڑائی کو اس طرح استعمال کرتی ہیں کہ براؤزر میں افقی پٹی (horizontal bar) آنے نہیں پاتی۔ سارا مواد عمودی سمت (vertical direction) میں پھیل جاتا ہے۔ یہ شائد اس سبب بھی ہو کہ ان تھیمز میں کوئی امیج استعمال نہیں ہوتا۔

جو بلاگرز اسکرین کی ساری چوڑائی کو استعمال کرنا پسند کرتے ہیں ، ان کے لئے یہ تھیمز پسندیدہ ثابت ہو سکتی ہیں۔
یہ جملہ 8 تھیمز ہیں ، جن کے نام یوں ہیں :

Sand Dollar
Tekka
Herbert
Jelly Fish
Minima Stretch
Minima Lefty Stretch
Stretch Denim
Stretch Denim Light

مجھے ان میں سے Minima Stretch اور Stretch Denim پسند ہیں۔

***

عمرہ مافیا ۔۔۔۔؟!

2009-07-10T16:17:00.004+03:00

حالیہ "عمرہ اسکینڈل" کے موضوع پر ہمارے ایک قریبی دوست نے اپنا مشاہدہ ، تجربہ اور تاثرات اس مضمون میں بیان کیے ہیں :
ضیوف الرحمٰن، دھوکہ باز اور حکومتِ پاکستان!

ان کا یہ مراسلہ ، سعودی عرب سے شائع ہونے والے روزنامہ "اردو نیوز" (مورخہ 5-جولائی-2009ء) میں بھی "ایڈیٹر کے نام خطوط" کالم میں چھپا ہے۔
بغیر کسی تبصرہ کے ، آپ سب کی خدمت میں بھی پیش ہے ۔۔۔۔۔۔

***
السلام علیکم!

ابھی زیادہ دور کی بات نہیں‌کہ سال میں ایک آدھ بار جب کسی خوش نصیب کی عمرے یا حج کی درخواست منظور ہو جاتی تو مبارکباد دینے والوں کا تانتا بندھ جاتا، اور مہینہ بھر پہلے ہی لوگ اس کے گھر میں جا کر اپنی حسرتوں کے تکمیل کے لیے دعاؤں کا کہتے کہ وہاں جا کر ہمارے لیے بھی دعائیں‌کرنا، اور اس کی واپسی پر سب اشتیاق کے ساتھ اس کا والہانہ استقبال کرتے، اور یہاں کے مقدس مقامات کے بارے میں آنکھوں دیکھا حال سن کر اپنے جی کو بہلاتے، آبِ زمزم کا تبرک انتہائی ادب و احترام کے ساتھ وصول کرتے۔ غرض اس فرد کی خوش نصیبی پر ہر کوئی شاداں و فرحاں‌ہوتا، اور اسے ایک خصوصی پروٹوکول کے ساتھ ساتھ اسکے اصل نام کے بجائے "حاجی صاحب" کی پہچان مل جاتی۔

جوں جوں پیسے کی روانی زیادہ ہوتی گئی، سفر میں آسانیاں پیدا ہوتی گئیں یہ سعادت پہلے سے زیادہ افراد کے حصے میں نصیب ہونے لگی، اور گھر گھر میں اتنے حاجی صاحبان ہو گئے کہ اب تو یہ لقب بھی معنی خیز الفاظ میں بولا جانے لگا ہے۔

مگر پھر بھی ان افراد کی خوش قسمتی پر رشک کیا جاتا ہے جو حج و عمرہ کے سعادت سے بہرہ مند ہوتے ہیں۔ مگر جب سے یہ عبادت کمرشلائز ہوئی اس کاروبار میں جرائم پیشہ افراد کی دلچسپی بھی بڑھنا شروع ہوئی۔ بے چارے سادہ لوح مسلمان، جو کہ شاید ایسا سوچ بھی نہیں سکتے کہ کوئی اس مقدس نیت سے کیے جانے والے سفر میں بھی انہیں دھوکہ دینے سے باز نہیں آئے گا، بعض اوقات اپنے مقدر کو روتے نظر آتے ہیں۔

جی ہاں میں نے اپنے ایک جاننے والی خاتون جو دو سال پہلے عمرے پر آئیں، ان کو یہ کہتے ہوئے سنا کہ جگہ تو مقدس ہے مگر یہاں اللہ کسی دشمن کو بھی نہ لائے، یہ ان کی اس آپ بیتی کا نتیجہ تھا جو اس قدر اشتیاق اور حسرتیں لیے زندگی بھر کا پیسہ جمع کر کے ایک عمرے کی خاطر یہاں آئیں مگر جس ایجنٹ سے انہوں نے ویزہ لیا تھا اس نے صرف تین دن کا پیکج بک کروایا جبکہ ان سے پورے مہینے کے پیسے لے لیے، اور ان کو تب جا کر یہ معلوم ہوا جب ارضِ مقدس پر پہنچے اور تیسرے دن ان کا سامان ہوٹل والوں نے باہر نکال پھینکا، کچھ راتیں تو حرم کے صحن میں سوتے رہے پھر پولیس کے ہتھے چڑھ گئے، جہاں سے بڑی مشکلوں سے ان کی جان چھوٹی رمضان کا مہینہ ہونے کی وجہ سے سیٹ بھی کنفرم تاریخ سے پہلے کی نہیں‌ مل سکتی تھی، خدا خدا کر کے انہوں نے مہینہ گذارا اور ایک تلخ تجربے کے بعد وطن واپس روانہ ہوئے۔

ابھی سب کے ذہنوں میں معتمرین کے ذریعے منشیات سمگل کرنے کی کوشش تازہ ہوگی جس میں ایک سب ایجنٹ ملوث تھا، یہ واقعہ ابھی ذہن سے محو نہیں ہوا کہ ایک معتمرین کا ایک اور سکینڈل سامنے آگیا جس میں آٹھ سو افراد کو یہاں بھیج کر ایجنٹ نے ایئر لائن والوں کے ساتھ مل کر ان کے واپسی کے کنفرم ٹکٹ ریفنڈ کروالئے۔ اب وہ بے چارے جب واپسی کے لیے ائیر پورٹ پہنچے تو انہیں کہا گیا کہ یا تو نیا ٹکٹ خریدیں یا پھر انہیں پولیس کے حوالے کیا جائے گا۔

اس سے پہلے پاکستان سے عمرے کے ویزے پہ آکر یہاں پر روزگار کے سلسلے میں رک جانے والوں کی شکایات عام ہونے پر سعودی حکومت نے عمرے کے لیے کم از کم عمر چالیس سال کی شرط رکھی تھی، ہماری حکومت کو اسی وقت اس سلسلے میں ٹھوس اقدامات کرنے چاہیئے تھے اور ایسے ٹور آپریٹرز کے لائسنس کی منسوخی کے ساتھ ساتھ جرمانے کیے جاتے کہ منافع کے لالچ میں غیر قانونی اقدامات کرنے والے ایجنٹس حضرات خود ہی اس مقدس سفر کے بارے میں کوئی غیر قانونی حرکت کرنے سے گریز کرتے۔ مگر جہاں ایک سپاہی سے لیکر وزیر تک رشوت خور ہو وہاں شاید ایسی رسوائیوں پر صرف اپنا جی ہی جلایا جا سکتا ہے، کیونکہ حکومت کے کانوں پر تو جوں تک نہیں رینگنے والی۔

پاکستانیوں‌کو پہلے ہی دنیا بھر میں سفر کرنے پر جس عزت افزائی کا سامنا کرنا پڑتا ہے اس سے ہمارے اربابِ اختیار اچھی طرح واقف ہیں کہ جہاں خود انہیں جوتے تک اتار کر جامہ تلاشی دینا پڑتی ہے۔ لے دے کر ایک ملک بچا تھا جہاں اطمینان کے ساتھ اہلِ پاکستان اللہ کے مہمان بنتے ہیں، اب یہاں بھی حکومتی پالیسی میکروں کی نا اہلی کے سبب سخت چیکنگ کے ساتھ ساتھ نہ جانے مزید کونسےنئے قواعد لاگو ہونے والے ہیں۔

بشکریہ : سید رفاقت حسین (مکہ مکرمہ)

اردو کے ادبی موضوعاتی بلاگز

2009-06-29T16:23:00.005+03:00

ماشاءاللہ ۔۔۔
اردو بلاگنگ کی دنیا وسیع و عریض ہوتی جا رہی ہے۔

اردو بلاگنگ کے منظرنامہ پر صریر خامۂ وارث (محمد وارث) ، غبارِ خاطر (وہاب اعجاز خان) اور ناطقہ (م۔م۔مغل) جیسے خالص ادبی بلاگز کی موجودگی ، علم و ادب کے شعور و بالیدگی کے ساتھ سنجیدہ مزاجی کا حسین امتزاج ہے۔
ضرورت اس امر کی ہے کہ احباب کچھ اہم موضوعاتی بلاگز کی شروعات کی جانب بھی توجہ فرمائیں۔ مثلاً :
دورِ حاضر کے شعراء کا منتخب کلام
دورِ حاضر کی نمائیندہ نسائی شاعری
اردو کے قدیم معروف شعراء و ادباء کا تعارف
اردو کی نئی بستیاں
اردو میں تنقید و تحقیق کے رحجانات / تحریکیں
نمائیندہ ادیب و شعراء کی تخلیقات کا انتخاب
۔۔۔۔۔۔
۔۔۔۔۔۔۔۔۔۔۔ وغیرہ وغیرہ۔

اسی ضمن میں قدم بڑھاتے ہوئے راقم الحروف نے دو موضوعاتی بلاگز کی شروعات کی ہے۔

مشتاق احمد یوسفی - شہ پارے ‫!!
یہ موضوعاتی بلاگ ، عصر۔ حاضر کے نامور طنز و مزاح نگار محترم جناب مشتاق احمد یوسفی کی تحریروں سے اخذ کردہ منفرد ، متنوع اور لازوال شہ پاروں سے مزین کیا جا رہا ہے !

ابن صفی
ابن صفی ، ایشیا کے سب سے بڑے مصنف ، مقبول ترین ناول نگار اور اردو کے جاسوسی ادب کو برصغیر میں روشناس کرانے والے قلمکار کا اسم گرامی ہے ۔
ابن صفی ہی اُس ادبی شخصیت کا نام ہے ، جس نے تھکے ہوئے ذہنوں کے لئے صحت مند تفریح مہیا کرنے کی کوشش کرتے ہوئے لوگوں میں کچھ نہ کچھ پڑھتے رہنے کی عادت ڈلوائی ہے ۔ اس کے علاوہ ، برصغیر میں ریڈنگ لائبریریوں ‫(reading libraries) کے رواج کو ابن صفی ہی کا کارنامہ کہا جاتا ہے ۔ آج کا قاری بھی ابن صفی کا ناول ایک ہی نشست میں ختم کرنے کی کوشش کرتا ہے اور یہ کمال کسی اور مصنف کو حاصل نہیں ہے !
ابن صفی کے نام معنون اِس بلاگ پر ، ابن صفی کی مزاحیہ تحریریں ، ان کی شاعری ، انٹرویوز ، جاسوسی ناولوں کے پیش رَس، اقتباسات اور ابن صفی پر لکھے گئے تاثراتی مضامین کے ساتھ ساتھ ابن صفی کے تمام جاسوسی ناولوں کے دستیاب آن لائن ایڈیشن (برائے ڈاؤن لوڈ) کے روابط بھی پیش کئے جا رہے ہیں۔

۔۔۔۔۔۔
امید ہے کہ احباب آگے آئیں گے اور یوں جب نیٹ پر چراغ سے چراغ جلیں تو اردو کی روشنی چہار سو پھیلے گی۔ ان شاءاللہ !

بیسویں صدی کی دو ادبی تحریکیں

2009-06-27T17:04:00.002+03:00

ترقی پسندی

سن 1936ء میں لندن میں مقیم کچھ ہندوستانی ادیبوں نے جن میں سجاد ظہیر اور ڈاکٹر ملک راج آنند وغیرہ شامل تھے ، ایک ادبی انجمن کا خاکہ مرتب کیا اور " انجمن ترقی پسند مصنفین" کی بنیاد ڈالی ۔ انگریزی میں اس کا نام رکھا گیا :
Progressive Writers Association
اس کی پہلی سالانہ کانفرنس 1936ء میں ہی بمقام لکھنؤ منعقد ہوئی ۔ اُس وقت کے صفِ اوّل کے ادیب منشی پریم چند نے اس کی صدارت کی اور اپنے خطبہ میں وہ یادگار جملہ ادا کیا :
" ہمیں اپنے حسن کا معیار بدلنا ہوگا ! "

انجمن کے مقاصد میں ۔۔۔ مزدوروں اور کسانوں کے مسائل کو ادب میں پیش کرنا ، ہندوستان کی جدوجہد ِ آزادی میں ادیبوں کو اپنے قلم کے ذریعے شریک ہونے کی تلقین ، اور سب سے بڑا بنیادی مقصد سامراج اور سرمایہ داری کے خلاف بغاوت اور دولت کی مساویانہ تقسیم کی حمایت ۔۔۔ شامل تھے ۔

جدیدیت

بیسویں صدی کی تیسری دہائی میں جب کہ ترقی پسند تحریک اپنے عروج پر تھی ، اس کے محاذی ایک اور تحریک پروان چڑھی ۔ اس کا نام توخیر بہت بعد میں '' جدیدیت '' یعنی (Modernism) پڑا ۔ لیکن ترقی پسندی کی مخالفت میں لاہور کے ''حلقہ ئ ارباب ِ ذوق '' والے اس میں پیش پیش تھے ۔
حلقہ ئ اربابِ ذوق میں ۔۔۔ میرا جی ، ن۔م۔راشد ، مختار صدیقی ، تصدق حسین خالد ، قیوم نظر وغیرہ شامل تھے ۔ اُن شعراء / ادباء کا یہ نظریہ تھا کہ ۔۔۔ ادب کو کسی نظریے کا پابند نہیں ہونا چاہئے ، بلکہ انکشافِ ذات اور اپنی داخلی کیفیات کے اظہار کو نمایاں کرنا چاہئے۔

مزید تفصیل یہاں پڑھئے : ترقی پسند تحریک اور جدیدیت

ایک گدھے کی سرگزشت (کرشن چندر)

2009-06-16T16:18:00.001+03:00

کچھ مختصر تمہید ۔۔۔۔

کل 15-جون-09ء کے اخبار "اردو نیوز" (سعودی عرب) میں ایک خبر آئی کہ "بارہ بنکی" میں ایک 35 سالہ خوبصورت عورت نے اپنے شوہر کو اتنا پیٹا کہ بچارہ ہلاک ہو گیا۔ وجہ یہ تھی کہ شوہر بیوی پر ادھر ادھر جانے پر سخت پابندیاں لگا رہا تھا۔
ساتھ ہی اخبار دیکھنے والے ایک دوست نے پوچھا کہ: یار، یہ بارہ بنکی کہاں ہے؟
بازو موجود ایک ہندوستانی صاحب مسکراتے ہوئے بولے:
شمالی ہند کا مشہور شہر ہے جہاں کے 'گدھے' بھی مشہور ہیں۔
اس پر میں نے ٹکڑا لگایا کہ : ہاں ! جہاں کے ایک گدھے پر کرشن چندر معرکہ خیز ناول بھی لکھ چکے ہیں۔
مگر افسوس کہ ۔۔۔۔۔۔
نہ کسی کو کرشن چندر کا نام معلوم اور نہ اس ناول کا نام !

کیا یہ اردو ادب کا المیہ ہے کہ ہماری موجودہ نسل ہی ایک ایک کر کے ادبی کلاسکس کو فراموش کرتی جا رہی ہے؟؟
آج گوگل چیک کیا تو کرشن چندر کا یہ لازوال ناول پ۔ڈ۔ف شکل میں دستیاب ہو گیا۔

کچھ صفحات ذیل میں مطالعہ فرمائیں اور اردو کے اس صاحب طرز ادیب کو خراج تحسین پیش کریں کہ اس کے قلم کی کاٹ آج بھی موثر لگتی ہے !!

*********
حضرات !
میں نہ تو کوئی سادھو فقیر ہوں ، نہ پیر دستگیر ہوں ، نہ شری 108 سوامی گھمگھمانند کا چیلا ہوں ، نہ جڑی بوٹیوں والا صوفی گورمکھ سنگھ مچھیلا ہوں ، میں نہ ڈاکٹر ہوں ، نہ حکیم ہوں ، نہ کسی ہمالیہ کی چوٹی پر مقیم ہوں ، میں نہ کوئی فلم اسٹار ہوں ، نہ سیاسی لیڈر۔
میں تو بس ایک گدھا ہوں۔
جسے بچپن کی غلط کاریوں کے باعث اخبار بینی کی مہلک بیماری لاحق ہو گئی تھی۔ ہوتے ہوتے یہ بیماری یہاں تک بڑھی کہ میں نے اینٹیں ڈھونے کا کام چھوڑ کر صرف اخبار بینی اختیار کی۔
ان دنوں میرا مالک دھنو کمہار تھا جو بارہ بنکی میں رہتا تھا (جہاں کے گدھے بہت مشہور ہیں)، اور سید کرامت علی شاہ بار ایٹ لا کی کوٹھی پر اینٹیں ڈھونے کا کام کرتا تھا۔ سید کرامت علی شاہ لکھنؤ کے ایک مانے ہوئے بیرسٹر تھے اور ان دنوں اپنے وطن مالوف بارہ بنکی میں ایک عالی شان کوٹھی خود اپنی نگرانی میں تیار کرا رہے تھے۔ سید صاحب کو پڑھنے لکھنے کا بہت شوق تھا۔ اس لئے اپنی کوٹھی کا وہ حصہ جو انہوں نے سب سے پہلے تعمیر کرایا ، وہ ان کی لائیبریری کا ہال تھا اور ریڈنگ روم تھا، جہاں وہ علی الصباح آ کر بیٹھ جاتے۔
باہر برآمدے میں کرسی ڈال کر اخبار پڑھنے کا چسکہ پڑ گیا۔ ہوتا اکثر یوں تھا کہ ادھر میں نے ایک بلند ہوتی ہوئی دیوار کے نیچے اینٹیں پھینکیں اور بھاگتا ہوا ریڈنگ روم کی طرف چلا گیا۔
وکیل صاحب اخبار پڑھنے میں اس طرح مصروف ہوتے کہ انہیں میرے آنے کی خبر بھی نہ ہوتی اور میں ان کے پیچھے کھڑا رہ کر اخبار کا مطالعہ شروع کر دیتا۔ پڑھتے پڑھتے یہ شوق یہاں تک بڑھا کہ اکثر میں وکیل صاحب سے پیشتر آگے اخبار پڑھنے لگتا۔
بلکہ اکثر تو ایسا ہی ہوا ہے کہ اخبار کا پہلا صفحہ میں پڑھ رہا ہوں اور وہ سینما کے اشتہاروں والا صفحہ ملاحظہ فرما رہے ہیں ۔۔۔۔۔۔۔
۔۔۔۔۔۔۔
۔۔۔۔۔۔۔۔۔۔۔۔۔۔۔۔۔
۔۔۔۔ یہ جو میں پڑھنا بولنا سیکھا ہوں ، اسے سید صاحب کی کرامت سمجھئے یا ان کی مہربانی کا نتیجہ۔ کیونکہ سید صاحب کو اخبار پڑھتے ہوئے خبروں پر بحث کرنے اور کتاب زور زور سے پڑھنے اور پڑھتے ہوئے اس پر تنقید کرنے کی عادت تھی۔ یہاں جس جگہ پر وہ کوٹھی تعمیر کرا رہے تھے۔ انہیں کوئی ایسا نہ ملا جس سے وہ ایسی بحث کر سکتے۔ یہاں ہر شخص اپنے اپنے کام میں مصروف تھا۔ میں ہی ایک گدھا انہیں ملا مگر اس سے انہیں بحث نہ تھی۔ وہ دراصل گفتگو کرنا چاہتے تھے۔ اپنی دل ودماغ کی باتیں کسی سے کہنا چاہتے تھے۔ گدھے کے بجائے ایک خرگوش بھی ان کی صحبت میں رہتا تو عالم فاضل بن جاتا۔
سید صاحب مجھ سے بڑی ملاطفت سے پیش آتے تھے اور اکثر کہا کرتے:
"افسوس کہ تم گدھے ہو۔ اگر آدمی کا بچہ ہوتے تو میں تمہیں اپنا بیٹا بنا لیتا۔"

سید صاحب کے ہاں کوئی اولاد نہ تھی۔ خیر صاحب کرنا خدا کا کیا ہوا کہ ایک دن سید کرامت علی شاہ کی کوٹھی تیار ہو گئی اور میرے مالک کو اور مجھے بھی اسی دن وہاں کے کام سے جواب مل گیا۔ اسی رات دھنو کمہار نے تاڑی پی کر مجھے ڈنڈے سے خوب پیٹا اور گھر سے باہر نکال دیا۔ اور کھانے کے لئے گھاس بھی نہ دیا۔ میرا قصور یہ بتایا کہ میں اینٹیں کم ڈھوتا تھا اور اخبار زیادہ پڑھتا تھا۔
اور کہا کہ:
"مجھے تو اینٹیں ڈھونے والا گدھا چاہئے، اخبار پڑھنے والا گدھا نہیں چاہئے۔"

ناچار میں بھوکا پیاسا رات بھر دھنو کمہار کے گھر کے باہر سردی میں ٹھٹھرتا کھڑا رہا۔ میں نے سوچ لیا تھا کہ صبح ہوتے ہی سید کرامت علی شاہ کی کوٹھی پر جاؤں گا اور ان سے کہوں گا کہ اگر اینٹیں ڈھونے پر نہیں تو کم از کم کتابیں ڈھونے پر ہی مجھے نوکر رکھ لیجئے۔
شیکسپئر سے لے کر احمق بھوردی تک میں نے ہر مصنف کی کتاب پڑھی ہے اور جو کچھ میں ان مصنفوں کے بارے میں جانتا ہوں وہ کوئی دوسرا گدھا کیا جان سکتا ہے۔
مجھے امید ہے کہ وکیل صاحب ضرور مجھ سے التفات کریں گے اور مجھے رکھ لیں گے۔
مگر قسمت تو دیکھئے ۔۔۔۔ دوسری صبح جب میں سید صاحب کی کوٹھی پر گیا تو معلوم ہوا۔ راتوں رات فسادیوں نے حملہ کیا اور سید کرامت علی شاہ کو اپنی جان بچا کر پاکستان بھاگنا پڑا۔ فسادیوں میں لاہور کے گنڈا سنگھ پھل فروش بھی تھے۔ جن کی لاہوری دروازے کے باہر پھلوں کی بہت بڑی دوکان تھی اور ماڈل ٹاؤن سے ملی ہوئی ایک عالیشان کوٹھی بھی تھی۔
اس لئے حساب سے ایک عالیشان کوٹھی زمین بھی یہاں ملنی چاہئے تھی۔ سو بھگوان کی کرپا سے انھیں یہ سید کرامت علی شاہ کی نئی بنی بنائی تیار کوٹھی مل گئی۔

جب وہاں پہنچا ہوں۔ تو گنڈا سنگھ لائیبریری کی تمام کتابیں ایک ایک کر کے باہر پھینک رہے تھے اور لائیبریری کو پھلوں سے بھر رہے تھے۔
یہ شیکسپئر کا سیٹ گیا اور تربوزوں کا ٹوکرا اندر آیا۔
یہ غالب کے دیوان باہر پھینکے گئے اور ملیح آباد کے آم اندر رکھے گئے۔
یہ خلیل جبران گئے اور خربوزے آئے۔
تھوڑی دیر کے بعد سب کتابیں باہر تھیں اور سب پھل اندر تھے۔
افلاطون کے بجائے آلوبخارا۔
جوش کی جگہ جامن ،
مومن کی جگہ موسمبی ،
شیلے کی جگہ شریفے ،
سقراط کی جگہ سیتاپھل ،
کیٹس کی جگہ ککڑیاں ،
بقراط کی جگہ بادام ،
کرشن چندر کی جگہ کیلے ،
اور
آل احمد کی جگہ لیموں بھرے ہوئے تھے !

کتابوں کی یہ درگت دیکھ کر میری آنکھوں میں بےاختیار آنسو آ گئے اور اب ایک ایک کر کے انہیں اٹھا کر اپنی پیٹھ پر لادنے لگا۔
اتنے میں گنڈاسا سنگھ اپنی پھلوں کی لائیبریری سے باہر نکل آئے ، آکر ایک نوکر سے کہنے لگے :
"اس گدھے کی پیٹھ پر کتابیں لاد لو۔ اور اگر ایک پھیرے میں یہ سب کتابیں نہ جائیں تو آٹھ دس پھیرے کر کے یہ سب کتابیں ایک لاری میں بھر کر لکھنؤ لے جاؤ اور انہیں نخاس میں بیچ دو۔"
چنانچہ گنڈا سنگھ کے نوکر نے ایسا ہی کیا۔ بس دن بھر کتابیں لاد لاد کر لاری تک پہنچاتا رہا۔ اور جب شام ہوئی اور جب آخری کتاب بھی لاری تک پہنچ گئی ، اس وقت گنڈا سنگھ کے نوکر نے کہیں جا کے مجھے چھوڑا۔
اس نے میری پیٹھ پر ایک زور کا کوڑا جمایا اور مجھے لات مار کے وہاں سے بھگا دیا۔

میں نے سوچا جس شہر میں کتابوں اور عالموں فاضلوں کی یہ بےحُرمتی ہوئی ہو وہاں رہنا ٹھیک نہیں۔
اس لئے میں نے ترک وطن کا ارادہ کر لیا اور اپنے شہر کے در ودیوار پر حسرت بھری نگاہ ڈالی۔ گھاس کے دو چار تنکے توڑ کر اپنے منہ میں رکھ لئے اور دہلی کا رُخ کیا کہ آزاد ہندوستان کی راجدھائی یہی ہے ، گہوارۂ علم و ادب ہے۔ ریاست ، سیاست کا مرکز ہے ، وہاں کسی نہ کسی طرح گزر ہو ہی جائے گی۔

*********
۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔
تھانے میں پہنچ کر کانسٹبل نے مجھے اپنے ہیڈ کانسٹبل کے سامنے جا کھڑا کیا۔
ہیڈ کانسٹبل نے بڑی حیرت سے اس کی طرف دیکھ کر کہا :
"اسے یہاں کیوں لائے ہو رام سنگھ؟"
رام سنگھ نے کہا : "حضور، یہ ایک گدھا ہے۔"
"گدھا تو ہے، یہ تو میں بھی دیکھ رہا ہوں، مگر تم اسے کیوں لائے ہو؟"
"حضور۔ یہ انڈیا گیٹ پر گھاس چر رہا تھا۔"
"ارے گھاس چر رہا تھا۔ تو کیا ہوا۔ تمہاری عقل بھی گھاس چرنے تو نہیں چلی گئی۔ اسے یہاں کیوں لائے ہو؟ لے جا کے کسی مویشی خانے میں بند کر دیتے۔ اس بےزبان جانور کو تھانے میں لانے کی کیا ضرورت تھی؟"
رام سنگھ نے رُکتے رُکتے میری طرف فتح مندی کی نگاہوں سے دیکھ کر کہا :
"حضور، یہ بےزبان نہیں ، بولتا بھی ہے!"
اب کے ہیڈ کانسٹبل بہت حیران ہوا ، مگر پہلے تو اسے یقین نہیں آیا۔ بولا :
"رام سنگھ تمہارا دماغ تو ٹھیک ہے؟"
"نہیں، یہ بالکل ٹھیک کہتا ہے ہیڈ کانسٹبل صاحب۔" میں نے آہستہ سے سر ہلا کے کہا۔

ہیڈ کانسٹبل اپنی سیٹ سے اچھلا۔ یوں کہ اس نے جیسے کوئی بھوت دیکھ لیا ہو۔ اصل میں اس کی حیرت بالکل حق بجانب تھی۔ کیونکہ نئی دلی میں ایسے تو بہت لوگ ہوں گے جو انسان ہو کر گدھوں کی طرح باتیں کرتے ہیں۔ لیکن ایسا گدھا جو گدھا ہو کر انسانوں کی سی بات کرے ، ہیڈ کانسٹبل نے آج تک نہ دیکھا نہ سنا تھا۔ اسی لئے بےچارہ چکرا گیا۔ اس کی سمجھ میں نہ آیا کہ کیا کرے؟
آخر سوچ سوچ کے اس نے روزنامچہ کھولا اور رپٹ درج کرنے لگا۔
اس نے مجھ سے پوچھا:
"تمہارا نام؟"
"گدھا"
"باپ کا نام؟"
"گدھا"
"دادا کا نام؟"
"گدھا"

"یہ کیا؟"
ہیڈ کانسٹبل نے تعجب سے کہا۔
"سب کا ایک ہی نام ہے۔"
یہ کیسے ہو سکتا تھا؟
"مجھے دیکھو۔ میرا نام جیوتی سنگھ ہے۔ میرے باپ کا نام پیارے لال تھا۔ میرے دادا کا نام جیون داس تھا۔ ہمارے ہاں نام بدلتے رہتے ہیں، تم ضرور جھوٹ بولتے ہو۔"
جیوتی سنگھ مجھے شبہ کی نظروں سے دیکھنے لگا۔
میں نے کہا:
"نہیں حضور، میں جھوٹ نہیں بولتا ، اور واقعہ یہی ہے کہ ہمارے یہاں نام نہیں بدلتے ، جو باپ کا نام ہوتا ہے ، وہی بیٹے کا ، وہی پوتے کا۔"
"اس سے کیا فائدہ؟" جیوتی سنگھ نے پوچھا۔
"اس سے شجرۂ نسب ملانے میں آسانی ہوتی ہے۔ مثال کے طور پر ۔۔۔ کیا آپ مجھے اپنے پردادا کے دادا کا نام بتا سکتے ہیں؟" میں نے جیوتی سنگھ سے پوچھا۔
"نہیں!" جیوتی سنگھ نے افسوس سے سر ہلا کے کہا۔
"مگر میں بتا سکتا ہوں۔ آپ کے ہاں وہ آدمی بڑا خاندانی سمجھا جاتا ہے جو آج سے چار سو ، پانچ سو ، چھ سو سال پہلے کے مورثِ اعلیٰ کا نام بتا سکے۔ دیکھئے میں آپ کو آج سے آٹھ ہزار آٹھ لاکھ سال پہلے کے مورثِ اعلٰی کا نام بتا سکتا ہوں۔
شری گدھا !
بولئے پھر کیا ہم گدھے آپ سے بہتر خاندان کے ہوئے کہ نہیں ؟"

جیوتی سنگھ نے بڑے غور سے میری طرف دیکھا۔ اس کا شبہ اور بڑھ گیا۔ اس نے آہستہ سے رام سنگھ کے کان میں سرگوشی کرتے ہوئے کہا :
"مجھے یہ شخص بڑا خطرناک معلوم ہوتا ہے۔ ہونہہ۔ یہ کوئی غیرملکی جاسوس ہے ، جو گدھے کے لباس میں نئی دلی کا چکر لگا رہا ہے۔"

رام سنگھ نے کہا :
"حضور۔ میں تو سمجھتا ہوں کہ اس کی کھال اتروا کر دیکھنا چاہئے۔ اندر سے وہ خفیہ جاسوس باہر نکل آئے گا۔ پھر ہم اسے گرفتار کر لیں گے۔"
جیوتی سنگھ نے کہا:
"تم بالکل ٹھیک کہتے ہو۔ مگر اس کے لئے سب انسپکٹر چانن رام کی منظوری لینا بہت ضروری ہے۔ چلو آؤ اسے ان کے سامنے لے چلیں۔"

میرے کان میں بھی کچھ بھنک پڑ چکی تھی۔ مگر میں کان لپیٹے خاموش رہا اور ان دونوں کے ساتھ اندر کے کمرے میں سب انسپکٹر چانن رام کے سامنے چلا گیا۔ چانن رام کی مونچھیں بچھو کے ڈنک کی طرح کھڑی تھیں اور اس کے سرخ چہرے پر ہمیشہ غیض وغضب کا جاہ وجلال رہتا تھا۔ چانن رام کو آج تک کسی نے ہنستے یا مسکراتے ہوئے نہیں دیکھا تھا۔ اسی لئے بہت سے لوگ اسے اعلیٰ افسر سمجھتے تھے۔
چانن رام نے ان کی ساری بات سن کر میری طرف گھور کر دیکھا اور کہا:
"ہاں ، تم تو پاکستان کے جاسوس ہو۔"
میں چپ رہا۔
چانن رام نے زور سے میز پر مکہ مار کر کہا:
"سمجھ گیا ، تم روس کے ایجنٹ ہو۔"
میں پھر بھی خاموش رہا۔
چانن رام نے دانت پیستے ہوئے کہا:
"کمبخت، بدمعاش، کمیونسٹ، میں تمہاری ہڈی پسلی ایک کردوں گا، ورنہ جلد بتاؤ کہ تم کون ہو؟"

یہ کہہ کر چانن رام مجھے مکوں ، لاتوں ، ٹھوکروں سے مارنے لگا۔ مارتے مارتے جب وہ بالکل بےدم ہو گیا تو میں نے ایک زور سے درد بھری ہانک لگائی۔
ہانک لگاتے ہی وہ رک گیا۔ اور پہلے میری طرف حیرت سے دیکھ کر اور پھر نہایت ہی غصہ سے جیوتی سنگھ اور رام سنگھ کی طرف دیکھ کر بولا:
"ارے یہ تو بالکل گدھا ہے، ایک دم گدھا ہے اور تم کہتے ہو کہ کوئی غیرملکی جاسوس ہے۔ تم مجھ سے مذاق کرتے ہو۔ میں ابھی تم کو ڈسمس کراتا ہوں۔"

رام سنگھ اور جیوتی سنگھ دونوں ڈر سے تھر تھر کانپنے لگے۔ ہاتھ جوڑ کر بولے:
"نہیں حضور۔ ابھی یہ باہر کے کمرے میں بول رہا تھا۔ صاف صاف بول رہا تھا انسانوں کی طرح۔"
"تم نے خواب دیکھا ہوگا۔ یا کام کرتے کرتے تمہارا دماغ خراب ہو گیا ہوگا۔ جاؤ اس گدھے کو ہمارے سامنے سے لے جاؤ اور کسی مویشی خانے میں بند کر کے رکھ دو۔ اگر تین چار دن میں اس کا مالک نہ آئے تو اسے نیلام کر دو۔"

میں خوشی خوشی باہر آیا۔ میری چال کام کر گئی۔ اگر میں بولتا تو وہ لوگ ضرور میری کھال ادھیڑ کر دیکھتے کہ اندر کون ہے؟

اس کے بعد تین چار دن تو کیا جب ایک ہفتہ تک کوئی مالک نہ آیا تو مجھے نیلام کر دیا گیا۔ اب مجھے رامو دھوبی نے خرید لیا جو جمنا پار کرشنا نگر میں رہتا تھا۔

*********
اردو کا کلاسک ناول ۔۔۔
معروف ادیب کرشن چندر کا معرکۃ الآرا ناول
ایک گدھے کی سرگزشت

پ۔ڈ۔ف فائل کی شکل میں ڈاؤن لوڈ کیجئے ۔۔۔
بشکریہ : www.urdudost.com

فائل صفحات : 89
فائل حجم : 1.5 ایم-بی

ڈاؤن لوڈ ربط : یہاں

لاٹری کا ٹکٹ

2009-06-15T09:51:00.001+03:00

لاکھوں روپے کی " لاٹری کا ٹکٹ " ہر شخص " بسم اللہ " کہہ کر خریدتا ہے ۔
ایک غریب ، ایک وقت کا چولہا نہ جلا کر ٹکٹ خریدتے ہوئے دعا کرتا ہے :
خدایا ! تو گواہ ہے ، میں نے اپنے بچوں کا پیٹ کاٹ کر تیری رحمت پر بھروسہ کیا ہے۔
ایک جوان لڑکی کا باپ ٹکٹ خرید کر خدا سے جہیز کے لیے گڑگڑاتا ہے ۔
ایک کینسر کا مریض اپنے علاج کے لیے وہ ٹکٹ خریدتا ہے ۔
لاکھوں دکھ ہیں ، لاکھوں بیماریاں اور لاکھوں مسائل ہیں۔
دنیا کے تمام مصائب زدہ لاٹری کا ٹکٹ لے کر خدا کو پکارتے ہیں۔
چار جواریوں میں سے تین کی ہار اور ایک کی جیت خدا کو منظور نہیں ہوتی۔
لاکھوں گھروں سے دس دس روپے لے کر کسی ایک شخص کو " دس لاکھ " دینا خدا کو منظور نہیں ہے۔ وہ معبود ریس کے گھوڑے سے کسی کو " لکھ پتی " نہیں بناتا ۔
یہ انسانوں کی اپنی نوسر بازی اور افتادِ طبع ہے ۔
خدا دیتا ہے تو حقدار کو ضرور دیتا ہے !!

(محی الدین نواب)

بلاگ اسپاٹ : ایک ٹرک

2009-06-13T08:38:00.004+03:00

بلاگ اسپاٹ کے اکثر اردو بلاگز پر تبصروں کی جگہ کچھ انگریزی باقی رہ گئی ہے۔
جیسا کہ اگر میں کسی کے بلاگ پر تبصرہ کروں تو یہ لکھا آتا ہے :
باذوق said...

انگریزی لفظ
said...
کو نکال کر اس کی جگہ اردو لکھی جا سکتی ہے
مثلاً
نے کہا
یا
نے لکھا

Edit HTML میں جائیں
Expand Widget Templates پر چیک مارک لگائیں
درج ذیل لفظ ڈھونڈئے

اس کو ہٹا کر اردو لکھ دیں ، یعنی
نے لکھا ۔۔۔

بس !!